Pregled posta

Adresa bloga: https://blog.dnevnik.hr/iskonskipag

Marketing

DA SE NE ZABORAVI - "LOKVA"





Više ni neznan dali se ove dane više spominje Žuta Lokva zato ca je ministar prevari onih ki su mu dali glas ili zato ca nima kiše. "Dugo nije pala kiša", piva klapa Cambi. Jedna i druga misal, odvela me u Studeno da pošpijan dali je lokva kod nanine kućice suha i bome san se prevari.



Od svih voda ke su se kupile covik je za svoje potribe najviše koristi lokve. Lokve su bile važan del života i za judi i za blago, pa se svaka kapjica dažja cuvala kako vela vridnost. Lokva je stara beseda. Latinski lacus znači jezero, blizu je i grčkoj besedi lakkos ka isto znači jezero, a praslavneski koren je u loky. Kod nas se još koristi beseda, lokvanj i škajica. Svuda di se voda skupja.





Lokve su se cistile kad je u njima bilo najmanje vode, tako bi se ocistile od ila, travine i druge šporkice, kako bi se za pervi veći djaži opet napunile da se blago može napajat (ovce, tovari, konji, koze...) i drugo blago. Sve više lokav se zapušća, pune su šporkice, neke su i presušile, zarašćivaju u dracu i terstiku.



Ispred moje kuće prije nego ca su napijantali onaj hotel, bilo je lokav i ne sićan se dice, ka su hodila u škulu, a da nisu lovili punoglavce i žabe, a bilo ih je koliko coviku serce želi. Ni se moglo spat koliko su znale kreketat.



Sićan se velike lokve na Ađentovo u svetu Fumiju, pa kada smo tergali smo vodili beštije tamo pojit. Ni sam više neznan kada san zadnji put bi u svetu Fumiju i dali više postoji ta lokva. Svih onih lokav uberdo kada san hodi kod nane i deda, dok su muzli ovce, i u Novinu i u Zaglavu. Lokvu kod barba Šime Luče u Košin odmah ispred kuće.



Lokve u Hunjci, di smo se kao dica igrali, a znali smo se ki put i napit vode od tih lokav. Ne sićan se da je ki pokupi ku bolešćinu. Puno mi je bilo drago vidit onu velu lokvu ispod svetog Vida, samo ca mislin da je niki ne cisti, niti održava, a ima vode i usred lita.
Zato svi oni ki budeju ovi dani pobirali šparoge, ako naletiju na kukod lokvu neka je provaju ocistit i škapulaju ca se škapulat da, i neka se sitiju ovih besed.



Post je objavljen 12.04.2012. u 22:13 sati.