Marketing
DA SE NE ZABORAVI - MAŽININ
Ala, fermaj sa tin mažinon, znalo bi se reć kada sugovornik nebi ferma govorit. Danaska sve više duperamo besedu: - Ma daj, ne meji više! I to je to.
Mažinin je mlinac, lipa starinska sprava ka' je služila za mejenje kafe a morda i papra. Moj otac je naviga i uvik je nosi doma sirovu kafu ku je nana broštulala u broštulin, a od broštulane kafe je vonjala cela kuća i cela ulica. To je bi posal koga je tribalo dobro odradit. Moralo se vodit računa da kafa ne zagori.
Kada bi se kafa broštulala nana bi je stresla na cistu kuhinjsku kerpu da se pomalo, na lazno, ohladi. Nakon ca bi se kafa ohladila, tribalo ju je samlit.
Onda bi se klala kafa u mažinin i izmlilo. Mažinin je ima jedan mali škabelin u koga je zmejena kafa padala. Ta kafa bi se uredila u posebne posude.
Jutro se pila "Divka", a broštulana kafa se cuvala za posebne prilike i za posebne goste ki su došli u kuću. Znan da bi nana pitala: - Ću van skuvat malo "šćete" kafe? Uzela bi mažinin, smlila bi jedan mažinin kafe i skuvala.
Bila je to prilika popit malo "šćete" kafe, po starinski.
Biž' mi vanka iz kuće
jer ću te mažininom,
ne šporkaj mi kužine,
jer ću te bruštulinom
Post je objavljen 16.12.2012. u 13:56 sati.