Bože mi prosti...meni ga je došlo milo !
Ma koga to ?
Pa našega dotura Ivu.....Oli ste čoravi...Oli ne vidite da je čoviku opasno udrilo na živce pa ništo ka bunca i svako malo prez imalo rišpeta svašta bali !
A na ča mislite šjora File ?
Pa i sa vrja Merjana se vidi da mu ni laka...poza ovin ča se desilo sa Glavašon.
Ka da smo mu mi za oto krivi ?
Je...a nego ko ? Eno je i Milanovića ocrnija da je baš on kriv ča je sud donija vaku prisudu osan dani prin lokalnih izbora...jerbo da esdepejci kontroliradu sudove - pa su mu ka namistili trapulu !
Ola cukuna ! Pa jesmo li mi oli hadezejci potamanili sve živo po sudovima i doveli ekipu belu da dili pravdu i nepravdu ?
Pa oni !
I ča ćemo sad ?
Ma ne govorin ja to zaraj tega vengo mi je nika muka...Nikako me vrti u trbuju i cilo mi tilo zadršće ka list na vitru kad vidin pridsidnika o naše vlade kako se muči, upinje i znoji - ka da mu je velika potriba.
Neš ti vlade ?
A kaka je - taka je ! Isto je naša !
Ma nisan baš sigur...jerbo je ono dotur Ive bija reka u Sabor kako on odgovara samo hadezejskin biračima a ne svin grajanima od Rvacke.
Znači meni ne odgovara - jerbo ja za njih niti za nj nikad ne glasujen niti ću jin ikad dat svoj glas !
A more se i tako poč gledat.
More...more..Nego ča da more !
Ali - kad je ono počeja trumbetat po ijaditi put kako će esdepejci legalizirat droge, ukinit vironauk u skulu...i sve one monade ča mu uvik padu na pamet užežin izbora - rekla san sama sebi: Odnija je vrag šalu...Otiša je naš Ive u prdec...ka stari prizrili kupus !
A bome smo i mi rekli da ča ne vazme malo teple kalumele za smirit živce.
Ma, priznat ću van, tila sam mu ja poslat u kuvertu pet-šest kučerini moje domaće kalumele ča je uberen svaki put kad pojden obać svoje na Šoltu...ma san onda rekla sama sebi: Bogati još ćedu me napast da ga kanin, ne daj Bože, otrovat oli drogirat. Znadete kako oni volidu u hadezeju bumbit oni čaj o bunike...! Na đavla bi to još moglo svršit, kažen van ja !
Je..šjora File moja, je..... jemate vi prav...ni se danas poć igrat su otin narodnin likarijama i travaman. Moglo bi se sve krivo razumit ! A di ste onda ?
U pržun !
Ma ajte molin vas lipo - ma ko bi Vas poša zatvorit ? Nisu van više to ona vrimena !
Kako za koga ! Ja se ne bi čudila da zabranidu slavat našin glavešinama i obišnu poštu..Jer furbast je narod...More, ajmo reč - u kuvertu stavit diditija oli kojega drugega otrova..ka ča je mišomor. Pa naš dotur takne slučajno kartu o pisma a poslin lizne prst kad ćita foje - i kud si di si ? Dok si reka keks..posta si anarkišta oli atentator oli išenpjani drogeraš i poludili opozicijonar.
E da je tako...ne bi onda bilo mista u pržunima.
Pa oli ih jema ? Evo puštadu ubice i kriminalce doma na izlete i odmore - a oni onda opet činidu zločine...Ja bi pukla kad to ne bi rekla ! Je li jin i za to kriv Milanović i esdepe ? Je li i ta vist tribala čekat da se objavi tek poza lokalnih izbora i je li to opet nika urota protiv dotura Ive ?
Svašta !
A dašta nego svašta !
Zanamisto da je lipo obaša Split za Svetoga Duju. Da je bija u procesjun i pozdravija se sa judima - njega ni bilo za vidit blizu Splita ni na taj blagdan o našega patrona - Nisi ga moga vidit ni konočalon.
Istini za voju, dobro govorite !
A oli bi mu bila kruna s glave pala da je učinija đir po Merjanu i na Prvega maja...da je lipo doša na prvomajski uranak, ka ča je to uradilo po Splita - i da je blagova fažol s judima. Ma ga ni tu ni bilo za vidit.
A da nije svratija u Veronu na niku operu ?
Ča ja znan..More bit da i je ! Ko bi mu uša u trag ?
A di ste Vi bili ?
Lipo na Zvončac na feštu od splitskega esdepeja. Baranko san cilo jutro guštala čakulat s judima uz pismu i bokun bakalara..jerbo, priznajen - on mi je najslaji o sve spize.
A to je onda bija ka niki stranaški skup ?
Je..pa ča da je ! I ja san za esdepejce....I jemala san priliku dat ruku i Milanoviću i Ostojiću i svima kandidatima o esdepeja za ove gradske izbore. Tako i triba ! Mora se bit sa sviton i slušat ča svit jema za reč..A ne samo da narod sluša političare ! Sto san puti rekla da mi jih je pun kufer...Ali pravin razliku meju njima i jeman prav na to.....I to veliku razliku !
Sve to slušan isprid pekare na Pujankama dok judi u filu čekaju friški kruv.
A ča ti mučiš..najedanput se okrene šjora File...Ča si se incuka ka nika stvar ?
Ča bi ja sad triba poć govorit ?
Ča te voja...Ovod ti nikor ništa neče zamirit. Ni ti ovo Sabor. Ovod je narodna demokracija !
A svi udri u smij...na te njezine riči.
Jeste šerjasti šjora File...Sad bi Vi mene natantali da ja ovod počnen govorit a potla bi me napali da i isprid butige o kruva širin stranašku propagandu i držin pridizborne govorancije.
Vidi ti filozofai berekina jednega! A znaš pivat okolo kako vi nečete politiku u vašu butigu...A, Bogati - onda vodi svoju politiku isprid butige 1
Opet svi udru u smij i počmu begenavat šjori Fili: "Dobro kažete!".."Lipo ste mu to rekli!"..."Nek sad kaže ča jema!"
Vidin ja da će me moja susida uvalit u velike nevoje jerbo se to sve počelo pritvarat u niki politički miting.
Ma judi moji...pokušavan se ja izvuć...Ni vrime ni misto da se sad ovod o politici priča !
Vengo kad će bit ako ni sada vrime...počmu svi u glas vikat.
"A ča kažeš na naše študente, an...?"
Mi jin dajemo punu podršku !
Jebeš podršku - Dajte im lovu ! Začuje se iz sredione file...
A prvo ji izaberite pa ji onda zajebajite...uzme me sad u obranu šjora File.
Prvo je sve zakuvala pa me sad oče škapulat iz nevoje.
Ča bi tili ? Glasate za hadezejce a napadate esdepejce ! Kad ćete doć pameti ? Ko van je skuva ovu papu...pa sad kusate spirine i privrčete po kantama ? A zna se ! Eno su u Meksiko uvatili onu praseću gripu - a mi ćemo crknit i prez nje - a prajci će priživit...jerbo su nan lipo reformirali zdravstvo. Liči bogate ! Slomi kosti sirotinji!
Sve se više žešći moja šjora File...a i judi počinju beštimat, vikat, pritit šakan i praznin najilonskin kesicama....
Odlišno govorite šjora File ! Vas triba u Sabor !
Ostavite se vi Sabora..Ajmo mi prvo prominit ovu splitsku vlast...jerbo sve je to ista pašta ! Triba poć na škatule i onda pamet u glavu -a ne slušat šupje riči naših vladajućih nabiguza koji će du i crnega vraga izumislit samo da bidu izdurali na vlasti još koje godišće ! Ako ostanedu oni na vlasti i vama će ostat ka ča van je i sad...Opet isto...Pa vi birajte ! Niko drugi neće poć za vas mislit....Zašto i jemate svoju glavu ?
Da mislite su njon a ne da na njoj samo nosite španćeru....
Svaka Van besida piva !
Uto stigne oni pekarski kamijoncin sa kruvon i narod navali na vrata o butige...jerbo morate znat da je u ovu butigu kruv nešto ciniji vengo u druge buitige - a narod špara svaku lipu i nije jin teško malo prođirat na klecave noge i čekat, ako triba, po ure oli cilu uru ne bi li platili dvadeset lipa manje. Jerbo takvi je život danas. Kakva politika takve i cine !
Reka bi dotur Ive: "Ola ludega naroda - A ča se gura...Ča ne prićeka boja vrimena dok se u Americi ne stabilizira situacija - pa onda neka gre u spizu? Neka onda jidu ! Ovako samo stvaradu nerede i nepotribne gužve i sve to za dišpet hadezeju ! "
More bit da on i ne zna da je nikima i feta kruva ka krajevski obid - jerbo su ni krivi ni dužni, silom prilika....zaraj ovakve vlasti, spali na to..... ali iz judskog ponosa to neće da priznadu...
I ko to kaže da najžešća droga ne more bit Vlast ?
Niki političari od nje toliko poludidu da izgubidu svaki rišpet i osjećaj za stvarnost i više ne znadu ni di žividu niti kako je onima koji su pod njima.
Zato bunika i nije najgora droga koju duperadu naši vladari.
Post je objavljen 10.05.2009. u 00:57 sati.