Taman sam uša u svoj podstanarski zagrebački stan kad zazvrlji telefon.
Dignem slušalicu...
Marinko je si li ariva ?
Je si li gori ? - začujen priko žice treperavi glas moje splitske suside šjore File.
Normalno da jesan !
A da sa kim bi sad razgovarali da nisan...?!
Aj ne pizdi...Baš mi sad tribaju te tvoje mudrolije....grubo me prekine.
Borša mi je još bila onako priko ramena, stavjena po kurirsku ili ka po pošćersku, pa san se cili uzvrpoljija ne bi li je nekako skinija...jerbo me ona tiraka o borše počela opasno žuljat...a rame gorit ka živa vatra...
Ma ča se ti gori muvaš i koprcaš...Dovde te čujen ? A ? Oli jemaš ćakod šinjore u ruke...pripriti već pomalo ljutitin glason šjora File ?
Je...jeman Ćire Irudove...a ne šinjoru...Evo san se cili zapleja u ovu ricastu žicu o telefona jerbo oću skinit boršu sa ramena. Piza ka da su mi blokete metnili u nju !
Ostavi se sad borše i slušaj vamo....
Jel me ćuješ ?
Ma ćujen...Ko vas ne bi ćuja kad toliko vićete....? Deboto Van telefon ni ne triba...samo odite do na ponistru i vićite a ja ću Vas ovod na Trešnjevku ćut bolje nego priko telefona....
Zajebaji ti nikoga drugega a ne mene..Dat ću ti jednu iza uva ćin se vratiš...Tiš mene poć odgovarat ! Ma je si li ga vidija...Diga repicu pospodin političar...Uvatija kofidencu čin je uliza u Zagreb...A štaš... mi smo sitna riba za tebe !
Ajme meni majko moja...Ostavite se sad tih litanija ! Ča Van triba ?
Ma sad bi ti zaklopila ovu slušalicu u ćunku samo da mi ni potriba...da znaš...tovare jedan, da bi li tovare !
Vidin ja da su mojoj šjori Fili molali živci pa joj poćnen begenavat:
Ma ne jidite se šjora File moja dobra...Malo san nervožast...Evo san vozija cilo jutro i to priko Like, staron ceston..jer san jema nikega posla u Korenicu..Još san cili žgincan o puta...Sve me kosti bolidu..Kićma mi se iskrivila a rame me žiga da ne more gore...Ajde smirite se i lipo mi recite koja Van je potriba...
Aj dobro...al da znaš da si me svu skonšuma s otin tvojin ričetinama i zajebancijon..A stvar ni o zajebancije...E, nego ča ! Značajno zaključi ona.
Dobro..dobro. Recite !
Ma evo - triba bi otić do onega Ministra o zdravja i prvo mu petat roge u oči a onda mu opalit trisku...ali onako juski..da cili naboti i da se zacrljeni ka kuvani rak !
Ma ča je Vama ?
Samo ti mene pušti da ja dovršin....
Ka prvo tako ćemo se ispalcit nas dvojica...pa ću ti ja oprostit onu trisku koju ti jeman dat ćin se pojaviš ovod na Pujanke potla zasidanja tega vašega Sabora.
Ma ča....
Muči kad san rekla !
Je san li ti obećala dat trisku ? Jesan ! Oćemo li se ispalcit ako ti trisneš onega Ministra o zdravja ? Očemo ! I ča se tu jema višje dodat ? A ništa ! Stvar je jasnija da jasnija i ne more bit....Takoš mi vratit dug i mir - mir do neba...Ispalcili smo se ! Eto ti ga na ! To ti je ka tržište o triski....Opraštan ti dug o triske ako je ti zalipiš onemu, kako se ono zove - a Milinoviću ! Kjaro ?
Ma šta kjaro ! Ne razumin Vas njanka jednu besidu ! Pa nisan ja tučar da se pođen đapat su ministrima zaraj tega ča je Vama udrilo jugo u glavu...E, bome !
Ma koje jugo...tikvane tikvasti ! Ka prvo - ovod puše bure i nikad nisan bila bistrije glave nego ča san danas ! Jemaš ga maznit i basta ! Oli tebe ćekaju dvi - a ne jedna triska ! Pa sad biraj !
A ča je sad ovo ?
A ništa...skoćila cina triskama na tržištu...Promina na burzi o triski... Ako ne daš jednu trisku Milinovići dobiješ dvi od mene kad se vratiš doma...I to kakve dvi triske !!!
Vi bi mene u pržun !
Tebe...Ma ko tebe more u pržun ? Pa ti si narodni zastupnik ! Zaštićen si boje nego lički medvidi. A jeste bogami vi zastupnici naše najveće nacionalno blago.....Nima šta ! Ma ste malo ka betežni u glavu....kad triba štitit malega čovika..Ali kad su vaši interesi u pitanju - Bogami omar se nikako ka propametite, nikako van boje gre....
Očete reć da su političari kurbe ?
Bože mi prosti...ma ča to govoriš. Pa jema kurbi ča ji je gola nevoja natirala na ti posal. Ma da mi je znat ča je Vas natiralo da nas ovako driblate....ka pravi fuzbaleri. Ma jemate i prav ! Narod je kriv...Ča ne pazi koga šaje u Sabor i kome daje vlast u Državu ! Bože oslobodi....Gladna želuca, prazna trbuja...a spreman je najist se vaših praznih i niskokalorićnih riči i frazetina...
U to nekako stresen onu torbu sa ramena pa ispustim uzdah olakšanja...
A ča pušeš...? Bićen ti dosadila, a ? Biće misliš: Ma ča ova mlije ? Neka gre kraguc ona i njene beside ? Bićeš mislit da san inšepjana stara žena..jeli ti gori, ćuješ li me...? - zapriti opet ona...
Čujen. čujen...Već san Van reka da Vas i pridobro čujen..A očete li mi reć zašto bi ja triba trisnit ministra o zdravja...?
Da zašto ? I još pitaš...nesrićo jedna nesriknja...! Da jemaš čagod u tu čoravu glavu i sam bi zna....
Zato jerbo je laživac lažjivi...a druge vridja i maže oči cilemu narodu...Eto zašto !
A zato !
Je...znan ja... Po tebi je to ka mali grij..Navikli se vi političari lagat..pa van lažjivci paridu normalna stvar...Vi bi pali na gujicu da niki ministar ne laže..je li ?
Znan ja šjora File...!
Aj muči ! Ne znaš ti ni po mise ! Ja se ovod patin po likarima...Cilu san familju bacila na kolina jerbo trošidu na medikamente za mene...Moradu me vodit kod privatnih likari jerbo ću umrit dok dojden na red za vižitat se kod državnega likara...A on, muzuvir jedan, svaki put u Sabor ponavja da kako su to laži...da kako nikad ni bilo boje...da kako su liste ćekanja manje nego za poć kupit kruv...da kako smo najboji na cilemu svitu....da kako su dugovi u zdravstvu sve manji..da kako Socijalno sve pokriva...i tako uvik ista te ista litanija....Ma puna mi ga je kapa..Marinko moj ! More bit da je on u nekoj vrsti nesvisti - pa bi ga tribalo trisnit da dojde sebi. More bit da bi mu to pomoglo ? A kako ja niman niti za platit biljet o ferate do u Zagreb..... a ti ga vidiš svako malo - ma prilipi mu jednu u moje ime, Bog ti da zdravje i sriću sinko moj !
Ali on je ministar !
Neš ti...Sad da je i sam pokojni car Franjo Josip 1
Pa di ste se sad njega sitili ?
Je, je...baš san se njega sitila. I sve više ćemo se sićat onih od prije - kad ka ništa ni vajalo...ma je život bija jeftiniji, lipji i mirniji a ljudi su bili kuntenti i prez ovih gansteri po ulicama ...ća nas ubijedu ka ća smo mi u mladosti stinjama tukli repce oli su nan momci za Božić na Cirkus gađali papirnate ruže su zraćnon puškon !
E di su ta vrimena ?...ćujen je di sjetno izgovara tamo s druge strane linije...
A njima nikor ne vaja ! A ne ! Oni su ka pravi puvanderi obećavali brda i doline...Vriće šoldi...A sad ne mogu nać ni one škverske dolore ! Ma su se braća dobro fudrala..Ulizli su u skupe veštite i najboje tonobile. Pokupovali vile su bazenima u najbojin gradskin kvartovima. Da im se dica ne mišadu s dicom pobasjega svita, Gredu u Alpe na skijanje. Ne vajadu in naše planine ! Vozikaju se jahturinan i svaki je od njih meknija crne očale na nos. Da ne bi falili od koje su race i čin se bavidu !
To van je kapitalizam šjora File moja...
Pusti ti sad te priče. Jemala san ja rodbine u Jamerike...Ni in bila laka..Bog in da pokoj. Radili su ka pasi - za priživit. Ma ko se moga obogatit prez rada ? Samo lopuže i kriminalci, e !
Šjora File moja...evo razgovaramo već uru vrimena. Priša mi je. Jeman sastanak.
A je, bila bi velika šćeta da se ne najdete većeras dikod na janjetinu !
Ma ke janjetina ? Moramo se dogovorit oko Sabora...
E...mogu mislit ća će te sad smislit...zaleti se ona pa odma ferma...i doda nekako stišavajući glas:
Marinko moj, dobro je da ste tražili da oni Sanader gre ća...I on i cila mu klapa ! Ma nemojte u temu popustit. Govorite ! Stalno govorite ! Nemojte molat. Judima ipak nije sve isto ! Stalo jin je da čuju ono ča i oni mislidu...ma o straja ne smidu to reć. Vole oni ćut koju pravu...! Zato, ne dajte in gušta...! Jesu izvarali sve živo i puno njih bi sad nogu sebi pojilo od muke - jerbo su glasali za njih...Ali i zaraj njih govorite. Svak more falit ! To je judski ! Ma ovi nan to rade namjerno...Nisu oni falili...nego baš to oćedu. To jin je plan ! A kad se malo ka pitomije ponašaju - to samo znači da su prišli svaku miru i da su sad od velike potribe za bilo čijon pomoći. Pa i vašon. Pomognite narodu a ne njima ! Jesi li me razumija !
Ma jesan. šjora File....
I još nešto..Smislila san ja kako ćemo vratit državni dug ča su ga ovi mangupi nabili narodu na kosti !
A kako ?
A lipo?
Evo ovako.
Triba cilu Vladu skupa s hadezejom kupit po onoj cini koliko oni zaista vrididu a onda ji lipo prodat po onoj cini za koju oni mislidu da vrididu !
Ola koja bi to zarada bila ! Omar bi vratili sve dugove i još bi nan priteklo !
Lipo ste to Vi smislili moja šjora File...Ma ko će nać tako glupega kupca ?
Znan ja i to...Znan komu ji triba prodat !
A komu ?
Pa njiovin biračima, mono jedna da bi li mono !
Opet vriđate šjora File !
Ma razumija si ti mene Marinko moj, dobro razumija,,,!!!!
I zaklopi mi slušalicu tamo s druge strane, a ja zamišljen sidnen na kauć...krcat teških misli !
Post je objavljen 27.10.2008. u 15:34 sati.