Marketing
DA SE NE ZABORAVI – CIMITAR
Zadnje zemaljsko počivalište naših pokojnih je cimitar. Za sve keršćane cimitar je sveto misto. Talijani ga jušto tako i zoveju campo santo. Istina je da današnji mlaji svit sve više dupera našu besedu grobje, ali stariji judi i mi ki ne želimo minjat stare besede, ostali smo "virni" – cimitru.
Tamo pocivaju svi naši pokojni, svi oni mili i dragi judi kih više ni meju namin, kih se u svojim mislima sitimo, a najviše kada obajdemo to sveto misto, tu svetu pašku grudu u ku su pohranjeni njihovi zemaljski ostaci.
Sve ca njima danaska moremo dat je cviće, užgena šterika ili lumin, misal, i uspomena na sve ono lipo ca smo zajedno pasali i molitva ku' uvik izgovorimo: Bog vas pomiluj. Svi oni ki su u smert partili, ostali su snamin dokle god nas pamet služi, dokle god in moremo zafalit za svu dobrotu, srce i dušu, ku su nan za života darivali.
Cimitar je najžalosnije misto na vome svitu kada mu dopremimo novog "člana". I zemja, i zid, i križ i mramorne ploče, placeju zajedno sa tugujućima kada izgubimo svoga najmilijega. Veza između njega i nas ki smo ga znali i kumpanjali do zadnjeg svetog mista kadi će pocivat, pušćen uz jecanje trube ili danaska kakve klape ka svidoci da je životon, i svin onin ca je za svoga života ucini, ostavi puno šinjali u serca svih nas. Tek tad se potverdi stara izrecena misal da nan smert bez milosti uzimje uvik najboje jude. Neka je svima njima laka ova paška zemja.
Ovde ću malo prominit Cesarićevu molitvu: neka jedini piz u novom životu im bude – rosa.
Svima onima ki počivaju na paškom cimitru, i na sve cimitre voga svita neka im bude - pokoj vječni.
Post je objavljen 01.11.2012. u 00:00 sati.