Marketing
DA SE NE ZABORAVI - LESA
Pute, laze pizon dubli tovari.
Gustirne žedne, mijun sići lati.
Tako pocimjeju besede Dalmatinske himne, za ku je besede i note napisa bard klapske pisme pokojni Jubo Stipišić-Delmata.
I baš te prve besede potaknule su me da nešto napišen o besedi, ku cesto u Pag spominjemo, a to je "lesa".
Triba pocet od laza, da bismo došli do lese. Ca je laz? Koliko put je mat znala reć:
- Pognali smo ovce u lazi.
Laz je prolaz kroz naši suhozidi, od dela do dela, od ogradice do ogradice. Onoliko koliko je visok zid, toliku je tribalo ucint lesu.
Jušto za zatvorit laz služi nan lesa. Nju se po potribi otvara i zatvra, a da se ne dira u gromacu.
U svome životu više san put otvori i zatvori lesu. Koliko je samo bilo les ke smo morali otvorit i zatvorit, kada bismo ja i brat sa tovarima od Tihovca u Pag nosili sir, a sa spizon se tornivali nazad. Preko svetog Kuzma ubrig, preko Jurinovog dela i Novine, Kranjcićovog dela i Budinovog, došli u Tihovac, di su nas cekali nana i ded.
Svaki put kada smo parćevali ded bi nan zna reć:
- Da niste zaboravili lesu za sobon zatvorit.
A, to je značilo kada dojdeš do lese, moraš se kalat sa tovara, otvorit lesu pasat, pa zatvorit lesu, zajahat i partit naprid. Kroz koliko lazi smo pasali, ja neznan broja.
Lese su bile ucinjene od svakakavog derva, a danska se najvećin delon ciniju od dasak.
Zadnji put kada san bi doma, čak san vidi da je lesa ucinjena od žice od koje su ograjene livade.
Nastojalo se je da jedna strana lese bila cversto vezana, jer se na kraj laza stavja šupji kamen (kamen sa bužon), krez koga se mogla provuć špag ili žica kako bi se lesa ucvrstila.
Ovaj drugi del je bi pokretan, ali isto je ima komad žice za stisnut lesu.
Osin ca je puno zidov srušeno, pogotovo u Veli Bok, jer turisti preskaceju preko zidov, nisu upućeni da na svakom ton zidu postoji lesa za pasat.
Možda nebi bilo loše na kakav prospekt napisat zac služi lesa i da su ti zidi ugrajeni mukon i trudon paškog cobana. Neka se furešti cudiji i diviju ono ca je paški covik stvori zavavik.
Konkulana škina težakov od motik
po žurnatin, žurnatin pritrujena.
Dalmatino povišću pritrujena !
Cuvajmo naše lese, one su del našeg živenja kako i ova beseda, da se nebi dogodilo kako u stihovima:
Place stara lesa, place ko miće dite !
Post je objavljen 27.01.2013. u 17:19 sati.