Sinoć sam doša u Split iz Zagreba. Krenija san odma poza saborske šedute pa priko Karlovca, Korenice, Gračaca i Knina za Split. Triba san ništo obavit u Korenicu a i inače mi je stara cesta draža od auto-puta...baranko ča se tiče ambijenta i starih uspomena. Znan da je po autoputu sigurije vozit ma je nikako dosadno. Ne moš vidit kuću, živo čeljade oli pravu birtiju osim one kraj pumpe Zir di je Macola diga ka niki poluotel, polurestoran...i di se, istinu za voju, najde dobre spize a i Velebitske pivuše.
I tako san ariva u sumrak kad me isprid trafike di san ferma za kupit novine uvati moja susida šjora File.
A ča je, ne bi se višje denja ni javit, an,,,?
Ma nisan Vas ni vidija šjora File. Evo san sad doša iz Zagreba !
Je, je - ni ti laka tako stalno gori - doli....Samo nemoj sinko moj ić feraton, vidiš ča se ovo dešava. Svako malo se nigdi rumba ili izokrene, ispade iz šini...tako da ovod već malu dicu matere strašidu i pritidu jin se: Ako ne budeš sve izija za obid odvest ću te na feratu paš se ti meni vozit š njon...ja ti kažen !
A dičica se odma pristravidu i pojidu pjat juve do vrja..Deboto bi i žlicu pojili samo da ne moradu poć se vozit su feraton !
Ajte s milin Bogon, šjora File, ma ostavite se ferate i dice....
Nego, Marinko moj...ovo ti je moja prijatejica Domina. Jušto je došla s Brača...reče mi ona i tek tada vidin da ona ni sama vengo da je u društvu jedne postarije gospoje koja je bila sva obućena po starinsku u crno i sa šudaron na glavu...da joj uši ne ozebu.
Drago mi je gospođo ...uzvratin...i dan ruku nepoznatoj gospoji.
Nisan ja gospoja vengo gospojica - nikako prčevito mi ona odgovori !
Asti ga Mande. pa ona je još cura - pomislin ja u sebi.
Ma škužajte mi gospojice Domina...Ja Van slabo vidin. pinku san ćorav pa nisan zamitija da niste prstenovani !
Ala, ala - aj ti sad doma, ubaci se nervožasto šjora File, a mi dvi ćemo poslin lipo svratit da ti obajdemo punicu.
I tako se ja, pun bagaja, uspenjen do vrata o kuće - kad iza njih zaćujen kako Li-Lu nikako ćudnovato cvili i zavija ka mlada vućica.
Zazvonin !
A evo stiga ti je tata Li-Lu, začujen puničin glas....Brzo ga pozdravi !
Asti Gospu...koji sad tata? Još su mi i Li-Lu utirali za čer. Pari se meni da su svi ovod otišli malo na kvasinu...ka da su i oni političari...mislin se ja u sebi... ma šerjasto mučin ka riba.
A Li-Lu cvili li cvili...i to onako kroza zube - držeći mali crveni balun u justima i gurajući šapon drugi, mali zeleni balunčić.
Koji je sad njoj...?
Mući telac jedan da bi li telac - oli ne vidiš da je mala noseća !
Moooolin ?
Ma u stvari umislila je da je noseća..Aj priobuci se pa ćemo ti sve objasnit... počme me žena gurat prima sobi - sve mi ništo motavajuči.
A ča je ?
Ma nemoj mi govorit ništa, evo vako stalno zavija po vas dan.
Pa je si li je vodila u dotura...pardon, veterinara?
Naravski - pogleda me ona zaćuđeno iskosa. Ni ona primitivna ka i ti pa da se plaši doturi. Odvela san je u Rauniga. Čovik je lipo vižita i reka mi je da pati od umišljene trudnoće !
Ča ? Infišala je da je noseća !
A. e....!
Strovalin se na posteju, ča od umora ča od iznenađenja.
A ča drži stalno ovi balun u justima?
Ma koji balun, cukunu jedan spliski !?
To joj je dite a ne balun!
Za majku Božju !
A vengo ča si mislija - da je izašla iz cirkusa pa da radi one monade su balunon kako bi nasmijavala dicu.
A ča joj je ovi zeleni balun....Vidin da ga stalno gura šapon isprid sebe ?
E, vidiš, to joj je igraška za dite !
A ča si ti njoj davala jist pa da je tako poludila ?
Kretenu jedan - to je poludila gledajući vas političare po cili dan na televiziju, eto ti ga na....I da znaš da jema svoje mliko. da joj stalno curi iz cica !
A lude li kuće, poćnen se ja snebivat. Pa ovo nije za povirovat.
A kad ti ne viruješ ajde, mandrilo jedno splisko, kušaj joj vazest balun iz justa. Oči će ti izvadit. I nemoj slučajno poć vikat na nju kad uđe u armerun meju robu. To joj je ka kuća, tamo metne balun spavat i utira se kraj njega da mu ko ne smeta. Po po dana tako stoji meju lancunima i intimelama....
Zna san da je ovo ludi grad ali da su i pasi poludili to nisan zna, promrljam onako više za sebe...
Da te više nikad nisan čula da tako govoriš o našoj Li-Lu...nakostreši se moja žena kojoj se sluh izoštrija ka u miša potopira.
Vidin ja da je sve otišlo kvragu i da mi je najbolje poć u kužinu i čagod bacit u kljun i popit žmul crnega. Valjda je punica štogod skužinala ?!
Onda, kako smo - upitan ja ljubazno punicu..:Jema li čakod za čalabrcnit ?
Ajme pušti me na miru, sinko moj - ko bi još sada i na spizu poša mislit. Pa vidiš ti kako nan se bidno dite razbolilo i pati ?
Ma koje sad dite. A kako su Josip i Vjera ?
Ma ne mislin ja na njih vengo na Li-Lu.
A otkad je i ona postala naše dite, rečen neoprezno ?
Bilo bi boje da san je zadavija nego to reka. Prostrili me pogledon i ubode me su njin ka su vrilin mačon, uvriđeno zabaci glavu, digne se i ode..
Oni ti je muž skroz na skroz poludija...čujen je ja di se žali Maji.
Bože mili ma ča san Ti ja skrivija da si me kaštiga s ovakin monadama - upren ja pogled prima gori ali ugledan samo luster i plafon o stana jerbo se iz ove kapunjere na Pujankama. di mi živimo, nebo i ne more vidit....
Uto zazvoni zvono...
Otvorin.
A evo nas, svratile smo malo do naše šjore Vjere - reče šjora File i odma me turne rukon u stranu da propusti gospojicu Dominu da prva ulize u stan. Poza njon uđe ona a ja zanji - ka ča je i red.
Komodajte se, samo se komodajte. Baš lipo ča ste navratili !
Znan ja da bi se uvridija da nismo navratile - pa smo vas došli malo obać. A di je pas ?
Eno je u armerun čuva balun jerbo je infišala da je noseća i da je rodila. Balun joj je ka dite a armerun joj je stan.
A bidna mala ! Eto moja Dome vidiš ča se dešava otkad u spizu stavjadu one kemikalije !
Neće takva spiza u moju kuću, reče ona klimajući oštro glavon ka niki ventilator - s jedne bande na drugu ! A, ne ! Ja ti jin samo verduru iz mojega vrtla i dikod, o blagdani - skuvan svoju kokoš lešo - oli napravin tingul.... odgovori ona s glason ka da je ingleška krajica a ne sirotinja iz Gornjih Mirac na Braču.
Oli jemaš svoje kokoše ?
Nego ču poć jist ove falše ? Naravski da jeman - ponosno će braška gospojica o sto godišć.
Pa je li Vama koji put neka kokoš poludila ?. Namjerno je ja zapitan.
Ma o čega će poludit ? Unese mi se ona u lice. Jidu domaći kukuruz,cili su dan na frišku arju, gredu rano leć, rano se dignedu, nimadu nikakvih briga - Ma o čega bi one mogle poludit ? Nije to ka ovod u grad, dobaci ona s vidnin preziron, di su i judi i beštije već napola ludi, e !
A kad kuvate juvu je li skuvate cilu kokoš oli joj skuvate samo nožicu - jerbo ste Vi, koliko vidin, sami ?...Nimate nikoga da blaguje su Vama ?
Poza tih mojih riči pogleda me ona kroz jedva otvorene oči, zategnutih usana i sva ka spremna za u napad.
Je, jemate prav šjor Marine...kad vidite da nika kokoš na Braču cota joli gre na štake to van je ona moja kokoš ča san joj išćupala nožicu za skuvat juvu oli napravit tingul. Ma je li vi to mene, da izvinete, zajebajate ?
Bože oslobodi gospojice Domina, Bože me oslobodi !
Samo pitan.
Ako oš baš znat, nastavi ona - bija je jedan tvoj splićanin ča je doša živit na Brač jer da je tamo boje i mirnije. A pomalo je i traži štogod poštene žene za oženit se pod stare dane .
I ?
I bija se on namirija na jednu našu zdravu i poštenu susidu kojoj ni on ni bija baš mrzak.
A ča je onda bilo ?
A ča će bit ? Ka i svaki gospodin iz grada - poludija je.
Kako poludija ?
E lipo, On je infiša da je posta kukuruz.
Kukuruz ?
Eto baš kukuruz !
Moš mislit - ova naša domača, zdrava žena omar je pošla u crikvu, izmolila sedan zdravomariji...ali ništa ni pomagalo..I lipo ga špedilo kod dotura za glavu, kod onoga, kako se ono reče - an, psihijatra.
I kaže ti njemu dotur: Ma nisi tu kukuruz !
Jesan, jesan - ponavlja on. I svaki dan za namon trči jedna veeeeelika kokoš i stalno me kjuca. Ono ka zrno po zrno...a ja bižin, bižin, bižin - ma joj nikako ne mogu pobić. Doture moj poludit ću ako se to nastavi. skroz ću poludit !
Je, je - mogli bi Vi poludit...okriče očima dotur pa mu kaže: Ma slušajte me dobro šjor Vicko...jer se on baš tako zva....Vi niste kukuruz, to se Vami samo pričinja. Vi ste kus čovika, jedan šestan gospodin su kapelinon i bagulinon. Ma kakvi kukuruz ?
Ma to i ja mislin, počme se nikako ka rekuperavat šjor Vicko.
Eto vidite. A sad ćete lipo uzet ovu škatulu tableta i svaki će te dan vazest po jednu ujutro a drugu navećer i tako petnajst dana. Pa mi onda dojdite ponovo da Vas vižitan, Vidit će te da će sve bit u redu.
I ode šjor Vicko sritan doma.
Vratija se poza petnajst dan.
Pita ga likar: Ela...Onda lipi moj šjor čovik...Je li sve u redu, Jeste li kapili da Vi niste kukuruz vengo da ste šjor Vicko...da ste judsko čejade ?
Jesan doture moj, jesan - fala Van za sve vike vikov !
Eto vidite, zna san ja da će te se izličit.
Ma doture, zausti šjor Vicko ?
A ča je sad ?
Ma, eto . ja san zbija shvatija da ja nisan kukuruz...ali, doture moj, nisan sigur je li to shvatila i ona kokošetina ča me stalno ganja i kljuca.
A našega dotura deboto strefi kolap poza tih riči.
I ča ste otili reč, zapitan ja ?
A da jednom lud - zauvik lud...zlurado će gospojica Domina.
Znači, nima šanse da Li-Lu ozdravi ?
Jema, jema - ka i šjor Vicko....nadožunta ona pa se udre smijat nikako ka zmija kroza ono par zubiju ča je još jemala u glavu.
A meni krv udrila u temple.
Ma ostavite Vi na miru mojega pasa, jeste li čuli. Da ste čagod vajali bili bi ste se udali - ma Vas niti jedan ni tija jer mu ni tribalo puno da omar vidi kako isprid sebe jema višticu, štringu nad štringama - a ne ženu, ne judsko čejade !
Bilo bi bolje da me ferata satrala vengo da san to reka.
Skoči se ona a za njon odma i šjora File pa udri po meni.
Tiš mene vriđat, čoro čoravi...prajac debeli, lupežu jedan. Ti si od one najgore sorte - od političara. Svi ste vi isti, Znan ja take - počme ona priteči mavat svojin krakatin rukama ka su nikin ticaliman. Od nastale dreke i konfužjuna razbudi se Li-Lu i počme lajat ka luda iz ormara. Dotrči i punica koja je pošla nalit bocun prošeka....Krši ruke i sve govori: Ajme - ovi mi je zet skroz na skroz poludija gori u Zagreb! Žena odma skoči iz banja di se šminkala za izač u grad pa udri i ona: Nisi ni doša a omar u kuću praviš škandale...Dobiš ti svoje po labrnji čin mi svit ode iz kuće...Ma škužajte ljudi, oli ne vidite da je skroz na skroz išempja o politike,,,Ne zna se više ni razgovarat s judima ka normalno čejade !
Uto zazvoni zvono na vratima. U stan uleti moj študent Josip: Šta je ovo, svit se skupja po portunu da je tuča kod nas. Ko će sad o srama izać na ulicu ? A šjora File i gospojica Domina brže-boje biž vanka kroz otvorena vrata i još mi viču sa hodnika na kojemu su se gurali susidi da ću ja tek vidit svoje...da ji maltretiran...da je to mobing - pitaj Gospu ča....A ja, ja san se strovalija na kauč ka matun.
E ljudi moji, nema lipšega nego doć doma u Split poza svih političkih ludorija u Saboru..Onako lipo meju svoj dobri, pametni, mirni, pitomi, zdravi i normalan spliski svit i malo proljudikat s njima prin većere - koja, eto, zaraj Li-Luine lažne trudnoće ovi put nije bila ni skuvana.
Post je objavljen 30.01.2010. u 10:34 sati.