Marketing
DA SE NE ZABORAVI - ZIKVA
Prije nego ca će se dite rodit triba mu prontat robicu i prvu postijicu. Svi se sa vesejen trudiju, unaprid pokupovat i prontat sve ca triba i ne triba, jer ni mala stvar, nego najlipša, da novi život dolazi u kuću i lipo je da mu se svi veseliju. I triba bit tako. Noga puta, se ni rajalo a da se unaprid znalo ca će se rodit, zato se još više sa nestrpljenjem cekalo ca će doć na svit. Danaska svi ženu noseću pitaju: "znaš ca nosiš?"
Svaka fameja je imala dice ili ih je baren bilo kako se u Pag znalo reć "koliko ih je Bog da", a za sretan pocetak najprije se prontivala zikva (prva postijica za ditešce). Ni bilo kuće bez zikve i navavik se duperala za više generacija dice. I danaska fameje imaju zikve, samo se više ne duperaju kako prije, pa su spravjene na šufiti. Neke su se zikve nacinjale tako da dno bude poluokruglo kako se dite moglo zibat (ljuljat, njihat) da se lakše umiri i zaspe. Zikva je bila uz materin rub postije, kako bi ona, po noći kada ditešce zaplace, samo kalala ruku i pocela ga zibat, ili mu dat "cice", kako bi se ditešce nadojilo, umirilo i zaspalo.
Zikva je ono ca u standardnom jeziku zovemo zipka, kolijevka. Ne znan zac zikve više nisu "u modi". Istina, da je dite moglo bit u zikvu oko šest miseci, onda bi je prereslo, pa se je moralo parićat ca veće.
Vecer je, kada bi mat morala malo predahnut od svih posli, pored diteta ke su je kroz dan tukale ucint, a ditešcu je to moralo bit najlipši del dana, jer je moga bit uz mater, mogla ga je zibat, a i zapivat mu na uho, jer je dite bilo mirno kada bi poznalo materin glas. Spominjen se da su pivale:
Ajmo spati, Boga zvati
Bog će namin dobra dati,
I njegova sveta Mati
Da nam budu u pomoći
I u danu i u noći
Danaska u eri klapskih pisam, cujemo kako klape pivaju pismu, "Sušna zikva na škoju", za ku je besede napisa Slavko Govorčin, i nima klape ka je ne piva.
"A moje oči išću, išću, plač diteta na škoju."
I nekako me strah da, "škoji" su nan sve više pusti, a "sušna" zikva je ostala na šufit ili ki muzej starina.
Za kraj moran reč, da beseda "zikva" ima i drugo, preneseno značenje, a to je dom, zavičaj, kuća i sve ono ca nan je od rojenja blizu i na ca se sitimo u teškin vrimenima, kada mislimo na ditinjstvo, kada te nešto stisne u persi kako stena, a ne smimo se pregibat, nego ostat na noge. Jušto onako kada smo bili povijeni u zikvu i bili blizu tog malog svita u kome ni niš falilo, u kantun komore di su samo daske škripjale.
Rojenje moga sina me tornalo u vrime za koga mi se cini da ga više nima, kako ni ove besede "zikva".
Post je objavljen 03.08.2012. u 13:33 sati.