Marketing
Najgore je samo sidit i mučat
Moran najpri napast gospodina @špiljka, jerbo mi je većinu besid ukreja iz ustiju. Naravno da gren na prosvjed. Skupa sa ženon i ćeron od osan godin.
Najteže od svega mi je bilo objasnit mome ditetu zašto ćemo prosvjedovat - radi toga ča neki barbe očedu spaljivat smeće u cementari pa ćemo se svi razbolit radi toga, a posebno odgovorit na pitanje: " A zašto te barbe ne pokupi policija i odvede ih u zatvor?". Veći mi se grop stvorija u grlu nego @papru da pročita ovi @pechinin tekst. Kako to objasnit ditetu od osan godin?
Da nan neki ljudi radidu o glavi, o zdravlju, a mi in ne moremo ništa?
Zašto nan uporno tupidu da će iz fumari (dimnjaka, za sjevernjake) izlazit skoro čisti ozon, a ne deboto ono su čin su tamanili ljude po Aušvicu, Bergen-Belsenu, Treblinki i ostalin hramovima arijevske rase?
Zašto nan je bitnije KO je pokrenija inicijativu nego inicijativa sama?
Zašto nan je bitnija VLAST nego zdravlje naroda sa kojin će neko, za koju godinu, vladat?
Ako ko od nas i ostane 
Parin sam sebi ka Don Quijote, samo ča neću jašit na tovarčiću, nego ću na mojin teškin nogan učinit par điri priko Rive, vikat, možda koga i poslat, makar u sebi, jer to je najmanje ča mogu učinit
I 'ebe me se ča će se koji kreten iz kafića smijat "ovin umaškaranin redikulima" na Rivi. Samo se nadan da će nas ovi put bar bit malo više nego lani, u doba kad je bila Mrdujska regata.
Photo „Slobodna Dalmacija“, Mrdujska regata 2011
Sutra, kad Bog oli Vrag dođe po mene i po ote ča se smijedu, ja ću bar mirno sklopit oči, da san bar glas diga, i da nisan samo mirno odšeta u "kupaonicu" di se iz tušev nije molavala tepla voda, nego Zyklon B.
Ja toliko! 
Post je objavljen 16.06.2012. u 08:09 sati.