Pregled posta

FLORA I FAUNA

Nikakav dan,dosadno ….ajme šta radit danas…….palo mi napamet da bi moga malo cackat po starin stvarima šta su stivane gori na šufitu ( podkrovlju)……to mi cesto padne za ovakvih dana napamet…..ipak spojin ugodno s korisnin,malo se stiva (složi) sve to ca je gori a onda opet pojedini predmeti me vratu lagano u prošlost…….

I evo san danas tako dok san privrca jedan sanduk naletija na jedan stari ……bolje receno prastari album sa samolipivin slicicama ca se skupljalo tamo davnih sedandesetih…..e more bit da ce se kokod i sitit toga albuma i te manije za skupljanjen slicica…….

A je malo ofucana prva stranica,a ca bi vi tili nakon trideset i kusur godin

nismo samo mi dica bili popizdili za tin vec i stariji jerbo su i nagrade ajmo rec za ono vrime bile više neg primamljive: za prvih deset popunjenih albuma dobijala se bicikla,pa onda kompleti tuta i nogometni balun ili košarkaški dres sa balunon za košarku…….a jemali su i fintu oni ca su plasirali taj album sa slicicama-vracali su nazad albume ali sa izbušenin slicicama tako da se iste nebi mogle koristit više puta……..e a da nebi sve bilo jednostavno imali su oni i drugu fintu koja nas je sve ispižđivala do ludila.

Jedna slicica je bila tiskana u tako malon broju da je bilo pravo cudo kad bi je ko dobija.To je bila slicica sa rednin brojen 288. “Pomornik” jeben mu pomornika isusovoga,kako san i radi njega capa seriju i to koju seriju kajiši po nogama i guzici….hahahaha….a e ka sad je kriv pomornik a ne svi đavli šta su bili u meni…..da nisan mirita nebi bija ni capa…..al neka o tomen ce mo malo kasnije.

Evo to je to….jedina stranica na kojoj fali jedna jedina slicica


Interesantno kako pojedine stvari djeluju na naše pancenje i kako ostavljaju vjecni trag u našin memorijama…..da nije bilo toga albuma sa samolipivin slicicama najvjerojatnije nikad nebi ni cuja za tu ticu ,a bogami i za dobar dil drugih životinja i biljaka koje su se tu spominjale.Nije u ono vrime bilo enciklopedija,internet i svih drugih mogucih pomagala kojima danas raspolažemo.

Nego ajmo se mi vratit onemu našemu Pomorniku…..ta tica nalikovala je ,barenko na slikama,obicnon galebu,a tribalo je kupit stotine i stotine onih kesic sa slicicama,pa ako jemaš srice možda si moga dobit i slicicu sa Pomornikon.
O Pomorniku se govorilo sa poštovanjen,ka o nedosegnuton cilju kojemu smo težili a ne nadat se da ces ga dobit bilo je ravno predaji .

Ditinjstvo je bilo doba kad smo imali poštovanje prema visini svojih ciljeva.Svaki pravi cilj bija je dalek,a svaka nada je strpljivo lebdila nad tin ciljen.
Tek kasnije kad smo odrasli,poceli smo najprije druge ,a posli i sebe,okrivljivat za sve neispunjene želje i ciljeve.Upravo zato nijedna ispunjena želja i nijedan ostvareni cilj nece se moc mirit s uzbuđenjem i ispunjenjen ritkih sritnika koji su ka dica dobili slicicu Pomornika…..

A mi drugi ca ga nismo mogli dobit bili smo spremni ucinit sve kako bi tu našu nadu u dostignuce cilja ca više pojacali…….nadu da ce mo ga i mi dobit.

To je ta beštija ca nas je sve onda izluđivala

Ja san ka i sva druga dica bija totalno infetan (zaražen) ton manijon “Flore i faune”….svaki dinar koji bi doša u moju ruku odma bi poceja svrbit dlanove……odma bi se otrcalo do trafike i kupilo par kesic sa slicicama…….koje je to uzbuđenje bilo,napetost ,otvarat te kesice i nadat se da ce upravo u jednon od njih bit ona nesritna slicica ca je jedina falila u albumu.Ka pravi zagoreni kockar polako bi otvara i kibicira u kesicu oce li …oce li…. i normalno posli toga razocarenje…..ni ovi put nije…..

Želja za nedostignutin ciljen bila je sve jaca i jaca,a dinara niodkud za utaženje te svoje gladi za slicicama.

Znan da nebi smija,ali opet a kada ce oni vidit da in fali,kada oni gledaju u kredencu svaki dan i vižitaju jeli in sve na misto ………...po onon mojon dicijon glavi motale su se cudne misli………………

jemali su moji u kredenci ono ka nasiguro spremljeno nike dolore ca je materina svojta s vrimena na vrime slala iz Jamerike…to je bilo ono ka nedaj Bože ako zaškripi,ako zatriba koji šold za poc u Trst robu dici vazet i cakod od onih delicij ca ni bilo kod nas za vazet…..hahahaha oli onu gondolu ca jema balerinu usridi i ca se navije pa se ona vrti uz niko lagano cintaranje nike melodije iznuzra…..hahaha ala ca je naš svit bija manit ( ala posli cu nac koju sliku sa ton gondolon i skenirat….ajme kako me smij svaki put capa kad se tega sitin)…………

otvotin ja onu sridnju veltrinu i lagano privižitan sve kantune …..aha evo ih ,evo dolori…..od svih onih ca su bili u mac ja lagamo prolistan i capan jednu od 100 dolori i ka nije moj posal vratin sve na svoje misto ka ca je i bilo da mater i pape nebi cakod sinjali……

Evo ga mali isjecak iz našega tinela u ono vrime….a tod je i ta neizbježna gondola hhahaha,a tek radio aaaaaa Tesla zadnje cudo tehnike …..a kredenca je to moje misto zlocina

-Dujeeeeeeeee,Dujeeeeeeeeeee…….tarleknija san odma s ulice kompanja,jerboa je sad valjalo nikako ove dolore pritvorit u dinare ……..Dujeeeeeeeee

-Ca je …..ca se dereš…..evo me,ca cu ti…….

-Ala dojdi doli ,jeman ti ništo za pokaza…..nece ti bi krivo i tebi cu dat dil…..

Skala se Duje na ulicu i ja ga odvucen iza kantuna i nako skrivecki iz žepa pokažen ne devize koje san lipo smota…

-Jesi ti popizdija,koji ti je kurac…ubice te pape…..di si iša to dirat…… koji si kurac mislija kad si to vazima…..

-Aj ne pizdi u latu,znaš li ti koliko je ovo dinari aaaa??? znaš li ti koliko se slija more za ovo vazet aaa???? a i svega drugega……..

E sad su Duji oci vec drugacijin svitlon svitlile…..i njemu je zasjala ona manija slija u možđanima…jerbo njemu je falilo pun kurac slicica…..pa je falin te Bože oma skonta da ce u biti vecina završit u njegovon albumu…………

-E Marine,nece nama tit to prominit u turist biro ,tribali bi nac koga starijega…….ajmo ca zvat Ivicu

-Asti gospu onda ce mo morat i njemu cakod dat jer nije ni on pizda da ce nan to mukte ucinit

Dozvali smo nas dva Ivicu i lipo mu nalagano objasnili naš plan….na koji je on odma i prista….iša je snama do turist biroa( ispo pivca lol…da znate di jeonda bija biro) i tamo proda pricu drugarici koja je radial da ga je mater poslala da promine jerbo da ona nima vrimena ……a ova je opet tu pricu popila i zaminila dolore za nama tako drage i potribne dinare.

-Evo van na,prominija san i ako vas ko pita ja neznan ništa o ovemu….vas dva niste normalni…jel znate da van ocevi cili misec radidu za toliko šoldi a vi ce te to spizdit u slicice i druge monade….a evo ja san vazeja zase malo….ode Ivica priko pijace kada nije njegov posal

Jema san uruke šoldi ka nikad dotad,cili svit je bija moj i Dujin…..mogli smo vazet ca nas je god bila volja…..ka prvo oma smo otrcali na mali most u Zelalije u trafiku vazet 2 kutije slicic,e dobro ste procitali cile dvi kutije pune onih kesic sa slicican….a onda u butigu namirit se sa cikoladan i coca-colan….jerbo tribalo je dibnit cukar dok u parku budemo otvarali kesicu po kesicu ……

-Di ce mo Marine? Ocemo ko tebe ilo ko mene na šufit otvarat kesice oli di u đardin….

-Ajmo ca iza brda,u đardin tamo nas nece niko vidi( u parku je oni bunker bija pokriven zemljon u ono vrime pa su cak i stable na njemu resla…za nas dicu to je bilo naše brdo….ajme još se sican one lipe oskoruše šta je tamo resla)

Ekola da bi znali na koli bunker mislin….onda je tamo bilo veliko zemljano brdo i nije niko zna ca je ispod,tek se tamo 76-77 pocelo polako otkopavat

Nimate pojima kojije užitak bija otvarat jednu po jednu onu kesicu ….pomalo stivavat slike u dujin album …..jerbo ka ca je bilo i predpostavit u moj nismo i ovega puta jemali ca petat…..odnija vrag pomornika i onega ca ga je smislija………..
Proveli smo ja i kompanjo dobre 3 ure otvarajuc kesice i guštajuc u cikoladan i sokovin ….bilo je brzo vrime obida pa se valjalo zaputit doma……

E a kad san doša doma tek onda je bilo pravo iznenađenje….falin te bože drugarici iz turist biroa je bilo sumljivo odakle dici 100 dolori pa je ka prava savjesna drugarica tila to rašcistit sama sa sebon da nas nebi nosila na savjesti……a i nije jeon dugo tribalo za doc do moje matere i sve jon lipo u tancine ispricat šta i kako se događalo sa njenih 100 dolori……….

Ni mi mater njanci rici rekla…..a to je i bilo ono najgore…..da me ona nanizala bija bi proša lišo a ovako se cakalo papu da dođe s posla iz Splita……a muko moja koji je to onda tango bija po tinelu……ma koji tango…..sanba rumba I caca-ca sve u jedno………virujte mi nisan moga cilu šeteanu komodno sist na katrigu……….i sad ko jos kaže da se kriminal isplati…….....ovanca san ka nikad u životu a cilj nisan dostiga…..
e baš zato cuvan ovi album do dana današjeg nebi li me sitija na moje dicije promašaje…….pa sad ko još more rec da se nisan odma školova za bit vako dobar politicar hahahahahahaha.





Post je objavljen 15.02.2009. u 21:16 sati.