Marketing
Mali drugaši u posjeti DVD Mladost
Vinki to, naravno, nije bila nikakva novost. Osin ča je obašla vatrogasni dom u Mašogradu, učinili smo to i nekoliko puti skupa, i jedva da je odala kad smo se slikali u svin vatrogasnin autan. Ka da je bilo jučera, ona sidi za volanon navalnoga vozila, i drži Fifi ka da će jon ko odnit. Sve smo aute tribali obać, bez greške. Ča san ja uredno godinan dokumentira na mome blogu.
Ali ovo jučer je ipak bilo službeno. Triba se obuć za u skulu, mater spremila robu, ali Vinka ni čut!
Eto ti je odozgara sa bilon majicon kratki rukavi, na kojon se kočoperi crveni natpis: „U slučaju požara, nazovi 93!“. Je da je stara majica, dunkve, broj se prominija, ali bitna je pažnja oko svakoga modnoga detalja.
Ka i prave zvizde, malo su kasnili. Tribali su bit gori oko dvi i po ure, za divno čudo, doša san na vrime. Ali zato oni nisu 
Već san se tija uputit doma, vatan kvaku na vrata od aute, kad čujen žamor dičji glasova 
Disciplinirano su prošetali od svoje Osnovne škole Kneza Mislava do vatrogasnoga doma DVD Mladost, praćeni sa svoje tri učiteljice. Odma i je priuzeja u ruke profešur Joško, koji in je objasnija, dičjin rječnikon, zašto vatra gori i kako se sve more gasit ...
... a onda je došla na red praktična nastava. Najprin je Jurica pokaza kako se pravi pjena...
... pa je onda skupa sa Franon pokaza kako se drži mlaznica i gasi prava vatra. A usput su i onu gomilu pjene ošprali sa dvora. Dokle se nisu dica počeli itat unutra 
Pokazali su nan razne vrste mlaznica, koje služe ne samo za gašenje nego i za činit vodenu koltrinu (zavjesu, za sjevernjake) koja štiti aute da vatra ne dojde do nji na pravome požaru...
Valjalo je i dici dat malo da opipaju opremu, pa su dobili u ruke i malu mlaznicu, prilagođenu njihovome uzrastu.
Nakon toga su došle na red i malo opasnije akrobacije: spoštanje sa tornja, ka prikazivanje kako bi vatrogasci sa krova ušli u stan koji je blokiran odozdal. Najpri je tribalo pažljivo pripremit opremu, di vatrogasci pomažu jedan drugome ...
... a onda su se popeli na vrh vatrogasnoga tornja. Ako su cilo vrime šuškali i čakulali, sad se mogla i mušica čut ...
Frane i Jurica su to profesionalno izveli i pobrali pljesak okupljene dječice, kad su se sritno prizemljili.
Još je bilo puno toga uza pokazat, a tribalo je malo i zaprišit, jer se nebo iznad nas opasno namrgodilo. Doklen su se primištali na novu lokaciju, barba Draga in je pokaza kako radi oni veliki vodeni top na navalnin kolima ....
... ča je i mene natiralo na hitnu evakuaciju sa fotoaparaton ispod điletina jer san, na moju nesriću, bija niz vitar od topa
Sljedeće ča su dičica mogla vidit je gašenje PRAVE vatre sa aparatima punjenima prahon, kakvi su i u školi, pa kad in je Joško objasnija kako ih moredu koristit, zlu ne tribalo, dobila su i dica priliku za provat malo rukovat aparaton za gašenje.
Nisu bili oduševljeni sa demonstracijon, jer, kako je bilo jugo, sve je dici nosilo u oči pa je kod malo osjetljiviji i oko zasuzilo. Ništa zla ... kad su barbe vatrogasci pitali „ko je za vožnju u vatrogasnome kamionu?“ , digle su se u ariju sve dičje ručice u dvoru vatrogasnoga doma ....
Opet su Jure i Frane pomagali Jošku da se dica ukrcaju ...
... i kako se sve moralo brzo obavit ... učinija se sdamo jedan đir po cilome dvoru ....
... jer je bilo puno nestrpljivi koji su jedva čekali da i na nji dođe red
Nakon ča su se svi malo provozali, pustile su i učiteljice malo na dičje igralište, tamo di naši vatrogasci vježbaju za takmičenja...
Nakon ča se svaki razred slika sa svojon učiteljicon i vatrogascima kraj velikoga vatrogasnoga kamiona ...
Polako su se, puni utisaka, uputili nazad u školu, vatrogasci su ih ispratili uz pozdrav “Vatru gasi, brata spasi“, a učitelljice su in usput objasnile koji ko je sveti Florijan, oni kip ča cilo vrime isprid Doma gasi onu malu zapaljenu kućicu.
Zdravi i veseli bili! 
Post je objavljen 27.10.2012. u 16:02 sati.