Marketing
Zapadnokaštelanski Litnji Krnjeval MMXI
Ne moreš se ovo lito ni okrenit na bilo koju stranu, po Zapadnin Kaštilin, a da ne čuješ fureštu besidu. Svaki drugi dan koja fešta, šerata, dernek, veselica ... lovačka, ribarska, crkovna ... ali nije mi se dalo poć na nijednu, čeka san ovo Litnjega Krnjevala, ča mi je osta u dobrome sićanju još od nazad par godin, dokle san ovod samo gostova, a nisan skroz bija u Dijasporu.
Čuja san da se ove godine sve tumbulalo (izokrenilo, za sjevernjake) pa je zanamisto iz Štafilića za Stari kolona krenila iz Staroga put Štafilića.
Početak je bija obećavajuć, najprin je službeno auto, valjda najstarije vatrogasno prometalo ča još vozi u Kaštilin, krenilo na čelu kolone ...
a za njin glazba, isprid koje je barjak nosija neuništivi pl. Miljenko ...
Potla mužike je išla reprezentacija Kaštelanski mažoretkinj ... i to u sve tri veličine ...
... velike (Large, za furešte)
... srednje (medium, za furešte)
... i one najmanje, (small, za furešte) ... taman bi i moja Vinka mogla s njiman plesat. Samo bi morala još malo trenirat kako da uvati šćap kad ga zaitne u zrak.
Nakon smišni (simpatični, za sjevernjake) veliki, sridnji i mali mažoretkinja, nastupaju konjičke snage ...
... bilo je tot sva sila stari revitalizirani kari (zaprežnih vozila, za sjevernjake), sa jednin i više konji ...
... upregnutih, naravno. Šporkaćuni! A sve je to bilo pod budnin okon dežurnoga kauboja, koji je pazija da se ne bi Indijanci spustili sa Kozjaka i učinili koju dežgraciju, na brzinu.
Samo su još Crvenokošci falili, da upotpunidu cili ovi šušur furešti besid, ča san i čuja puten, dokle san odija uz kolonu i vata bolji požicijun za slikavat.
Organizacija je bila na visini, ono ča me je iznenadilo na pravome Krnjevalu, ovod je bila samo točka na „i“. Ovo nisu maškarani vengo pravi komunalci, koji brišu sve tragove koje je za sebon ostavila Dojnokaštelanska Konjica ...
... da ne bi slučajno koji furešti ugazija na „nagaznu minu“ pa izazva međunarodni incident.
Dalje su slidili Primoštenci, koji su se malo pogubili puten ...
... naročito Oni oli Ona ča je nosila bandiru. Polako su se skupili, a poza nji nastupaju Zvizde Večeri, ma koliko mi mučali o tome ...
...Mašogradska Krnjevalska Udruga, da ne rečen „Kampanel“, koji su se, da bi se bolje uklopili u turističku špicu, umaškarali u naše drage turiste, nisan moga vidit je li u domaće oli furešte ...
... a ovo su jema bit dva iskusna Čeha, koji sigurno planiradu na štramcu điravat do Brača, da osjetidu dašak avanturizma. Na kraju je izad nji odila mali kar ča ga je vuka mali konj, a na njemu se vozila mala krajica krnjevala, ča je, ka i svi učesnici, dilila lipe gerbere slučajnin prolaznicima.
Moga se kupit i Mašog..., pardon Maškadur.
Anđa iz Maškar: Ajmo, kupite Maškadur!
Slučajni prolaznik 1: Ovega već jeman. Biće to za furešte ...
Ante Papić, bivši bek u Vala: Oli je na engleskome?
Slučajni prolaznik 2: A oli ti Ante znaš engleski?
Iza Male Krajice je, kako i mirita, odija Mali Krnjo, legendarni Kalimero, ča ga je Šime Strikoman, skupa sa deboto svon dicon iz kaštelanski vrtliči, ovjekovječija u svojoj milenijskoj kolekciji, ove godine ...
Nakon Maloga, doša je na red i Litnji Krnje. Ali ovi se ne užiže, ovoga se more zobjat. Mali grozdić od stoitrideset kili grozja.
Rekli su, dapače i napisali, zli jezici, da uz par stotin litar vina i ovi grozd moreš cili vagun Kaštelanskoga Opola dobit. Kvragu i kemija ... A triba zabilužit i da su ga vukli Težak i Ribar. Ako u tome jema nike simbolike, i ako nas samo Težak i Ribar moredu izvuć iz ... da ne rečen čega ... lipo nan se piše. I slika. I crta ...
Sve ove beštije jer tribalo nikako dovest u red, a ko to more bolje napravit vengo naše simpatične i smišne krotiteljice ...
.. a kako i ne bi kad je Oko Sokolovo sa strane sve držalo pod kontrolon!
Malo po malo, svi smo došli do Igrišća, di su vridni članovi udruge „Poklade“ pripremili feštu, muzike nije falilo ...
... a mislin da niko nije osta ni gladan ni žedan. Ako ne virujete meni, pitajte Rumenoga ...
... koji je nazočija rečenome događaju, ka i još pun kamion oni brez koji nijedna fešta u Kaštiliman ne more proć.
Do iduće fešte ... Zdravi mi i veseli bili! 
Post je objavljen 06.08.2011. u 23:49 sati.