Evo, tija bi napisat dvi riči o imenima ulica u Splitu.
Ma nije to karakteristično samo za Split, vengo i za druge gradove u Hrvatskoj.
Za Europu neznan, al' za Ameriku to ne važi. Jerbo njihove ulice se ne zovu, one se broje.
Kako? A lipo...
Njiman ulice imaju nazive po brojevima...recimo treća ulica, peta ulica, šesta avenija...i tako u nedogled. Ameri su pojednostavili sve, nisu komplicirani, ka recimo mi.
Sićan se jednog svog kolege koji je današnju Senjsku ulicu uvik zva - Senjska, jerbo se Senjska tako zvala i prije. A u moje vrime je bila Lenjingradska. Ka i Prvoboraca ulica koja je prija bila Tartaglina ulica. A meni je uvik ostala Prvoboraca, jerbo san se tako bija navika.
Mislin da je vlast učinila veliki konfužjun s izmjenama naziva ulica, jerbo ti više nemoš nikome tako lako objasnit di triba ić, ako te kojin slučajen pita.
Recimo furešt.
Za neku ulicu.
Ma ča furešt, ma i naš domaći svit...
Među prvin ulicama ča su prominile ime u Splitu, bila je Balkanska ulica. Sad je to Vukovarska ulica, a mi nekako priko noći nismo više bili balkanci.
I sad bi reka, aj dobro, nismo više balkanci, al kako to da više nismo ni radnici...
Jerbo, mislin da je u tom valu promjena imena ulica nastradala i radnička klasa...
Današnja Gundulićeva ulica je prije bila Radničko Šetalište.
Pa se mislin onako, a ja san radnik cili svoj život, da je vlast bila u pravu kad je prominila ime toj ulici...jerbo, ča radnik ima šetat, radnik triba radit...cilu godinu, po mogućnosti sa što manje odmora.
I tako, dan danas toj akciji se pridružuju svekoliki hrvatski tajkuni ča su za male pineze dobili tvornice, dućane, robne kuće i šta ti ga ja znan, omogućujući radnicima da rade na Badnjak, Božić , Uskrs, nedilje, praznike ...i te de (i tako dalje).
I onda se mislin kako su političari ipak bili u pravu, govoreći nam kako će u novoj državi se malo radit a dobro živit.
I jesu, stvorili su državu u kojoj oni malo rade i dobro žive. Eto, nisu nam lagali.
A evo...skoro ću s broda ...malo doma pa opet na more. Pa opet tako...
I ne bi se s njiman minja za sve šolde ovega svita.
A i dan danas znan reć kad me nekor pita za jednu ulicu u Splitu:
"Jel to bivša Paićeva?"
Post je objavljen 18.09.2011. u 23:03 sati.