Bit će ovod svašta, Marinko moj.....Vonjan ja to u zraku ! A nikad se ja oko tega ne privarin..A ne, ne....Ča se tega tiće, ja ti jednostavno ne znan falit. Čin mene poćme srbit ovod na vrij vrija od mojega nosa , evo ovod na ovi njegov špic (i lagano pritisne svojin košćatin prston crveni špic od nosa)... znan da će siguro bit nike barufe. nikega vraga i nevoje, Jeman ja s otin stvarima i te kako iskustva......e, bome jeman !
A to ste Vi, mora bit, ka nika vištica oli baba-gatara....šjora File ?
Pojdi ti zajebavat one svoje mazgune i nabiguze u Sabor a ne mene...jesi li me razumija ? Ovo ti je ka "amen"...Tako i nikako drugovačije.
Dobro kad Vi tako kažete....
Ma ne kažen ja....vengo moj nos ! On to navonja...reće ona i zabaci glavu.... polukružno je okrečući s onin svojin isturenin noson ka s nikon antenon koja vata samo njoj poznate sinjale i nevidljive zvukove.
Bože mi prosti, a da Vi niste infišali da ste radar ? Eno jutros u foje piše kako je prošle godine u Splitu skoro šesdeset ijad čejadi tražilo pomoć na psihijatriju.
Pojdi ti u dotura za glavu, a ne ja ! Sad biš me još ludon proglasija !
Ma nisan tako mislija....
I boje ti je...sinko moj, i boje ti je. Oli ti ne vidiš ča se oko tebe dešava. Hadezejci su se počeli tuć i šaketat meju sobon...i tako sastavjadu one svoje liste za izbore. Pa jučer san to na svoje uši čula na televiziju ! Onda je oni pokreja svoju općinu...Ma oni bivši zastupnik od hadezeja. Pa se oni zalipija s tonobilon u stup o letrike i cilo misto zavija u mrak...a on, mangup, pobiga doma da ne bi mora puvat u balun.....A po vas dan slušan ča Sanader priča..Ćas jedno, ćas drugo.....Pa jesmo u krizi, pa nismo u krizi....A oni drugi...oni Polanćec. Oni ća je ka semafor koji svitli samo na crveno - On, jopet prklja da kako ćemo se škapulat od svih nevoja i da ćemo se razvijat po ovoj i onoj stopi. Te rest ćemo ovoliko, te onoliko...A Sanader isti dan kaže da nećemo...pa opet da očemo. Oni kripni ministar o financija, ča pari mede i ča jedva ulize u svoje odilo - uvirava nas kako nikad boje nismo kontrolirali finansije u državu ....a omar poza tin....kaže da smo ipak u tu vražju recesiju ulizli. Ondak gledan Sabor..Karate se, karate......Vrag bi razumija di smo se strombulali s ovon vlasti. Nosite jin kupus, karote, kruške sa pazara...A svaki komad iz druge zemlje - ma ni jedan iz Rvacke. A oni jopet po svoju...ka da su gluvi, slipi i ebete. Ča si jučer moga kupit štrucu kruva sad moš pola ! I štaš višje poć pričat. Pametnomu dosta. A ne...njima to ništa nije kjaro. Pa se diga oni niki njiov zastupnik i viče: Je, je...ušli smo mi u tu recesiju...ma u krizu nismo ! Ola cukuna da bi li cukuna ! Pa di su otega našli ? I zato ja mislin da svaki od nji jema u Saboru ispod banka čakod ćuturice sa onin čajen od bunike ča jin ga kuva njiov hadezejski vrać....i da svako malo oni gucnu gutjaj iz nje...jerbo nima drugega objašnjenja za ove monade ća radidu i govoridu !
Ola ča ste se navili jutros...šjora File. Laškajte malo. Evo jema pecipali...mašite se....
Ma ni meni do spize...Sita san ti ja svega - ma mi je žaj zaraj onega moga unuka...Ča će bit ako se ovako nastavi ? Morat će partit dikod u svit trbujon za kruvon ! Jer ovi su gori i od peronospore !
Ajme koje crne misli...Snać ćemo se nekako !
Nema tu pomoći od praznih riči, Marinko ! Triba čakod poduzet zaozbijno....i hitno !
Tata...tata...Uleti u ti ćas Vjera. Ajme, žurin se vanka...Čekaju me prije. Daj koju kintu !
Koliko ti triba ?
Aj ne budi škrt...Neš valjda na svoju čer šparat ?
A diš sad, koja je sad priša ?
Ma moran se ništo dogovorit sa Sanjin oko penjanja !
Čekaj Marinko, uključi se šjora File...Ma di ti se to mala gre pentrat ?
A eto je infišala za onin ča se zove slobodno penjanje. Znadete...to su van oni ča se penjedu po klisurama i stinjama onako na ruke....Pa ih jema ovod i u Split. Gredu obišno na Merjan, gori kraj Sv. Jere...oli u Mosor..i penjedu se....treniraju. Radidu viižbe.
A kad učini grubo vrime ?
Onda treniradu i penjedu se u dvorani.
Ujme Isusovo...pa oli je išenpjala ? Ča ne gre na balet ?
A bilo je i tega, moja šjora File...ča mislite da nije. ..Ma ovo je ka jušto po njezinu guštu..Nekako je tu baš našla dbru klapu ! Oni van kasnije gredu u Gorsku službu spašavanja i to....Zbilja su odlišni i za svaku pohvalu !
Tata..tata...Ajme, baš si se sad uvatija čakulat...nervozna je Vjera,,,Daj mi štogod love...već kasnin !
Nema mi druge nego rukon u đep.
Je li ti dosta trijest kuna ?
Ma tata...razrogači oči Vjera...Šta ti je ?
Pedeset ?
Aj daj !
I slušaj me Vjerči da mi više nisi dolazila ovako matat pare..kad su gosti u kuću, jesi li me čula !
Ali ona je već istrčala...Samo se začuja udarac o kućnih vrata i lajanje Li-Lu koja je skakala i pravila monade jer je valjda mislila da će je Vjerči odvest sa sebon dikod u skitnju.
Ola lipe fameje? Moga si i pasa upisat na to pentranje po stinama...doda šjora File i pogleda prima Li-Lu onin svojim pritečin pogledon tako da je bidni pas zacvilija i brže boje uteka u sobu....
Je...je..i mene su moji tetošili ovako...počme ona naglas razmišljat.
Otišla bi jutron u poje. Ako je bilo sriće otac bi me sija na tovara...pa onda lavuraj sve dok zvizdan ne upeće. Nosi vodu. nosi ocu stinje za pravit suvozide, krči lozu. skupjaj grančice.....A nazad odaj za ocon, materon i tovoran na kojega višje nisan mogla sist jerbo bidu na bidnu beštiju uprtili sve ča su jemali i ća su skupili u poju. Još bi sa sebon morala vuć bidun za polivat vrtal.
A ti ? Okrene se ona prima meni.
Ča ja ?
Jesi li ti iša na niki šport. oli ča...?
Ma i ja san radija u poju šjora File. Moju su jemali poje u Poljud...Tamo smo i stali. Najmrže mi je bilo zalivat pome jerbo san mora za sebon vuć onu gumu i pazilo se da se , ne daj Bože, vodon ne polije list o pome....Vengo je tribalo zalivat baš tamo di stabljika ulazi u zemju u jednu ka malu udubinu. I ni se smilo zalivat po suncu. Samo prin vengo sunce izajde. Znači u ranu zoru. A boje je bilo i to nego zalivat pome bidunon i stalno ga odit punit na gustrirnu i teglit za sebon.
Je, je...to ti je bilo puno boje.
A šport ?
Uvik smo jemali kajič. Ja san ga zva Junona. Pa bi š njin iša s klapon na vesla do na Čiovo. Vadili smo periske, grancigule, mušule, pizdice i svakoga drugega đavla. Ronili smo i anfore....E...kad je to bilo ? Jemali smo i bokun jidra o krpe pa bi dikod i jidrili. Inače - sve na vesla. S otim bi smo kaićon obnoć išli na vaterpolo...koji je onda bija za ne virovat popularan. Da popularan ? Mi bi išli na bazen o "Mornara"..iako san ja uvik bija "POŠK"-ovac. Kad bi domaći izgubili suca bidu svakako bacili u more. Nako u robu. U onu bilu monturu...ča su je nosili..ka da su likari. Najžešći su bili navijači sa Skalica. A onda je bila i ona ka banda ča se zvala "Crni Asfalt". Jo koja su to bila vrimena ?
Pa ti je to šport ?
Ma dobro. Svi smo se mi upisali na jidrenje u "Splita" u onu škversku Lučicu. Jidrija san i u kadeta i u "elericu" i u "dragona" ča se zva "Vihor" i jedno je vrime bija prvak od one Jugoslavije - A na jednu hvarsku regatu bija san i na krstašu "Marjan". Pa san bija trča i u ASK-a na sto metri i u štafetu "četri puta sto" ! Trener mi je bija profešur Šolić ča su ga svi zvali Keni.
Ti da si trča ? Takvi trbucijo !
Je, ma nisan uvik jema ovi trbuj isprid sebe....
Ma ke....Bija san mršav ka drača. U to vrime san se upisa i na trubu u Muzičku školu.
Pa i jesi pravo trumbetalo...posprdo će ona.
Pustite Vi. Svira san ja kod pokojnega Edija Radosavljevića.....a solfeđo mi je predavala pokojna Tresić-Pavičić ča bi se morala uspet na bančić za napisat note na ploću...jerbo je bila sva malašna i sitna.
Znači...svi su oni pokojni ?
A jesu...Bog in da pokoj ! To su bili pravi judi "onega" Splita....Znate kako ono piva Maruška Šinković "Ča je bilo tega više ni" ! Kad čujen tu pismu uvik se vas naježurin....
I onda, ča je bilo daje...?
A ča će bit. Prvo kad san vižba trubu svi su susidi stavjali kušine na uši, vezivali vlažne šudare na glavu. Onako na četri uznja...ka u taljanske neoralistišne filmove. Kršili bi du ruke i lupali na vrata o našega stana. Molili bi moju mater: "Šjora Marija, ma recite malemu Marinku da malo prostane trumbetat. Svi ćemo poludit. Ni kokoše višje ne nosidu jaja kad on zatrumbeta"! To jin je bija ka niki ključni argument...Oti kokošji straj. Ukočile bidu se bidne čin bi čule moju trubu.... i sve bi se u njima stislo. Prin bi krepale nego jaje snile dok god ja svirin. A još san jema jednega prijatelja u susidstvi ča se zva Grgas...On je svira klarinet. Pa kad bi doša kod mene i kad bi mi dva udrili svirat - to je bila opća pomutnja. Mater se dobro držala i branila me: "A, neka mali svira! Baš je odlišan! Nimate vi sluha za lipu mužiku!" Ali kad su me deboto napali i izubijali kad san jedan put iša u Muzičku školu su trubon u onu crnu škatulu - vidija san ja da je vrag odnija šalu i da je dug i trnovit put dok se umitnost i umitnici ne počmedu cinit u Splitu. I malo po malo...ferma san svirat. Al san barnko priživija....A i susidi !
Ma ne mogu virovat ! Pa znaš li ti Marinko moj ča bi niki hadezejci dali da si nastavija trumbetat pa da te nikor od tvojih susidi umlatija ? Sve na svitu, eto ča ! Ovako sad trumbetaš njima u Saboru...I to prez trube !
Niste daleko od istine...!
A kako si se počeja debjat ?
Ka prvo..ja san ka deite bija žgoljav i mršav..Pa san, ka i druga takva dica - mora pit ono smrdjivo bakalarevo uje. Ajme gadosti ! Mater bi mi začepila su dva prsta nos a u drugoj ruci držala bi žlicu bakalareva uja. Ćim bi proguca to odvratno uje...bacila bi mi u justa dva bomboncina ka od limuna. Te bonbone s ukusom limuna zvali smo limuncini...Oli bi dobija dva bonbona ča su ji činili o nikega slakoga a uvik su bili u obliku beštija...recimo ribica, pasa oli maški.
I onda ?
Onda jopet ništa ! Nikako se nadebjat...jerbo to bakaalarevo uje ionako nije bilo za otvorit apetit vengo za jačat kosti ! A onda je jedna žena rekla mojoj materi da me triba odnit u Vrliku na frišku arju i dat jedno šest-sedan dana nekoj seljanki da se ranin u njiovu kuću i sa njiovon dicon - i da će mi to otvorit aptetit. I ne budi lina....ode Van moja mater u Vrliku....Tako se dogovorila sa jednon seljankon da me uzme na šest - sedan dana, ka u niki seljaćki sanatorij i da me rani s onin su čime rani i svoju dicu. I tako san ja u Vrlici na friškoj arji, na livadama, zdravoj vodi, domačoj puri i mesu, kupusu i kobasicama posta niko novo čejade. Baren šta se spize tiče. Kad se mater vratila po mene...bija san crven u licu i spreman na borbu sa svim vrstama spize. I, eto...to me nije prošlo ni do dana današnjega. Onda su moji zaključili da san se, mora bit, u Vrlici pridozira s otin friškin zrakon i otin seljaćkin tretmanom otvaranja apetita...i da sad jiden priko svake mire. To nikako ka i oni Obelisk ča je ka malo dite pa u kazan sa onin čarobnin napitkon pa se pridozira i nu mu ga potriba višje pit ! Eto to Van je ta priča..šjora File moja.
Zanimljivo, zanimljivo...zamisli se ona nešto.
A je li tamo bilo još dice ?
Da dice ? Koliko očete. Baranko dice u ta vrimena ni falilo !
E sad je meni ništo palo na pamet. Nisu ti sve matere vodile dicu u tu tvoju Vrliku...jerbo nisu sva dica jemala problem s apetiton niti su sva dica patila od debulece. Jer nike stvari ne mogu, inače, nikako objasnit.
Vidiš, lipi moj...imamo danas lopuža koliko oš. Koliko ti dragi Bog oče ! Koliko te voja ! Toga nan nikako ne fali. Pa san se sto puti mislila ...Ma odakle tin ljudima ta neutaživa žeđ za novcen...za otimanjen tuđeg i za bogaćenjen na tuđemu trudu i na tuđoj grbači ? Ča se njima, bidnima, desilo kad su bili mali ? A mora bit da ništo ipak je...jer i ta gramzivost je bolest.
Ča će te sad izventat ! Ča Van je sad palo na pamet ?
Pa evo ča ? More bit da su njih njiove matere umisto u tu Vrliku odveli u niku banku...i tamo ji ostavjali po cili dan. I tako šest - sedan dan.
Pa ča onda ?
Kako. ča onda ? Pa bidna su se dica infetala...zarazila ! Ali novcen. Ka ća si se ti naguca one kripne vrličke arje...i pridozira se, pa sad ne moš stat jist ! Tako su se i oni pridozirali onon bankarskon arjon i mirison o šoldi.....pa sad bidni ne moredu stat krest i zgrtat lovušu...i to bilo čiju. A najslaje jin je - naravski, vazest tuđu !
Eto objašnjenja !
Kojega ?
A i jesi samo za Vrliku i za puru....tikvane jedan. Pa ta su dica u međuvrimenu naresla. Sad su već odrasli judi. Recimo političari. To su oni ća nas bacijedu u nevoju i ča su priko noći postali bogatuni a do jučer su imali zakrpjene gaće na gujicu. To su ti oni. A kad jin se jedan put... ko zna....zaraj svega, more bit bude išlo i sudit...neš jin moć ništa !
A kako to ? !
Pa lipo, nisu oni krivi ča ji je pridoziralo dok su još bili nevina dičica - pa sad, ajmo reč, nesvisno uzimadu i grabidu tuje di god stignedu.
A to...
Marine moj - još ćedu, na kraju, oni ispast žrtve a jopet ćemo najebat i bit krivi mi, obišni mali svit...ka ča to uvik i bude !
Post je objavljen 31.01.2009. u 12:45 sati.