Marketing
Sućurcu s ljubavlju
Nikidan mi je mater privrnila nike škafete, tražeći sasvin stotu stvar, nije je našla, fala na pitanju 
ali je zato naintrala na ovu knjižicu, datiranu 1990. godine. Tako to obično bude, ka u onoj mudroj staroj „tira zeca, istirala lisicu“. Siguro i vi negdi doli, duboko, na podan kojega staroga ormara ili komode koju nikad, ili bar zadnji dvadesetak godin, niste ono baš izvrnili naopako ... jemate ništo ča bi sad rado vazeli u ruke, ako ne ništa za spomenit se kako se to onda radilo, a i za spomenit se niki dragi ljudi, koji su se onda svojski trudili za dobrobit ovo našega berlavoga sela ... naročito za neke stvari sačuvat od zaborava i za izvuč na svitlo dana, pokazat judima, spomenit se, da je ovo našega maloga mista ovod ODAVNA, i da povist nije počela ni 1990, ni 1971. ni 1945. ni 1941. ni 1918. nego puno, puno, kako bi mi rekli MAŠO ranije i ako i jema koja stvar ča bi se neki pojedinci možda tribali i zasramit, jema još puno više toga ča bi nan srce tribalo ispunit radošću i ponoson 
Iako se spominjen u popisu suradnika, more bit da san koji natpis na korici napravija, ovo unutra bi u ona doba bija siguro drugovačije učinija, ali ni to nije ništa zla ... vrimena se minjaju, tehnika gre naprid, sve nas pomalo nagriza zub vrimena i svako malo Oni Gori pozove koga da mu popuni momčad za Veliku Nebesku Utakmicu ... a ovakove stvari, ka ovi mali libar, pomažedu nan da ti neumitni tok vrimena makar malo usporimo, jer ga ne more i ne kraju krajev, na smi niko zaustavit.
Guštajte ovo prolistat, nadan se bar upolak koliko san ja gušta ...
Ako koga zanima, more kliknit NA LINKOVE DOLI pa povirit kako se to u ona doba radilo ...
PRVI DIL
DRUGI DIL
Zdravi i veseli bili!
Post je objavljen 31.03.2013. u 15:50 sati.