Pregled posta

ŠTORIJA O KLEMPI

Prije par dana san dobija mail da san se ka malo razlinija ca se tice bloga i pisanja...pa evo da nabacin par rici i di koju sluku onako da znate da san još među živima :)))

Kako to inace gre momen sinu je opet pala pizdarija napamet .... uvatija se govorancije oko tega da bi tija jemat ljubimca i tako prije jedno misec dan u moju kucu je ariva novi stanar......mile ti gospe i drage mislija san da je donija pantaganu ( onako na prvi pogled mi se i parilo ka pantagana ) ali ni bila pandagana vengo ova mala beštijica sa kurbanjskon cunkon ......je pogodili ste to je cincila,kojon san ja odma pripeta ime Klempo.

Sin je normalno odma da izjavu da ce se on brinit o njemu,cistit ga i puštat prikodana 2 puta po po ure do uru vrimena iz kaveza po svojon sobi ......jerbo ton beštijici to triba da nebi bilja depresivan.... i da bi se cutija ka barenko malo slobodan.......

Klempu je bija smistija u jedan kupovni kavez za kojega je ispljunija 500 kunica ,a uz to je nakupova i puste nike dodatke,pa spizu dvi tri vrste ,sjeno, prostorku za po podu......sve u svemu ispalija je nekih 1000 kunica za ovu beštijicu ........mislija san da je ispalija skroz naskroz ,dok se normalno beštijica nije i meni uvukla pod kožu sa onon njegovon umiljaton cunkicon i monadama koje po cile dane a posebno noci izvodi po kavezu ( jer je ova beštijica nocna životinja porijeklom sa Anda).

Normalno da san se odma capa interneta i Googlanja kako bi ca više sazna o cincilama i odma na prvu san sazna da mu je kavez kojega je sin kupija premalen ,jerbo je bija u stvari namjenjen za zamorce i kunice oli zeceve .....a ove životinjice volu skakat pa in kavez mora bit dosta prostran i visok da moredu skakat .I kako to inace bude , da bi se ovo malo klupko krzna ca bolje cutilo ja san odma poceja cinit nacrte i nabavljat matrijal da bi mu ucinija veci kavez ...... 100 x 60 x 80 cm –šta je neka optimalna velicina kaveza za cincilu ako je želite jemat doma ka kucnog ljubimca .....

A tako san malo i ja svoje vrime ubija jerbo san iznenada dobija zanimaciju za ubit i ovo malo slobodnoga vrimena ca ga jeman .......ma je kavez ucinjen i to mogu rec da je odlicno ispa i da je funkcionalan samo tako ,posebno ca san mu cilu gornju stranicu ucinija ka poklopac koji se diše po potribi ....... tako je Klampo dobija novu nastambu ......e nu ma bravo triba se odma zafalit ovod i prijatelju iz susistva koji se zauzeja i za Klempu ucinija donji dil kaveza ( ajmo rec škrovadu ) od prokrom lima ....e je dobro ste procitali –od prokroma ......

I tako je Klempo nakon 10 dan uselija u novu nastambu.....ma necu van njanci govorit kako je bija cili sritan i zadovoljan ca je napokon moga skakat i ludirat se cilo vrime a ne samo ono malo vrimena ca ga sin pušta da trce po sobi ....

Gospe ti blažene kako se odma prilagodija na novu sredinu,na nas ukucane......a normalno da san ga i ja poceja puštat kad sin nima vrimena i da ja sa njimen proveden u zajebanciji po uru vrimena dnevno....a kako i neš kad ga vidite ovako umiljata

Od svega najdraže mu je kupanje....e to je posebna prica.....ne kupa se u vodi ako ste na to mislili vengo u pjesku ......valja se,okrice ,tumbulaje ......pa vanka iz kadice ...pa nazad i opet ka rotor vrti se u svih šesnajst i to traje jedno 20 minuti .....( to mu je potribno da bi održava krzno ) ....

A tek kad capa komadic grancice i provaje po 15 minuti provalit vrata o kaveza....jerbo fala bogu da je odma skužija di su vrata i da se tu more dokopat slobode ...... pa drvce uvaliva između rešetaka,pa provaje dobacit kukicu koja drži vrata zatvorenima .....e ma ni bidan vidija da san mu ja odma ubacija i dodatnu kukicu sa donje strane vrata ka osiguranje konrta njegovog provalivanja :))))

I sad ovod još samo jedna mala napomena......ove beštijice nemogu capat nikakve nametnike jerbo in je krzno toliko gusto da nemore nijedan nametnik u njemu priživit,ne prinosi ama baš nikakve bolesti .......sve u svemu prava beštijica za kucnog ljubimca.......ali mala opomena onima koji bi slucajno pali vako na baketinu ka ja....kad ga pustite iz kaveza tribate dobro pazit oce li odma navalit na sve kabele ca ih more dobavit .....grickanje kabela mu je manija .

Post je objavljen 27.03.2011. u 19:16 sati.