Bliži se godišnjica rođenja Miroslava Krleže (7. srpnja) pa se prisjetih njegovog, meni osobno jednog od najboljih hrvatskih romana (u svakom slučaju, po mnogočemu paradigmatičnog), Na rubu pameti. Slijedi citat, monolog osebujnog Valenta Žganca, zvanog Vudriga, u kojem on iz zagorsko-budističke perspektive govori o tome što život, sve u svemu, jest.
To bi biti imalo, ak se pravzaprav zeme, ono kagbirekli, kaj su pri pedeset i trečoj trumbentali kakti "ab-blazen": a tak i je, ak se prav zeme, kak veli ovaj Kinez: niškoristi se skup, aliti nirvana! Človeka zvlečeju z maternice kak pesa krvavog, a gda su ga prestali boleti zubi, javlaju se križa, a če ga nisu obesili, vumre kak pošten človek. Srab preboleti mora, na kolec se našpranjiti alpak na trn nabosti takaj mora (kajti prez toga mudrosti biti nemre), kača ga fpiknuti mora, sečka bu mu vre palec zdrobila, a onda kaj? Hižu si zazida, curu mladu v krevet povleče, a kaj ž nje postane? Cmizdrava baba, erdegata, kaj mu živeti neda i furt ga zafrkavajuč krv mu pije, a temu onda veliju kakti: dobro mu je, oženjen je, ima ženu, bog mu daj duši lehko, vumrl je kak pošten človek i se je lepo svojoj ženi ostavil. A kaj bi človek mogel z ženom početi? Če joj je pišče krepalo, je cmizdrila, a gda su pak mene kak raubšica prviput z šume donesli krvavog i našpikanog z šprihi, kak ultimatulu, kaj je napravila? Počela mi je boge kresati, da sem fakin i lopov, i da bum kakti na galgama završil. A gda je onda zgledalo tak kagdabi papke otegnuti mogel (kajti mi je lugar slezenu prestrelil), onda je baba zdehnula:
»Bog moj, kud svi Turki tud i čelavi Mujo!«
»Baba, čkomi, ak boga znaš«, tak sem joj povedal, »nit sem Turčin, nit sem fala dragem bogu čelav, niti mi veliju Mujo, pa kaj hočeš z menum, ak boga znaš? Neg daj mi rajše drožđenke polič, da se zvračim.«
»Kaj mislite, dragi gospon doktor, da mi je baba dala drožđenke?«
»A kaj bu ostalo za vračtvo če se zbetežamo, ak su drožđenku popiješ?«
Onda sem se stal, babu sem naharil, hižu razlupal i tak sem se kagbirekli zvračil. Nehče obrne drek pod cekin, a nehče cekin pod drek.
Bila je, bog moj, lepa kak drvena Marija, a štrukle je pekla takšne da ih ni piceki pozobati hteli nisu (gda sem ih hitil na dvorišče, te proklete babje štrukle) i bila je, kak se veli, fajn ženska, al bi bolše bilo da sem ju triput zgubil neg jemput našel. Hmrla mi je mam posle rata od Španjolke, sem joj dal lepi hrastov križ napraviti (jedanajst forinti me je koštal), i tak stojim nad otprtim grobom i mislim si: osel buš nad oslima če si opet vraga natrpaš, i kaj misliju, dragi gospon doktor, povlekel sem drugu sebi v krevet vre okolo fašnika i prav veli Kinez: človek je črevo z devet lukni, a deveta je gluha i slepa. Se kaj muž, pravzaprav, ima je klet i v kleti bučkuriša hekto, a če taj ocet popije, onda mu tak veliju da je pijani prasec i fakin! A kak muž pravzaprav živi, ak se prav zeme? Na sejem prasca tira, a fileke si privuščiti, bogibogme, nemre, ali kravi svojoj papke z oljem maže i vole frizjera i kobile kristera i pod rep im s temjanom kadi, a sam pak, pravzaprav, kak marha nad marhami krepavle, i ak to marhašag ni, kaj onda je život kmetski? Baš prav veli Kinez: če misliš da hekto bučkuriša nekaj vredi, varaš se, dragec! Če misliš da z mlade cure nebu "striženo-košeno" postalo, znova si v zabludi. A ja im velim, gospon doktor: se to denes kaj se z luctvom događa je veliki oselski sprevod – ni repa, ni glave!
Post je objavljen 02.07.2010. u 21:02 sati.