Marketing
DA SE NE ZABORAVI - "GUŠTERNA"
Poce san sa lokvon, pa bi bi red da besede o vodi zaokružin, sa gušternom. Uz svi vodovodi voga svita, voda danaska postaje svjetski problem. Istina je da danaska nema kuće, ka nema makinu za prat robu, a većina kuć ima makinu i za prat sudi, istina je da veliki del vode koristi i industrija, ali je istina da su judi nekad i bez toga živili. Gore ili lakše ki bi to zna više ispripovidat.
U vrime moga ditinjstva bilo je tri velike gušterne ugrad, ca se ja sićan. Vela gušterna ku je stvarno žalosno vidit danaska, gušterna na Cimitar ispred Šimićeve kuće, i gušterna na verh Vele ulice ispred križevačkog odmarališta. Jedna mala gušterna je bila kod kule, i jedna ispred materine kuće. Gušterna kod tete Matije u Budingrad. Bilo je još puno gušterni kih se sićan. Gušterna kod tete u Marca, kod tete Mare u Šejmena, kod bake Jele u Pogorilića. Gušterna u Veli dvor. Gušterna u Stari Grad, i neću više daje nabrajat. Govorili su stari judi da nima kuće ugrad ka nima gušternicu u ki del konobe.
Ali najviše mi je upamet ostalo kada smo kopali gušternu ispred kuće, ka još dan danaska tamo stoji. Bilo je fanjskoga posla za ucinit gušternu. Najprije skopat, pa posli ugradit u kamenu, a to je moga ucint samo pravi majstor ki je zna taj posal. Našu gušternu u vertal je ucini kum Marko Paladina od Kolana, jer kolanjci su majstori za suhozid. Naš kum Marko je to potvrdi sa našon gušternon. Danaska je mat koristi za prolivat vertal i po liti za oprat auto. To ni kišnica, nego izvorska voda. Jedan put san je nosi u Riku na analizu i rekli su mi da bi je za domaćinstvo trebalo prokuvat, za ovu drugu upotrebu da ni loša. I ca je se više koristi, to je boja.
Svaka gušterna ima krunu, ka je ucinjena od klesanog kamena, na ku bi se uklesalo godina kada je gušterna ugrajena, a neke su gušterne bile ukrašene sa grbovima, kao gušterna u koludric, a i na drugim mistima ugrad. Ni bilo gušterne bez cigla za doseć vodu. Mi recemo – "doseži mi cigal vode".
Da se tornan na pocetak ove štorije. Danaska je došlo da judi voliju vino više nego vodu. Znali su naši judi reć. -"da je voda dobra i žabe bi je pile". Neke su gušterne ostale kao spomenik, kao naša Vela gušterna, ka vapi za jednon temeljitom obnovom, neke su gušterne zapušćne, a neke su srušene i unišćene. Još se rece: "ca će nan voda, ona ni u postol ni dobra", Dalmatinci govoriju da jedina voda ka ne vridi je voda u "kolino".
Dobro znamo da je voda izvor života, iz vode je sve i sve se u vodu vraća. Zato neka je sva fala našin gušternamin ke su ostale cele i cuvaju se. Za covika.
Post je objavljen 19.04.2012. u 22:25 sati.