Pregled posta

CA TI TO TRIBA ?

Dobijem meil, javja mi se kumpanjon, pita sve onako lipo po paški, sve u rukavice da se ne zamiri, tobože ništa nezna a sve zna, sigurno me uvod navodi da mu triba nešto ucint, kakvu uslugu ili nešto drugo. Obično me se uvik site oni ki me se inače dugo ne site, samo kad in ca triba, a kada san u Pag sretni su ako ne moreju proć pored mene da se nebi morali javit. Di ćeš se Bebiću, javit.



-Ca je, jesi živ? ca ciniš?, pratin te sad na blogu vo ca pišeš, a ca ti to triba?, znaš kakav je Pag samo svitu govora daješ, a to tebi ne triba. Čuhaj, cu san da ti je žena ili divojka, neznan jušto nisi nikad reka, noseća, tako se po Pagu govori, nebi se pofali. Jebate sad u tin godišćima bit otac. Stvarno imaš muda. Pa se opet mislin, ca ti to triba?, jesi moga bit miran, lipo uživat na žal namo di te svako lito vidim. Čuhaj vidin da ti je opet bovica nestala. Slabo zavežeš ti to prijateju dragi, triba to cveršće vezat, kad dojdeš vo lito u Pag ću ti pomoć da to ucinimo kako Bog spada, ca ćeš svako godišće kupovat novu bovicu. E, da ne zaboravin, sti san te pitat ako mi možeš vidit, cu san da se negdi na Viškovo, tamo pored Rike, to znaš boje odmene, ciniju propele za kaići, pa te molin da vidiš kako se more doć do toga. Meni bi tribala propela, ja ću ti poslat mire i šoldi, a ti samo vidi, pa se javi, i nemoj da se sada sto godišć ne javiš. Ala derž se kuraju tata!



Ki lipi meil, a ca mi to triba? Ajde da sad ne pojden vidit za tu propelu, ca bi se po Pagu govorilo o meni?, ne smin ni pomislit.

Onda pred neki dan zove me jedan pažanin telefonski triba mu ucint uslugu, normalno u bolnicu ni mi krivo za njega i ucint ću mu bez problema, jer je i zasluži, i on će se sigurno prepoznat, ali ostala mi je jedna rećenica njegova u ušima: pratim te ca pišeš. Ajde baš mi je drago da je tako, odgovori san. Znači ipak ima njih ki cekaju da cakod novoga napišen, jednako onako kako su komentirali dok san pisa za "baš nas briga".



Pa mi se redovno javja jedan pažanin iz Splita i jako mu je drago ca vo pišen, ki put me kritizira i ispravja, prova je malo pisat na jednoj stranici, pa su ga pjucali na toj stranici, sa svih strana, i on mi govori: -ca vo meni triba? Ne triba kumpanjo moj nikome ništa, zato stojimo tote di stojimo. Na kraju se i ta stranica raspala. Zbogom Pagu grade, više mi ne tribaš. Kako mi je jednon prilikon reka jedan pažanin, nas je Bebiću zajebalo gornje i donje berdo, jer da njih nima nama bi vidici bili otvoreni, ovako smo stavjeni u bužu i ca možeš.

Onda me na svom blogu najavi najkontraverznija paška blogerica, njezin blog pratim od pocetka kad je pocela sa pisanjem, nisan joj se javno zahvaljiva jer to ni bila potriba, ali mi je bilo drago da i ona mene prati. Ona piše i dušon i sercen i osim onih službenih najava na portalima ki su ajmo reć službeni u Pag, bi bi uskraćen kada nebi pročita njezin blog, a da onako lipo po paški neznan i ne vidin ca se u Pag dogaja. Da nebi ispalo da je deržin stranu. Nema potribe, jer u svon pisanju se i ona susriće sa sličnim problemima, pa se razumimo. Drugo me ne intersira. Blog je dostupan svakom, svaki ga more otvorit i pisat ca ga je voja i cint na njemu ca ga je voja. Svaki sam odgovara za svoje postupke. Onda su nju brižnu napali na njen blog zac ja ne dopušćan komentare na svom blogu. Kako je sve u stilu onoga gore spomenutog mejla, mogu mislit ca bi bilo da san još i to dozvoli. Tribalo bi mi tri dana samo stat i karat se sa pažanima zac mi neki svako godišće ukrade bovicu, a pažani tobože nisu lupeži, nego samo gradonačelnik. Vidi kurca, je se tako u Pag rece? Prati san par blogova ki su stvoreni u Pag, i "Pag heros", "Takvi smo a zac", "Ekološku udrugu Cvit Soli", "Komunist star", pa se pitan, ca in to triba?

Pred neki dan baš za Uskers kada san bi doma, napali su na portalu pps i mene i brata, i ni ih briga ca nas dva mislimo i cinimo, i jebe in se za naše mišljenje, ali nas sve jedno pratiju i mene na baš nas briga i njega na youTube. Pitan ja brata, -ca nan to triba?
Onda vidim da na portal baren po anketi judi dolaziju na baš nas briga najviše radi: "Da čitaju o Pagu" i to 294 anketirana, 193 ili 65,6% njih je dalo taj odgovor. Onda pobrojin tekstova koliko san objavi na tom portalu, i ispada da tamo ima najviše mojih tekstova. Pa se opet pitan. Ca mi to triba?

Za kraj ću samo reć da se neću prominit samo zato ca su me otac i mat ovakvoga zgojili i odgojili, da buden ovakv covik kakav san danas. Covik ki voli svoj kraj, judi i užance, zato ca od kada pišem po ovim portalima i blogu, san uspi nasmijat i našega covika, pokazat mu ku novu sliku, ku nikada vidili nisu, ja nisan otima tuje slike, imam svojih sacuvanih preko sto filmova, to je tri ijade slik, jeli to koga interesira, vidin da sa ovakvim, "ca ti to triba" još više me tira da radim ovaj posal. I baš je to, ca san (nadan se) tu i tamo prenesa malo smiha i onoga ca polako gre u zaborav i to sve preni u serca svih onih ki voliju pročitat ono ca napišen. I zato se volin sverstat i zajedno podruku bit uz sve one dobre jude ki cijene i poštuju ono ca je dobro, bilo od mene ili koga drugoga. Zato mi je pokojna nana uvik govorila, da neka judi ne gedan po tome ki su i ca su, nego samo ako su judi.
Zato volin i poštujen sve one ki su svojin trudon, a ke san gore nabroji, dali jedan ogroman novi vitar Gradu u kome cekan tren kada će nestat: "CA TI TO TRIBA".





Post je objavljen 18.04.2012. u 23:43 sati.