Li-Lu je lajala cilu noć - ka da je, Bože mi prosti, išempjala.
Aj kvraguc....Je li bilo dosta ? Probudit ćeš cili portun a ko će onda živit od čangrizavih susida....Ionako su štufi svega i jedva čekadu da se zakačidu za bilo šta pa da se izviču, švogaju i ispraznidu jerbo in je od ovakvega mižerjastog života para udrila na uši pa svaki od nji pari hodajuća tempirana bomba oli Pretis-lonac prin nego ča voda u njemu uskuva....i prin nego počme svirat oni pišćot na njemu. Tako bi te kokod moga zgazit ka parnjača kad juri tuta-forca.
Ma zaludu mi sve.
Pitan je pasjon spizom ka malo dite. Minjan joj vodu a ona svejedno i dalje ka navijena : Vau - vau - vau ! Baš ka da mi čini dišpet.....jer šta ja tu njoj jeman zapovidat kad će ona lajat a kad neće lajat ! Bogami je i ona uvatila oni splitski mot ča ga je pokojni Toma Bebić najboje pridočija naslovom svoje pisme: "Nije gotovo kad je gotovo - nego je gotovo kad ja rečen da je gotovo !"
I tako san polubudan dočeka jutro, spavajući samo na pecibokune.
Taman san skuva čaj kad čujen iza vrata sitne prepoznatljive korake i onda se oglasi zvono.
Evo, evo...odma ću. Samo da se obućen. U mudantama san !
Neš ti ča se tu jema za vidit, oglasi se šjora File iza vrata - aj otvaraj jerbo nimam ja ka ti vrimena za bacivanje.
Je, je...Znan ja da.jemate Vi puno za radit u tin godinan !
Ne pizdi nego otvaraj !
Na brzinu san navuka gače-trikvartače i otvorija vrata prije nego ji šjora File rumba.
Iza vrata ona sa po botiljon crnega vina u svakoj ruci.
Aj, miči se....odma će ona - uđe u stan, stavi botilje na stol i uzdahne ka da je sve do sad kopala u poje.
Evo san ti donila dvi litre šoltanskega Dobričića da i ti vidiš ča je pravo vino, mandrilo jedno splisko !
Pa čete Vi meni poč govorit o Dobričiću ?! A koliko san ga ja dosad popija u Begovići iz Gornje Selo...manen ja rukom.
Ma nisi vakega !
A more bit da san i bojega ? Ko bi ga zna ?
Ma ča bojega....! Nima bojega nego ča je ovi Dobričić o moje svojte, zabij to u tu conkulastu glavu, cukunu jedan. Nima !
Ajde neka bude po Vašu. Ma mi se pari malo ka gusto. Moga bi čovik patinavat postole su njin !
A nego ča ! Po tomu se i vidi da je dobro. Oli ti se gujica navikla na ona francuska liđerasta vina ča paridu ka malo jača limunada ?!
Dobro, dobro ! Fala Van lipa šjora File na vinu. Je li rano za čašicu prošeka ?
Ma di rano ! Ja se budin su kokošan ! Aj nalij jedan bićerin...ako jemaš onog farskog...Je li Hektorovića ?
Je, je....
E baš mi otega nalij !
Nalijen joj bićerin prošeka a ona ga saspe onako iz prve u tanko koštunjavo grlo...Malo se strese i pusti ono milozvučno: Aaaaaaa ! Baš je dobar !
More li još jedan bićerin ?
Aj more kad si navalija !
Nego, merlo moje...Ča oče reč da si mi se šišnija ? Nimaš višje onu bilu grivu ! Annn ?
Tako...Palo mi je na pamet - Štrba se vratija sa đite. Bija je tri sedmice jedrilicon pa san malo otiša do njega na čakulu i šišanje.
Ma koji sad Štrba ?
Moj prijatelj iz ditinjstva.
Ča je on barbir ?
Ma ke ! To on usput dok peče na gradelama....On bi i čovika operira ako triba a šišanje mu dođe ka usputna stvar. Bit je u marendi i čakuli !
Ko bi te razumija spasija bi se !
Razumi me ko triba !
Nego, slušaj ti mene mali...odjedan put se moja susida uozbilji i nikako namisti ka zapeta puška.
Ajme meni, pomislin, sad će me počet tlačit kako ni mogla oka sklopit od sinoćnjeg lajanja Li-Lu....koja je ,inače, čin je vidila - šmugnila u banj, legla ispod lavandina i pritajala se ka da nije doma.
Ali falija san.
Ma reci ti meni, mišu moj iz uja - ča oče ona Kosoruša ? Ča glumi ? Krajicu ?
Ne razumin.
Ma ča ne razumiš....Ča ne razumiš. Oli ne vidiš ča je napravila u Sinj na alku. Oni njezini žbiri su navalili na grupu braniteljov zato ča joj nisu bili po guštu i da su je vriđali....
Sumnjam da su ti momci bili bezobrazni.
Pa ča da i jesu ? Pa ča ? Oli bi joj kruna pala s glave da je lipo došla do njih i pročakulala su momcima ? E...ali ni ona taka ! Ona je prošla u tonobilu su crnin caklima. Biće, kaka je - dobro načulila uši i kad je nikor nešto dobacija - odma je na njih poslala policjote. I to one specijalne.
Je, čitan san o tome u Slobodnu !
Ma di toga jema Marinko ? Di ? U Tunguziju ! Ni tamo !
Pa je li ona misli da je svi moradu volit i begenavat joj ka oni ministri ča joj trčidu oko vešte ka niki dvorjani i liziguzi. Ma bogati - uvridila nan se madam !
A more bit da je puno osjetljiva !
Aj ne vuči me za jezik....Je su li tebe ono bili istukli jajima u glavu u Imotskome ? Jesu ! Pa ča onda ... I ja bi te jednim maznila u čivericu, onako o dragosti.
Lipo, lipo !
Jesu li LInića isto onda istukli jajima po čiverici u Imotskome ? Jesu ! A bija je potpridsidnik vlade !
Dobro se Vi sičate ote moje kalvarje !
Aj ne sviraj, ma koja kalvarja....Pa jeste li na tega čovika Linić i ti slali policjote i specijalce ? Niste !
Ma naravski da nismo !
A bili ste vlast.
Jesmo !
Eto vidiš....Pa političari i jesu za to da ih narod bogaje i da se na nji iskali kad mu je teško. Pa ča da političara niko pogodi kojon pomom oli jajom u glavu ! Neš ti.
A gospoja je poslala jake specijalne snage na momke koji su se veselile jer joj se ni svidila nika njiova rečenica.
A izgleda da je tako.
Jo da mi je bilo bit tamo. Ma ne bi me zaustavilo ni muljun policjoti. Ni sto specijalac specijalni. Pogodila bi joj ono crno staklo od tonobile iza kojeg se sakrivala...pa makar kukumarom.....Oli ona misli da je svi moradu jubit.....Očre li donit taki zakon da je triba samo falit?
Evo sva san se infotala - reče uzrujana šjora File i trgne drugi bičerin prošeka i oči joj zaiskre .
A vidi se da je farski najboji, vidi se !
Nalijen joj još jedan bičerin bez da san je i pita oče li.....joli neče.
Svaka čast i Milanoviću i Josipoviću ča nisu glumatali velike zvizde nego su lipo, ka običan normalan naš svit, pozdravili momke, slikali se su njima i popili po žmul vina. Tako triba a ne se poć sakrivat u blindiranin tonobilin.....ka ova naša šjora Keka !
Šjora Keka !
E šjora Keka, šjora Keka - To joj kaže šjora File nakon dva prošeka !
Ajme šta će bit nakon trečega ... pomislin ja.
Ma jesi li čuja ti nju kako Vas iz opozicjuna zajebaje da se nalazite u restoranima oko peke.....Nego ča ! Ne trošite, ka niki drugi, državni novac...Novac naroda - vengo jidete, ako jidete, za svoje pare.
Je, baš joj to ni tribalo !
Pa ča je tebi ? Oli ona zna ča je prijatejsko druženje...Ča je klapa i ča znači odat slobodno meju sviton. Ona ti živi, sinko moj, u bumbaku ! Ide okolo i smije se...minja broše i vešte...obečaje....umisto da se skužaje za sve ča je ona i njezina stranka ovemu narodu napravila. Nek prominidu ime u Stranka Crnih Borši. Nisan ja bila zaminica Sanaderu vengo ona ! E bogati !
Pazite Vi...Mogli bi svršit u pržun !
Ma da mi je vidit toga junaka koji bi šjoru Filu uapsija...skoći ona na svoje štrkljaste noge s bičerinom u ruci...Parila je ka oni kip u Nevi Jork ča drži baklju slobode...i vikne na cili šuc:
A jesi li vidija kako je nabotila !? Sva je pupasta ka ona beba iz Trsta ča su je nekad davno judi stavjali na posteju i ča bi govorila "MAMA" kad bi je okrenija, Ja mislin da kad bi nagnija Kosorušu da bi ona trepnila okicama isto ka ona tršćanska beba, samo ča bi zanamisto MAMA, rekla: "JADRANKA" !
Post je objavljen 11.08.2011. u 11:17 sati.