Ola koje je ludo vrime bilo sinoć u Splitu !
Vitar, kiša...sklizave ulice, gužva od pustih tonobili.....neoprezni pješaci s lumbrelama u rukama skaču priko lokvi i bujica vodurine ča se sliva niz splitske nizbrdice i kalete koje ne mogu popit toliku količinu nebeske tekučine.....
I baš me po takvom vrimenu, naravska stvar, tokalo poč bacit malu i njezinu prijateljicu iz skule do teatra di se dava Držićev "Skup" ! A je san proklinja i Držića i kulturu i teatar...ma mi to ništa nije pomoglo. Ča se mora - mora se! Oče dite u teatar - pa mu ti sad aj objasni kako i žeđ za kulturom jema svoje granice. Je - malo sutra ! Samo se krivi: "Mama! Tata je obeća da će me bacit do u teatar - a sad mu se ne da pa me nagovara da ne gren ! A čeka me prija...!"
Normalno, ka i svaki muškić...i ja odma vas protrnen čim mi dite zazove ženu tužeći se štogod na mene !
Evo sad ću, sad ću......Ma vidi ti lažljivice male ! Ma dobiš trisku pa se moš poć žalit na plavi telefon oli di te volja ! Ma kako samo laže...!
A onda opet ono: Mama ! Mama ! Ovi divljak mi se sad priti !
Vidin ja da ću izgorit nastavin li nagovarat malu da ostane doma i da mi je bolje mućat...pa lipo vazmem lumbrelu u ruke i put pod noge do tonobila...sve, onako, ronjajući šoto voće...sebi u bradu - da me ćer, ili ne daj Bože, žena ne bi čule !
A na Pujankama pakal....Nemoš proć priko ulice. Ma koji slapove o Nijagare ? Sliva se voda...vitar puše, kišurina se zavlači pod lumbrelu a cipele tonedu u lokve vode....Ućas san bija vas mokar ! I sve tako grintajući u sebi nekako se dočepam tonobila....a mala cila sritna ka da je vanka najlipje vrime i taman blaga prolitnja noć. Pa ti sad razumi vlastitu dicu !
Ali pravi pakal me tek ćeka.
Prvo san mora pronać kuću o te njezine prijateljice....a onda se upustit u avanturu vožnje do tetara. Parilo mi se da san u gondulu a ne u tonobil. Cakla se vlažidu..ne vidin boga tebe....Upalin puvanje na teplo...pa na ladno..pa onako ni teplo ni ladno..Ma ne pomaže i ne pomaže. Škiljin ovako čorav..Prilipija san se uz šofer -šajbu toliko da san je deboto noson pritisnija. A one dvi na zadnjen sicu prkljaju... prkljaju, čakulaju, kikotaju se i rugaju..
Ola karuce od auta ! Koja je ovo ramina ! Hi-hi-hi....
A meni se kosa diže na glavi jer mi svitla od drugih auti tučedu u oči i razlivadu se po caklu punon kiše. Parin podmornica. Sve mi se leluja i vozin ni sam ne znan kako...kad odjedan put neki telac iskoči prida me...drito ka kamikaza...s lumbrelom okrenution naopako..
Tija je cukun pritrčat ulicu pa je upa u niku bužu na cesti. Bogaje on i beštima....priti se meni šakon a ja jedva zakočija da ga svega ne speštan ka polpetu....
I tako san nikako, na jedvite jade doša do ispod starog Ajdukovog placa ispod Plinare koje nima već sto godin...iskrca cure koje su naravski krepavale od smija - i otiša doma spuštajući sa neba na zemlju sve ča se moglo spustit....
Jedva san se dočepa portuna....Sa mene sve cidi, cipele, bičve i noge - sve mokro ka da san skoćija sa đige u more...Kosa se zalipila za čelo a lumbrela ka zgaženi jež....
Zazvonin na vrata - a kad se otvoridu jeman ča i vidit: Šjoru Filu !
A ča je Marinko mali....skitamo se i po kiši !?
Ajme da mi je bilo onin retajima o lumbrele opalit posrid čiverice...Ali nikako se suzdržim.
Zdravi bili...šjora File...procidin kroz zube !
Aj ne pričaj nego ulizi i skidaj te postole....uništit ćeš Maji cili palket... Ma vidi ga kakvi je doša doma..A bija bi ti puno mirniji da san ja tebi.....
Molin Vas dobrin Bogon molajte me se ! Ionako san štuf svega !
Ajde..ajde...samo bi se kara !
Ma kako to pričaš sa šjoron Filon...dobaci punica, koja se motala oko špakera. A ona je došla baš zaraj tebe - da te nešto pita.
Mogu i mislit...dodan brže boje i šmugnen u banj da se malo rekuperan.
Kad san doša sebi i skinija mokru robu, osušija kosu i pinku se smirija...dojden u kužinu.
Oš čaja ?
Radije bi malo viskija !
Evo ča ti je čovik od svita - podrugljivo će šjora File. Ne vajaju mu višje ni čaj...a još manje domaća rakija...recimo o rogaći...ča je čista likarija..Vengo se gospodinu guzica otila viskija. Biće to naučija gori u Zagreb u Sabor ?!
Jo...teški li ste šjora File !
Ma kako ne...evo me jedva moš podnit.....Aj ne čini monade vengo popij bićerin onega hvarskog prošeka ča ga držiš u veltrinu...Pa ću ti i ja dat ruku....baš bi mi dobro došlo malo slakoga bibita..jerbo mi je na vrj jezika ka nika jutina !
Aj dobro...Evo dva bićerina prošeka !
A ča san ja ovod...za figuru...Jidno doda moja punica.
Ajme skužajte,,,Daj Majo još jedan bićerin za tvoju mater !
Jeste li svi sad kuntenti ?
A mene niko ništa ne pita ! Ja san ka i zanja rupa na sviralu...umiša se Maja.
Pa ti nisi nikad pila prošek !
A kad me nikad nisi ni pita oču li !
Ajde, dobro - eto ja san kriv za sve...Dajte jedan bićerin i za Maju...
I da znaš da oču !
Aj uzdravje svima ! I strusimo četri bićerina prošeka....
Nego ča ste me tribali šjora File ?
Ništa, ništa...samo san te čula danas na radijo di pričaš o temu kako su vas u Milnu zajebali - pa san tila ćut iz prve ruke o čemu je rič.
Ma zajebali su sami sebe ! Tamo je naime srušena vlast o esdepeja jerbo Je, jedan sa liste o esdepeja, nakon toliko vrimena....ka progleda je - i pobiga na stranu o hadezeja !
A oli je prin bija čorav !
Ma nije. nije - vengo nije ka dobro vidija ča je za njega boje i isplativije. Razumimo se, je li ?
Ma ništa ti ja to ne razumin...Oš reč da vas je izda...?!
A morete i tako reč..Ma ni u tome bit !
Vengo ?
Pa u temu ča to općinsko vijeće o Milne ni zakazalo sjednicu četri miseca a po zakonu ako nimaš sjednicu tri miseca....e, onda te Država raspusti i raspiše nove izbore ili se mekne Povjerenik za tu općinu oli grad.
Pa di sad ? Izbori će svaki ćas !
Nima to veze. E.....zato je taj Sridišnji državni ured mora meknit Povjerenika do novih izbori.
I je li meknijam ?
Ma nije...U temu i je stvar !
A zašto nije?
Triba poć pitat Vladu !
Je...naša si crikvu diš Boga molit !
Ma ni ti sve !
Kako nije !
A lipo !
Naime.....Država mora po zakonu raspustit onu vlast u općini oli gradu koja ne donese proračun na vrime.
Pa jesu li ga ti u Milnu, skupa s tin ča je naglo progleda, donili ?
Ma nisu !
Znači i zaraj tega bi ji tribalo raspustit ! Zarja dvi stvari ?!
E...fala ti Gospe moja..napokon ste kapili ! Tako je ! Baš otako !
Iruda ti...pa oli je naša Vlast popizdila ?
A zašto ?
Pa, Marinko moj...to znači da vlast, da Država ruši samu sebe jerbo ne poštiva svoje zakone. Zakone koje je sama donila !
A nije baš tako. Kad triba sminit esdepeovu vlast onda omar gre sve po zakonu. Omar frcaju glave i raspušta se lokalna vlast !
Ma Boga ti !
Je...je...Sičate li se ono prije par godin kad u Požegu esdepejska vlast nije uspila sazvat sjednicu općinskog vijeća u tri miseca. Omar su sve raspustili i to poslin tri miseca i pet minuti...E..nije se tu dangubilo niti gubilo vrime. Omar je Središnji državni ured reagira !
A ča niste sazvali tu sjednicu ?
Ma jesno ! U temu i je vic ! Desete puti smo je kušali sazvat.
I ča je bilo ?
Svaki put kad bi pridsidnik općiskog vijeća Požege sazva sjednicu onda bi omar od Ministarstva obrane baš za taj dan i za tu uru kad je sazva sjednicu dobija niki poziv - i čovik bi se na njega mora odazvat..I uvik su ga spričili da održi sjednicu.
Ma šta oš reć da se i vojska umišala u to da esdepe pane tamo s vlasti ?
A tumačite Vi to kako Vas je voja - ma je baš ovako bilo !
I kako se sve to finilo ?
A bili su novi izbori i esdepe ji je stuka sa šezdeset posto glasov podrške građani,
An sad se sićan ! Onda je bija pobidija oni vaš Ronko !
Je..je...Jemate dobro pamćenje !
Da dobro !? Odlišno !
Tako je to kad su oni u pitanju...
A znači za opoziciju vridi jedan zakon a za hadeze drugi zakon ?
Meni se pari da je baš tako !
E, Marinko moj.....Ni to dobro ! Ne more se vladat silon ! Slušaj me dobro....
Ma se koji put vlada !
Svaka sila za vrimena ! Nisu bili ludi naši stari kad su to govorili..
Je..To najboje znadete vi mladi..dodan ja,
Aj ne zajebaji...Jema i starijih od mene...naroguši se šjora File.
Znači dobili su vlast u Milnu tako ča je niki politiški slipac ka iznenada progleda. Pa nisu održali četri miseca sjednicu. Pa nisu donili proračun...I Zaraj tega je jasno da bidi tribali bit raspušteni...Ali sridišnja vlast čini kuco i čini se luda !?
Tako nekako !
Jo luda svita! Pa to jin je onda ta partijska država o kojoj toliko sviridu kad lajedu o bivšin vrimenima. Samo ča nećedu sebe da pogledaju u ogledalo, an !
I ja tako mislin...
Oli možda ima niki posebni kalendar za hadezejce pa njijov misec ne dura tzridesetak dana vengo, more bit, sto dana....Pa jin onda ti rokovi još duraju..Još nisu ušli u kontru prima zakonima.....koji su malko drugovačiji za sve druge...a malko posebni samo za nji !
A ča da Van kažen !
Očeš reč da će na Sudu dok su oni na vlasti i partijska knjižica bit važan dokument...jerbo se sudac jema ravnat prima politiškoj pripadnosti a ne prima pravdi ?
Sve mi se čini da bi moglo svršit i na to !
Bidan narod su njima...ako je to tako ! Ma ča oni onda jemadu govorit o korupciji u škverovima.......makinacijama sa zemmjon i imovinom...kad se ovod krade kompletna vlast ! Pa tega nema na cilemu svitu !
Bogami teško da di ima !
Zaš ča Marinko moj..Kad san ka curica išla u skulu, pa poslin kod švori - učili smo i matematiku pa san onda naučila i oni Pitagorin poučak. Bija mi je drag ti Pitagora - ne znan ni sama zašto ! Onda je kasnije bila ona taljanska pisma Pitagora ! Jo ča san je guštala slušat...Ma to su bila vrimena kad je svak sluša San Remo i kad nan se Italija parila Misir
Ma je ovi naš dotur nadmašija Pitagoru !
Vidiš on je uspostavija "Milnaranski poučak". Ma ča je oni "Pitagorin poučak" za ovi hadezejski poučak !? Dičja igra !
Ajte, nemojte sad opet pritirat !
Ma ča pritirat ? Triba oni Primorac ukinit matematiku i sve druge predmete u skulu i ostavit samo jedan jedini predmet....koji bi ja nazvala baš "Milnaranski poučak" - oli kako je dotur Ive pojija demokraciju za ručak !
Oli ste i Vi pošandrcali !
Ma nisan ja pošandrcala, dite moje - nego jebeš ti takvu skulu u koju te uče jedno a u životu je sve drukčije. Ča nan prije to dojde do pameti - to će ji voda prin odniti !
Post je objavljen 15.01.2009. u 08:51 sati.