Marketing
Sritna Nova svima ...
Unatoč svim krizama, blokadama, odbijenicama, štrajkovima, stečajima, pretvorbama, ratovima, tragedijama i komedijama,
* unatoč tome ča Blanka nije osvojila zlatnu medalju u Pekingu 
...
* unatoč tome ča smo na Europeu od baluna ispali od Osmanlija ka u lošemu crtanome horor filmu 
...
* unatoč tome ča su nan Englezi vratili šezdesetiosan puti milo za drago i spustili nas iz oblaci di smo bili sve tamo do Wembleya 
...
* unatoč tome ča su nan vaterpolisti na Olimpijadi pukli ka mijur 
...
* i ka da nan ni dosta športa, dobre vile su čarobnin štapićen od našega Hajduka ka betežnoga subjekta sa desetogodišnjin blokiranin računon učinili lipoticu lipšu od Poljudske, za koju se gracaju igrači i nudu se sami da će doć. Avram Grant je bija samo šlag na torti 
...
* unatoč tome ča smo morali skinit gaće, da ne rečen ZERP, pa nan sad opet i sveudilj dragi susidi J**U mater 
* unatoč tome ča jema mašo mista na parkiralištu u Merkatora, a u Emezete i Getroa nimaš di stavit auto 
...
* unatoč tome ča san mora dva dana pri dočeka Nove u Vatrogasnon domu vratit karte jer mi je umra punac, otac od Zakonite, pa nije red da slavimo 
...
* unatoč tome ča san jutros još bija u piđami kad je velečasni doša napokon blagoslovit kuću a da nije poljubija vrata. Srića da je niki furešti, na ispomoći, pa me ne poznaje, ali zato su ministranti umirli od smija 
* unatoč tome ča ovo pišen pod laganon fibron i začepljenoga nosa, a svi troje šmrčemo surle i trošimo tone papirnati šudariči za useknjivanje noseva 
...
glede i unatoč, glede mede, kako god okreneš,
stiže nam neumoljivo,
minut po minut, najnovija, najlipša, najpametnija, deboto pa ka da je članica EU, njezino kraljevsko visočanstvo
NOVA 2009. GODINA
i neka nan svima bude sritna, jerbo po onome ča su nan već napunili glavu, jema bit da nan ne gine Tango Argentino, volija bi da se varan, ali ...
Pa, dočekajmo je sa pismon, kako i priliči ...
A da će nan tribat sriće , oće, oće, neće bit na odmet, pisala je i Goge Bjondina da se je bolje rodit bez one stvari vengo brez sriće ... 
Post je objavljen 31.12.2008. u 22:23 sati.