Marketing
DA SE NE ZABORAVI – KOMIN i NAPA
Vrime paško težaško !
Voli bi sest malo na komin
Pod napon puno saje
Voli bi da vrime težaško
Dugo, još dugo traje
Ova paška pisma, torniva nas u vrimena kada ni bilo zamislit pašku kuću bez komina i nape nad njin. Zato je centar svake kuće, svake fameje odvavik bila kužina stvarno i zamišljeno najtepliji del kuće.
Neznan dali bi se danas više moglo nać u kugod kuću u Pag, da je sacuvan komin sa napon. Danaska se nape kupujeju na letriku uz ove moderne kužine.
Kako su mi pripovidali moji stari, na kominu se je po zimi sedilo, teplilo, ćakulalo i pocivalo. Ni bilo previše mista ma navecer bi se tote stisnula cela fameja. Klalo bi se cok na oganj, pa kad se on doboro nagori sa jedne bande i previše tepli, a sa druge je coviku bilo zima.
Znad komina je bila napa. Zgjedala je kako napol okrugla polica sa dvi stalaže. Na te police poštivalo bi se cagod od ukrasa, ćikarice ili kakova broka, ili stara pegla na žeravu, stara lumaca i ki je ca ima. Znalo se deržat, škatule sa cukaron, kafon i soli.
Kad su došli beli špaheri zrušili su se komini i nape, oni ki su ostavili i sacuvali ih, uredili, da ih je lipo vidit. Meni je još u sićanju komin u Madonovu kuću. Danaska judi u konobe ponovno obnovljaju komine sa napon. Vraćaju se iskonu.
Naše stare kuće, naše fameje su zgubile "centar" i toplinu razgovora uz komin u duge zimske veceri, kada je bura puhala paškim ulicama, i kada bi se cela fameja lipo spravila i deržala na kupu. Kadagod bi se i zapivalo i molila krunica, a ženske su znale uz lumacu i šit.
Neka se tornaju vrimena star!
Post je objavljen 09.03.2013. u 23:21 sati.