Marketing
SRETNA VAM 2013. GODINA !
Sretna Vam svima i puna zdravja Nova 2013. godina.
Godišće smo stariji, a dali i pametniji?, veliko je pitanje na ko' ćemo odgovor moć dat na kraju ove ca je tek pocela.
Ca nas sve ceka u ovoj godini, napisali su razni astrolozi i astrološki vodiči. Portada je stručnjak za to, pa ne triba od Paga hodit daleko da po svom horoskopskom znaku doznaš ca te ceka vo' godišće.
Ki još ni dobi kalendar more pohitat na kiosk i kupit ako mu ancipret prilikom blagoslova kuće ni ostavi katolički kalendar.
Međutim između svih kalendarov kih san dobi za vo' godišće jedan mi je najviše lega sercu. Kalendar na kome miseci greju ovin redon, i tako piše na kalendar: 1.siječanj-jenar ili antonšćak, 2.veljača-febrar, 3.ožujak-marač-marč, 4.travanj-april, 5.svibanj-maj, 6.lipanj-jun-pomajić, 7.srpanj-jul-žetvenjak, 8.kolovoz-avgust-angušt, 9.rujan-sektembar-smokvenjak, 10.listopad-oktobar-miholjšćak, 11.studeni-nojembar-martinšćak, 12.prosinac-prosunac-dekembar.
Ja ću ovde dodat kako je moj ded izgovara miseci: jenar, febrar, marac, april, maj, žunj, luj, august, setenbar, otobar, novembar i decembar.
Nekad su se judi ravnali prema ritmu prirode, ali danaska vidim da se sve više ravnaju prema ritmu šoldov. Lipo se je ove dane natrošilo, da nan ne fali. Šli smo i ko' kilo gori, ali kako budeju hodili tepliji dani, tako ćemo se borit protiv kila, više ćemo hodit van kuće, više se kretat, pa ćeju i kila doli.
Od blajdana Stipanje do dan pred Staru godinu sam bi doma. Uvik je lipo bit doma, sa ocen i materon, sa svojon famejon.
Pag, uvik velika inspiracija i bit će tekstova i slika na ovon Blogu koliko oćete, samo neka dragi Bog da zdravja i vrimena.
Stojte mi svi dobro Vi ki' volite doć pročitat par besed ca ih ovde notan, pa makar bilo i nevajano.
Post je objavljen 01.01.2013. u 20:19 sati.