Ujme Isusovo...ma ča je ovo ? Koja je ovo avet o čovika ? Pari mi se, onako na prvu, da je to oni masni Denis Kuljiš - a jopet ka da je uteka iz "Alana Forda" di se oni debeli kriminalac bija vas ocidija...jerbo se utira u onu makinjetu u kojoj se na vrućini paridu bogatunske šinjore ne bi li bile ča lipje svojin bortunima. Ma kako se ono zva...?
Ma ko to ?
Pa oti kriminalac !
Ajte šjora File..ma koja van je to sad luda indeja udrila u glavu ? Ostavite se crtani romani i prestanite ji krest svojeme unuku !
Ma Boga mi živega - sad san ga jemala vidit na televiziju, u one visti o kulture...
Evo vako san se počela trest, reće ona i poćme se treskat gori - doli..... ka da je uvatila prava struja o ko zna koliko volti.
I štaš vidit, Marinko moj šesni, nastavi ona - Ta čunka ti je ista ka od onege Kuljiša, ka ča san ti već rekla. Ma se vas nikako usuka u se - ka da ga višje ne šopaju spizon....ka da je sad uteka ispod noža. Blid ka krpa.
Ma je li moguće ?
Je...je...Pari izlizana štraca...Ali bali isto ka i prin. Same pizdarije.
Ajte šjora File, ma ka da iko tega beduina višje opće obadaje...? Vidite da je poćeja pisat na lancune tekstova. Po narudžbi. Sigurno mu bidnemu ni lako....More bit da je osta prez pinezi pa radi na normu - štanca svoje monade i glumata nikega analitičara oliti priučenog Salamuna....a kažu da nije uspija njanka fakultet finit. To Van je jedan od onih mudraci ča su ji svugdi pune birtije. Znadete onih ča su svoje skule završili na let lampu !
Annnn ! A ko bi reka ? Meni dojde da ga posvojin i držin doma ka kućnega jubimca u kavez. Toliko mi je sladak - razumiš ti mene ?!
Pa ste mene došli zajebavat ?
A da koga ću ! Jesi li čita "Globus" ? Eno te se jopet uvatija ka niki krpej ili, da skužaš, praseća pijavica .
To on meni želi dobro...slabo ste ga Vi razumili...šjora File.
Oho-ho ! Baš si smišan ! Lipo ti kaže da strašiš jude po Splitu....da si u niku konobu osnova Komitet...Da ne daš pametnemu svitu ni da prismrdi u tvoju stranku...jerbo si ka niki arambaša o ajdučke čete - ča je vazeja strićev nadimak..Ukreja mu ratno ime - pa sad arči i banči po gradu s nožon u zubiman.
Ma šjora File..pa vidite da mu triba pomoć. Ka prvo stalno dili Rvacku na dva dila..O Splitu piše ka da je on, Bože me oslobodi - zbilja spličanin...samo zato ča je ovod iša u skule.
Ča je, je...Jedine skule koje je završija završija je baš u Splitu. Ajme - samo da se to ne pročuje .. jerbo kažu da je sad avanca za profešura na nikemu fakultetu u Banju Luku u Repuplici Srpskoj.
Profešur, a ni bi kapac ovod ni fakultet završit...počme se znamenovat šjora File su livon i desnon.
Pa ča onda? Oli ne vidite da se vas napuva ka žabac o umišljene pameti. Je da, za pravo reč, ne zna puno tega, da stalno laže ka pas i da mu je najdraže štancat političke potirnice pa onda judima prodavat muda za bubrige kako su oni boljševici a sam se ponaša ka najboji Berijin učenik - Ali ča se tu more, on Van je od takve race, od takega judskega matrijala s nikon teškon falingon !
A ča si ti, jema bit, njemu sta na žulj, annn ?
Ma jebe se meni za njega i njegove žulje. Posebno one na mozgu !
Pa moga je baranko naučit da Baja ni nadimak od tvojega strica vengo od jedne cile loze Jurjevići iz Veloga Varoša !
Dobro zborite jerbo u Splitu još jema Jurjevići - Pojibaba i Jurjevići - Gradelica a mi smo od Jurjevići - Baja.
Ubila ga velika pamet ! Eno san vidila da je dvi beside napisa i na francuski !
A ča se mene tiće - more i na čerkeskon ! Naroćito onda kad pjuca po Smoji !
A meni ga je isto žaj - ako ništa drugo a ono zaraj dice mu !
Ma ča sad i dicu spominjete ?
Jerbo je i on jedan put bija nečije dite !
Pa naravski da je bija...
Biće se igra su gumenin sloničima i medvidićima...i na franje - a možda je trča i za mantel buvelon
.
A more bit, ma nisan baš siguran. Ali ko je ikad čuja za njega dok nije počeja proganjat jude po fojima ka one naše cure koje je nazva vištican iz Rija.
Sićan se. sićan...ka da mu je sam Goebels direktno citira u lapiš !
Ajde šjora File ostavimo se mi njega - vidite da mu ni laka ako je istina da su ga bacili na dijetu. More bit da mu, zaraj tega, u šufit, u možđane ne dospije dosta kisika - pa mu se bidnemu manta, pa ne zna ni ča radi ni ča piše.
A je, lipi moj...takvima je Kraljevstvo nebesko osigurano ! Ali taj kumplir ovod na zemlji svaki dan čini pakal. More bit da se i ocidija kraj nikega velikega ognja ča ga je naložija pa sad traži nove vištice i višćune ne bi li ji na njemu užga. A biće da se i ocidija od muke ča još nije uvatija niku novu žrtvu ?
Ma pustite ga Vi njegovin mukama. More bit da se čovik ocidija jerbo se uvatija libara - pa uči za koji ispit. Eno, ajmo reč - na Prometnom fakultetu !
Joli Ekonomiji !
Ma ja vidin da je već doktorira za Inkvizitora.
Ajde, ostavite se višje ote spodobe. Popijte Vi bićerin ovega hvarskega prošeke. Ma to je ćista likarija ...rožoljo !
Aj daj !
Šjora File nagne bićerin i ućas ga ispije...stavi ga na stol prekriven kockaston tavajon i nekako sa sjetom u glasu mi, ispod glasa, reće: Marinko moj...ja san ti jedna puno osjetljivo žensko ćejade. Evo sad će mi suza udrit na joko...jerbo ja ti tega Denisa Kuljiša oplakujen.
Nemojte tako - pa čovik je živ živcijat.
Ne govori tako sinko moj - On je živ živcijat ma je ČOVIK u njemu umra...i to odavno !
Post je objavljen 17.09.2009. u 22:23 sati.