Deset i kvarat je navečer....jutros san krenija u Zagreb u pet uri....po putu maglušina od izlaska iz tunela Sv Rok pa do izlaska iz tunela Mala Kapela. Za pozvizdit..Ka u kasnu jesen...A onda opet sunce, vrućina..nika sparina i vlaga ka u Amazonu. S menon je putovala i Maša...Ima još položit na Filozofiji...iako je diplomirala sociologiju. A ko joj je kriv kad oče završit dva faksa !
Blago se njoj...spavala je sve od Splita pa do deset kilometri prid Zagreb...
E ta mladost !
A sad zvrlji telefon.
Ma šta me više ne puste na miru ? Ko je sad ?
A..zovu od kuće.
Marine..Jesi li to ti ?
Nisan..nego pokojni car Hajle Selasije ! A da ko će bit ?
Aj ne zajebaji, nervozno će mi Maja...Evo te došla tražit šjora File !
Pa di u ovu uru ?
Gledala je nešto na televiziju pa se sva infotala..i kaže da te mora ćut. Mislila je da si doma.
Aj daj je !
Ča je lastavico.... tico selico ? Jopet si ništo izumislija samo za ne bit doma, a ? Jesan li pogodila ?
Ma di bi Vi mogli falit ! Pogađate bolje od Nostradamusa. Najboje bi bilo da dignete šator, vežete šudar okolo glave i najdete dikod onu caklenu balotu pa da gatate ljudima sudbinu ! Obogatili bi se ka Krez ! I to učas. Ne bi ste više morali slavat malega da stoji po cili dan u filu za kupit tikete od lota !
Zajebaji ti ote cukune u Saboru a ne mene..Jesi li me razumija ?
Ma niste tribali poč ni govorit...razumija san ja Vas od prve....prije nego ste i zinuli !
Slušaj me dobro...nervozno će ona...Evo san ovi ćas gledala onega Tomca....Došlo mi je za razbit televiziju..Tila san cavatu itnit u nju...ma je skupa !
Ko je skup: Cavata oli televizija ?
Fala Bogu...i cavata je vridnija od te tvoje političke tintare a o televiziji da i ne govorin...Bombizat ću te drito u čelo čin se vratiš...Možda ti to prosvitli pamet...mulac jedan !
Dobro, dobro - Koja je nevoja ?
Ma nije nevoja vengo ludilo..Eto ča !
Ludilo ?
E..ludilo, ludilo. Sve se izokrenilo naopako. Sve je išempjano i svi nas činidu ludima ! Pa i oni tvoj Tomac ?
Moj ?
A da čiji je ? Pa nije meni bija šef toko godin...vengo tebi. I to u sve Partije koje su bile na vlasti okad je on progleda, prooda i progovorija !
Za istinu kazat...Je, bija je masu godin Račanov zaminik, potpridsidnik Sabora, pridsidnik Odbora za Vanjsku politiku u Saboru..Je, je..ča je - je !
A iz čiji redov ?
Iz esdepejskih !
Aha ! Slavodobitno će ona - priko žice...
A di je ija prin vengo ste izumislili esdepe ?
Pa u Savez Komunista !
Bogati a di bi i bija ?
Je se bidan namučija ! Posta je profešur o samoupravljanja na fakultetu Političkih nauk. doktorira je na onemu..kako se onda zva - a, sad san se sitila..Na udruženom radu...Pa je bija, za ne falit - šef Kabineta o Jakova Blaževića....Je, govoridu da mu je i knjige pisa..da se ne mora mućit kad je već Zdrave tu ! Je li istina ?
A biće..kad Vi kažete ! Vi ste ka nika vrsta Salamuna. Živa enciklopedija ! Da niste možda radili u tajne službe ?
Koja ciklopedija ? Ma ko je bija špija ?Jeli ti to mene zajebaješ !
Ma ništa, ništa - Škužajte Šjora File...a ča ste me Vi otili.....?
Da ča ? Otila san... čin ga treviš da mi kažeš drito u čunku da je tri kvarta života živija luštravajući zvizdu petokratku..A sad prkja u najmanju ruku ka da su ga na to prisljavali !
Šjora File, ne reče se petokratka nego petokraka !
Jebe se meni kako se reče...Znan ja dobro o čemu govorin ! A zna i on !
Ma ko ga šljivi...Nisan ga vidija otkad je bija naš kandidat za pridsidnika države.
Eto - i to je bija ! Je lipo omastija brk...a ! A je li još štanca one svoje knige ?
Je...Tu je neumoran !
Znači šuška mu u đepu !
A šuška..šuška...moja šjora File....I to dobro šuška !
Pa se, ka zadnja štraca, usudija poč pjuvat i po Račanu i po svemu u ča se prin kleja !
Je..Tu je bija junak prvega reda..Kad je tribalo navalit na sve ono od čega je dotle živija...a ča je poslin propalo !
A da se ništa ni prominilo i sad bi zvizdija o socijalizmu, komunizmu, radniškoj klasi i marksizmu. Kleja bi se u najcrljeniju zvizdu petokratku na svitu..je li tako ?
Ja mislin da ste pogodili. Bi, bi...Ča više mislin...siguran san da bi !
Pa ti sad pogodi koji je Tomac pravi..Oni od prije oli oni od sada ?
Ja mislin da je on uvik bija isti !
Bogami, Marinko mali - nije ! Ja san uvik bila ista !
A kako to ?
Lipo...Jesan li uvik išla u crikvu ? Jesan...i onda kad je on na take gleda popriko...onako priko oka ! Jesan li ikad bila u Partiju ? Nisan ! I onda kad je on tamo bija velika zvirka....! Jesan li ja bila potpridsidnica esdepeja i sve to ča je on bija ? Bome nisan ! Eto vidiš..a isto san uvik navijala za vas...jer san u životu vidila di je prava strana....ali Bogami i di su govna !
Jo grubi li riči od jene starije žene !
Je li...Sad su to grube riči !? Ma slušaj ti mene...Marinko...Zapamti za cili život jednu stvar..Nikad riči nisu grube vengo dila..Ono ča radiš ! Po temu se zna kaki si čovik, a ne po onemu ča bališ !
Moglo bi se i tako reč...
Nego kako.....Oli ne vidiš da puno njiih jedno bleje a drugo rade. To su ti oni ča su vično na strani onih koji su blizu vatre.. Dok se drugi smrzaje i dok drugi zebe....Oni se griju i da izviniš .... njih se jebe moj tetrjebe...i za raju i za cili svit. Oni uvik isplivaju na površinu...i zato mi se gadidu ! Jerbo uvik samo za svoj interes radidu !
Pa ste me zato pošli zvat u ovu uru ?
Oli san ja znala da si emigrira u Metropolu ?
Ma ko je emigrira ?
A Bogati....ča i ti ne bi ka i drugi otiša blizu oltara..Da malo osluhneš ča govoridu naše glavne političke ćunke. Pa da prineseš i nama, obišnemu svitu, ča to oni mislidu !
A ča će Van to ?
Pa da znamo ča ne triba radit, mono jedna...spliska !
Post je objavljen 08.06.2009. u 22:15 sati.