Oću u pržun i gotovo !
Ma koji pržun ?
Friga se meni u koji...! U bilo koji....ali oću u pržun !
A ča se desilo ? Zašto bi ste otili u pržun šjora File moja...?
Jerbo mi je prikipilo - Eto zašto !
Evo dovle mi je došlo...izrogači ona svoje oči, sva se nakrivi prima meni i rukon napravi oni brzi indijanski mot ka da jušto ovi ćas nikome siće nožen grlo....
Oli ste, Bože mi prosti, išempjali ? Ajde ne stojte tu na vratima o stana. Uvatit će Vas propuv!..Ulizite...Komodajte se. Oćete li čašu vode i cukra ?
To ti popij, beno jedno....Meni je moj život tako gorak da ga ne more ništa zasladit...a nešmoli ta tvoja voda s cukron. Aj kad si baš navalija...daj bićerin onega hvarskoga prošeka... ako ga svega već nisi počuća....
Ma nisan, nisan...Di bi ja... Evo sad ću omar. Ajde, lipo sidite ovod. Evo van čisti šudar pa se malo otarite ...Eno su van na čelo izbilje kapje o znoja.
Dobro san i živa koliko san se snervala, Marinko moj.
A ča Vas je toliko infotalo..da van fali arje...? Dišete ka na slamku..Sva drćete.
U to stigne bićerin s prošekon i moja dobra šjora File zabaci glavu onako unazad i saspe slatku tekućinu boje krokanta u svoje osušeno grlo...i maklo se strese ka da ju je lagano strefija udar o letrike,
E sad san malo došla sebi....reće ona mirnije.
A Li-Lu se uzlajala i sve trči oko tankih nožic o šjore File i bacije se na leđa ne bi li je moja susida malo poškakjala. pogladila oli pomazila.
Ma šjora File je ne obadaje.
Odjednon se okrene prema pasiću koji se ka bila balota stalno valja i skakuta okolo nje i kreštavin zapovidničkin glason mu pripriti, mašući značajno onin svojin suvin prston : Je li bilo dosta šimijo jedna..da bi li šimijo ! Da mi je znat samo na koga si se uvrgla tako šempjasta ?
Ma di si nabavija ovega makaka.... an Marinko ?
A u Orahovicu !
Nu ti Boga . Lipo tamo ! A nisi moga vazest čagod našega pasića vengo si mora potegnit lipo gori u Panoniju.
Ma koja Vas je sad Panonija spopala šjora File ?
A da ča je to vengo Panonija ' Pusta zemja....ravnica, magluštine...snig i blato..prajci, kulini, kobasice i čvarci. Rakijetina,,,,One njiove tamburice i široke gaće...A da ča je to ?
Ma ko će Van poć sad objašnjavat kad ste Vi onako na svoju...
Ma ča - na svoju ?
A koju to - moju ?
Oli si se ti odreknija svoje Dalmacije, a ? BIćedu te kupili s oton njiovon spizon...Znan te ja tico..nagne se ona prima meni onako priko stola i prostrili me svojim ubojitin pogledon.
Proda bi se ti za bokun buta o janjca oli za pečenu patku...za kiseli kupus su nogican o prajca, za onu njiovu šunku...štatiga ja znan...za one čobance, bljutave ribe iz rike i za par boca bibita ća ga ne moš o gada ni pomirisat !
Ja ovo ne mogu slušat...Oli ste poludili ? Po Vama vridi samo Dalmacija...i niko drugi na cilemu svitu !
A nego ča...! Ala Salamuna ! A ko će dat ovega mora, ove bure i gnjilega juga, ko će dat ovako ludega svita ća ti sve kažu šćeto-neto u brk a ne ka niki šotokucini - ća ti šapjedu i ogovaradu te iza leđa. Ko će dat naše lešade i brujetade....Pa kapju našega crnega ! I neš mi valjda poć mirit onu tamburicu su našon mandolinon...Pa kad zapivadu ne znadu ništa pivat vengo kako gredu onin svojin šorom gori-doli a na kraju se uvik ubacidu kroz ponistru nikoj, kako se ono reče. annnn - snaši u posteju. Misliš ti da njima smeta je li ona cura oli je udata - ili je li čigova zaručnica...Ma ke ! Njih ti ona zima ćapa za možđane pa ne znadu ča činidu - Led jin smrzne krv u žilama i jedino se mogu zgrijat kraj nike ženske...eeee,,,,naučila san ja tu skulu ! I ti bi se tamo nikoj uvalija....Ma špijat ću te ja Maji !
Ma koju sad skulu za Gospu Blaženu...Cili se život niste makli dalje od Šolte, Splita i Čiova i sad mi tu prodajete ka niku pamet od žene ća je vidila po svita....
Pa ča ja jeman putovat po temu svitu ...? More je tu. Umoćin prst u more i eto me..omar san takla tri kvarta od ove zemljine balote..jerbo je višje mora vengo zemje na ovome svitu. E tikvane jedan tikvasti - ma da mi je vidit onega koji ti je da diplomu ! Biće luđi o tebe sto puti ?
Šjora File ostavite me se na miru..Ča ste ono tili ?
Vidi ga Bogati..Odma se štica ! Neš ti prežence...ka, tobože se najidi ona...Pitala san te samo odakle ti ovi pas..jerbo mi se pari ka da je pobiga iz talijanskog Cirkusa...!
Ma kojega sad Cirkusa ? Koji talijanci ? Lipo san Van reka da je iz Orahovice !
Annnn...pa šta omar ne kažeš !
Vidin ja da bacije malo na našega šefa o države Mesića..I on jema bradu i brke...ka i ovi tvoj makako.
Ka prvo to je ženka..kuja...i nije nikakvi makako !
Kuja ?
E...kuja, kuja !
Pa ća onda ! Neš ti !
Danas ti to višje ništa nije važno...vazimju se muški sa muškićen...Žensko su ženskicon...pa ća onda fali da dikod i koji političar ode onako pinku štrambo...Oli ste ,more bit, vi političari nika posebna raca a ne obićan svit.... pa ste umislili da ste uvatili Boga za bradu kad su vas ovi cukuni od glasaća izabrali da palamudite tamo u Sabor oli u Vladu.
Dobro...dobro....skroz ste me sad smantali..Ča ste ono bili vikali da očete u pržun ?
Nego ča.. da oču !
A more li se znat zašto !
Jerbo san ja jedna duševna žena !
Nisan zna,,,,
E sad znaš !
Lipo san se dogovorila s par moji prijatejica da gremo u demonštracjune !
Ma nemojte mi reč ..A kontra koga ?
Kontra Mate !
Kojega sad Mate ?
Mate pijančine...Sa šestoga poda ! Ka prvo...proširija se na taracu koja je vlasništvo od sviju nas...i kad sam mu išla prigovorit...reka mi je da mu mogu puvat u gujicu...i još da će me smirit šakon posrid čela !
Ma je li moguće ?
Je.,,je. Ma ne zna on s kin se uvatija ? Su kin jema posla ! Bilo bi mu boje da je zmiju šarulju stavija oko vrata vengo da je mene uvridija...Krvi ću mu se napit...pripriti se ona šakon - baš ka da Mate stoji prida njon !
Šjora File..ma šta ja to čujen ! A di Van je kršćanski duh? Di Van je milosrđe !
Pokazat ću mu ja di mi je...Vidit če on Boga svoga...Ja mu kažen. Zavitovala san se da ću mu se osvetit. Iman svoju kumpaniju od mojih žena koje mi daju skroz za prav. I njima se već popeja na vr glave ! Otkad ga je izabralo za onega ća vodi brigu o našen portunu - umislija je da je i on niki prišidente. U najmanju ruku ka niki naš kućni Sanader ! A lip mu je uzor...nima šta. Gleda nas sve s visoka..ka da je popija cilu pamet od ovega svita, One pare ča kupimo za pričuvu arči na sebe i svoju familiju. Misli on da ja nisan vidila kako mu je gospoja kupila novi kapot a mali nove Starkice. A oklen...Marinko moj - oklen ? I onda značajno zaključi: Od naših para ! Od zajednićke pričuve...A vrata o portuna su razbijena..Jedan lift ne radi...Sandučići o pošte razvaljeni...Ma jebe se njega...Oda ka mafijozo okolo i još mi se priti...
A onda je najboje sazvat sastanak o sviju stanari...šjora File moja !
Ma koji sastanak, cukune jedan. Nije ti ovo samoupravljanje!..A onda če potiho: Ma jeman ja svoju udarnu grupu....Pridvećer gremo s tečama. tavama i lazanjurima prid njegova vrata o stana u demonštracjune...A kad izajde, kad ga namamimo bukon i drekon...dobit će onda po čiverici, ja mu kažen..Vidit će sve zvizde ovega svita...a još i koju za žuntu . Krvopija jedna lopovska. Dosta je nama otih kućnih kapitalisti, gansteri i uzurpatora ! Dižen revoluciju potlaćeni stanara o našega portuna ! Gren u pokret otpora !
Pa ča ste meni došli ?
Da ča ?
Prvo da ti kažen da stojiš kuco i da se ne mišaš ! Eto zato !
Pa nisan lud....
A nikad se ne zna...Vi političari ste prilivode i veliki floćaduri..Ni van za virovat....
A dobro...
Ma nije samo to....Još ćeš mi učinit jednu jubav,,,
A šta sad ?
Lipo ćeš posvidoćit , tamo di bude tribat, kako mi je pritija i kako mi je reka da će me udrit šakon u glavu i nogon u gujicu, kako me tija tuć i još da mi je reka kako san stara kurba !
Ajme ne govorite svašta šjora File ! Svašta ste tu nakitili !
Ajde ne glumataj mi sad Gospu od cukra ! Samo ti reci kako san te i svitovala....
Jer...mene ćedu prvo..ka pravega teroristu, odvest u pržun na ispitivanje...Onda ću jin ja sve reć kako san ti ispričala....Oni buzdovan Mate će me tužit da san ja njega su mojon ženskon družinon naprobijala. A ja san se već dogovorila sa šjoron Katon..Znaš onon cotavon ča uvik oda s bagulinon....da me dobro opaući s otin njezinim šćapon po kostima..Tako da mi ostane lipa modrica. E sad me slušaj dobro...Ja ču reć da je on mene ovako bidnu i staru naprobiva a tiš bit ka moj, kako se to lipo reče, krunski svidok !
Pa di ste mene našli ....?
A da koga ću vazest za svidoka vengo tebe. Da napokon i ja jeman nike koristi od vas političara. Ionako ste za ništa....Jedino van na sudu viruju !
A šta ću ja...?
Tiš sve reč kako san ti kazala pa ću ja onda onega mazguna Matu lipo tužit za tjelesne a još višje za duševne boli.... koje san pripatila...Jer, sinko moj, tilo se da izličit - ma duša teško oli nikad !
Neću Van ja poć lagat za sve šolde ovega svita...!
Ma vidi ti njjega. A ko ti je spominja šolde ? Taman posla da ti još platin za to štaš mi bit svidok ? Malo si dosad diga pinez gori u Sabor pa bi sad otima i od ove moje mižerje ća ću ja uvatit na sudu radi patnji moga tila i duše. Ma Bogati...već ti je omililo a nisi ni počeja vodit pravu politiku. Još bi ti, da je pravde, meni mora platit ...jer ti je ovo ka niki besplatni nauk, skula. Ja san tebi meštrovica o veliki životnih tajni a ti si još u pelenan ča se mene tiće....muktašu jedan !
Vdin ja da je sve otišlo naopako i da ću se teško izvuć iz ovega kupusa...pa se cili nekako snuždin i nalijen sebi bićerin prošeka ne bi li malo lakše pribrodija ovu kompliciranu situaciju.
I normalmno, odmah začujen oni poznati glas: Vidi ti vidi kavalira...Uliva sebi a ne bi nalija kapju jednoj napaćenoj ženi u ozbiljnim godinama...i namigne mi šerjasto.
Ja joj ulijen a ona, ka i uvik...samo saspe prošek u grlo...Pogleda u bićerin s nekim posebnim sažaljenjem i tugom...ka da žali šta nije izumljen malo veći bićerin i doda:
Ajde..ča si se tu cili uvuka u se...Pa valjda i šjora File jema prav da ćagod uvati na svoju pritrpljenu bol...na svoju ranjenu dušu...a ne samo onaj dotur Andrija. Ja ionako neću nikad bit ministrica, niti ću ulist u Sabor a bome niti ću se poć operirat dikod vanka.
Svu svoju bol potrošit ću ovod...u našu Rvacku !
Post je objavljen 08.12.2008. u 22:46 sati.