Marine moj a ča je ovo, za ime Boga ?
Pa i dicu su nan počeli ubijat po ulican... a eno su nikidan u Sabor i ministar o policjoti i svi mu oni pomoćnici, savitnici i druge glavonje...uglas pivali kako je u Rvacku stanje puno boje nego ča je ikad bilo,,,da nikad nismo bili sigurniji !
Pa ko je ovod lud, Marinko moj ?
Doklen ćemo ovo trpit ?
U oči nan lažedu ? Čuješ li me...u oči !
Tako me još sa vrata zasula paljbom moja susida šjora File koja je dotrčala ćim je na radijo čula kako su jutros u Zagrebu ubijene dvi cure....i to usrid grada, deboto isprid nosa o policije.
Ajde ulizite šjora File i kalmajte...Strefit će Vas čagod pa di ste onda...?
Ma neka me vazme dragi Bog samo da višje ovo ne trpin...Ovo zajebavanje sviju nas..Ne mogu, sinko moj. njanka višje o gada televiziju užgat. Štufa san svega...Svega mi je priko glave...reće ona nikako nevoljno...sidajući na kauč i brišući šudaron znoj sa čela....
Očete li ćašu vode...šjora File ?
Odjedanput me probode svojin oštrin pogledom onako ka da me vatrena strilica pogodila tošno meju oči.
Ma tija san reč..ovaj....Oćete li bićerin ladnog prošeka sa feton o limuna...
Ajde, ajde more...kad si navalija, brzo odgovori ona i nikako se nasloni na stražnji dil o kauća ...ka da će ovi sekund past u afan....
Ajde skoći se Marine...vidiš da je šjori Fili pa život...uznemireno me požuri moja punica.
Brzo joj nalijen bićerin hvarskoga prošeka i metnen fetu limuna sa Čiova..ča mi ga punica sadi i ničin ne šprica...tako da je on sam po sebi ka nika najveća likarija koju jemamo u našu kuću.
A je li Van boje, šjora File.... ljubazno će moja punica..kad šjora File na iskap saspe prošek u justa ?
Je li limun dobar, a... ?
Ma koji limun....? Zablene se u nju šjora File.
Pa oti moj sa Čiova...ka sramežljivo spuštajući pogled, skoro šapćući...doda moja punica...
A je, je...kako da ne. Ma nima do domaćeg limuna. A ne oni iz Tunguzije..ili oklen ji već uvozidu...ča ji štrcadu su otrovima, pesticidima i falšn piturama da izgledaju ka na sliku...A kad ga pojiš, samo se izvrneš na leđa i moš odma poć na Firule da ti ispumpaju trbuj....
Aj Marinko, nalij ti meni još jedan bićerin prošeka...sva nikako dršćen i ni mi baš najboje....a onda brže bolje doda: A limuna mi višje ne moraš stavjat jerbo je ova feta ča si mi je da tako dobra da more izdurat još za pet bićerini prošeka...!
A moja se punica cila rastopila od sriće na te šjora Filine riči .
Nego..ča san tila ono reč ? Aha.....Slušaj ti mene mali....Ne daj se višje zajebavat, jesi li me razumija ?
Drugi put kad dojde Sanader u Sabor...pitaj ti njega oče li familjama ovih bidnih cura sad odnit svoje statistike i analize...i objasnit jin da i nije tako loše stanje o sigurnosti kod nas. Oče li jin reč....da mogu podilit zadovolstvo ča je tako...skupa sa onin Rončevićon i svin mu meštrima o statistike ča ji jema ? To ga ti pitaj !
Je li njima važniji papitr oli su jin važniji ljudi ?
Pa već san ja...
Ma muda Marjanova si ti....Ništa ti nisi ! Jema da tamo grmiš ka da tučeš iz svi kaluni !
Ma....
Pusti me da govorin i ne upadaj mi u rič !
Ajde, neka...samo se Vi komodajte.
Matere o straja višje dicu ne puštadu na ulicu. U školan je ka u Paklu. Ne tućedu samo dicu vengo i meštre i meštrovice. Ovo je živi teror...Teror, Marinko moj. Ovo je džungla na asfaltu !
A je..to je bija jedan film !
Je...ma ovo višje nije film nego stvarnost. Strašna stvarnost, Marinko moj ! A ko su glavni glumci ? Ko je režiser ?
A šta ja znan ?
Oš..da ti ja kažen...Oš li ?
Ma ne morate...znan ja šta Vi mislite šjora File....Znan !
Sve mi se ovo gadi..reče ona i napravi facu ka da će povratit. Di su ona vrimena kad si ka ljudsko čeljade moga mirno učinit đir usrid lita po gradu...bez straja i prez drćanja...jesu li ti dica došla doma živa i oće li ti kogod razbit tintaru !?
Nastade muk....
Šjora File uzdahne i tiho nastavi: Sve ti je za ovo kriva vražja politika, sinko moj. Eno je ministar o policije u Londonu.
Znan...
Otiša on pokazivat svoje statistike - kako nan je u Rvacku sigurno da sigurnije ne more bit. I ča ti misliš...Oče li on sad dat ostavku.....?
Neće !
Pa naravski da neće...jerbo ostavku nije da ni Vukelić zaraj škverske afere..pa neće ni ovi zaraj ubijenih cura. I jedan i drugi govoridu kako su radili da boje nisu ni mogli...Nego je oporba zločesta pa jin pripetaje i ono čega nima. Izumišlja, samo da jin napakosti...
Je, uvik nekako škivaju...izvuku se...
Eno ga Sanader kaže da je omar zva Rončevića da se vrati doma iz Londona. A ja mislin da je boje da je on u Englešku vengo da je doma. More bit da bi ji sve tribalo poslat vanka. Cili vladu...i to ča dalje. I da tamo ostanedu ča dulje. Onda bi nan..sigurna san bilo bolje. Možda bi se onda i obraćunali s oton mafijon i ubojicama ča mirno žividu oko nas dok vas pošten svit dršće o straja.
Ali....
Ajde, ne govori ništa....zaklinjen te dobrin Bogom ! Pa curu su ubili jušto isprid prve policijske stanice u Zagrebu. Smijedu nan se...smijedu! A Sanader poručuje..onako ka pravi šef....kako tribamo napokon obračunat s mafijom. Ma ko bi reka ? Dobro se i sitija !
Ma dala bi mu ja mafiju...dala...ne boj se !
A ča je do sad govorija ! Da izumišljate svi vi ča ga kritizirate....Da ste đelozi na njegove velebne svitske i domaće uspihe....Da mi živimo mirno i spokojno ka u bumbaku....Da nan nije ovo ono bivše vrime....Da je dosta njemu provokatori i nostalgičari....Komunjara ča huškadu narod !
Je...i meni je svašta izgovorija u Saboru kad san ono bija spominja škver...Ne bi pas s malon to izija kojin se ričetinama ita...
I opet će ti, sunce moje šesno, svašta izgovorit samo ako mu spomeneš pineze. A na to je jako osjetljiv. Ča se šoldi tiče - toliko ji on ne voli da kad mu ji spomeneš omar popizdi, poludi, vas pocrveni, izgubi busulu i počme se poanašat ka splitski uličar i getanin a ne ka prešidente o rvacke valde.
Samo mu šolde ne spominji Marinko moj...! Ali zato on vata teške kriminalce ča su navodno vazeli kil narizana pršuta na fakultetu nakon ispita....A one ča lomidu kosti judima, s onin baturicama i toljagama o bejzbola, usrid Zagreba...a to ništa, to će trajat miljun godin...to ni važno !
Jemate prav..
Pa naravski...A jesi li čuja onega novinara Miljuša ča su ga bili naprobivali ? Javija se iz Amerike i kaže da je ovo poruka advokatu Hodaku ! Ma zamisli.....Pa di smo mi to ? Čikago je sanatorij za nas. Al Kapone bi kod nas bija šegrt...Šegrt Hlapić a ne gazda ! I da znaš jesan nostalgićna za onin vrimenon kada nisan o straja drčala oće li mi se unuk vratit živ kad pojde s drugon dicon u grad. A sad nikor u kuću oka ne more sklopit dok se svi navećer ne pribrojimo da neko ne fali...da nekoga nije umlatilo, ubilo, oli zgazilo auton na trotuaru.
Živimo ka u pržunu ! Izlazimo samo kad je juta potriba.
Mi živimo zatvoreni ka kriminalci a kriminalci planduju na slobodi i smijedu nan se... jerbo oni vladaju sa svima nama.
Očete još jedan bićerin...?
Ma neću... napit ćeš me ! A to bi ti tija, mangupe jedan....pripriti mi ona svojim tankim žgoljavim prstom...ali odma doda: Ma aj daj...kad si navalija...Sve je ionako crna zemlja !
Nalijen joj još malo slatkoga prošeka..
A je dobar....!
Nego di san ono stala ?
Aaa !
I slušaj me ti političaru...reče ona gledajući priko kristalne čašice o bićerina dok je ispijala gutljaj prošeka: Rekla san ti da je ovod u nas došla ka nika džungla na asfaltu. Sičan se ja i tega filma kojega san gledala.... pitaj Boga naza koliko godišć....Ako je ovod u nas džungla onda se triba ponašat ka u džunglu... ako misliš ostat živ. Oli minjat džunglu. Te divjake i vucibatine, lopuže i bandite triba povatat...po-va-tat...i basta ! Povisi on svoj već pomalo drhtav glas i nastavi: Ali nama fali Tarzan...E,e...Tarzan. Ča se smijuljiš ? Ovo je za plakat ! Čitu ni teško nać jerbo koliko majmuni jemamo mi smo več odavna oberdžungla a ne obišna džungla ...ali nima Tarzana. Nima pa nima ! Sigurnije je u Afriku nego ovod !
A ovi farabut ča je umislija da je ka niki Faraon o cile Rvacke obišno je mrtvo puvalo ! Ništa o njega....
Zato morate prominit ovu vlast. Ukinit faraone i njegove sluge. Počet prvo od ovih izbora po gradovima, općinama i županijama...pa onda na državne izbore. Nima druge ! U džungli di vladaju zakoni o beštij i di nima civilizacije...vi ste unaprid gotovi. Vas jedino more spasit bokun civilizacije i bokun demokracije. Niste vi navikli na šporku igru...Tu ćedu vas oni pojist a ne pobidit, Pojist za marendu..Marinčelo moj lipi....! Ne znaš ti još ča je život a već si lipe godine uvatija !
Oni ćedu zato inzistirat na džungli a vi morate bit kontra džungle ! To morate reč ljudima ! To van je jedina šansa ! Jer, na kraju krajeva i oni ćedu postat samo spiza o divjaka i ništa više ! Jesi li zapamtija ?
Evo, jesan...
I još nešto. Oni film "Džungla na asfaltu"....nisan ti ga ja zaludu spominjala. Nego, kako san ti rekla. Svaki film jema svoga režisera..pa tako i ovi naš film koji se isto zove "Džungla na asfaltu".
Ako očete išta prominit morate narodu na cili glas reč kako se zove režiser ovega našega filma. I ne dat mu da ikad više režira našu sudbinu. Ne zaboravite se spomenit i glumaca. Sve to triba pomest....
A ja...
Aj ne troši riči.....Bog vas veselija i stojte mi dobro ljudi moji...Gren ča...ne bi vi ni do sutra stali mlit a ja jeman još toliko toga danas za učinit...
I skoći se naglo naša šjora File, ka da je ispaljeni itac iz rivolvera ...U tri koraka dojde do vrata.. otvori ih.. ne okrečući se mahne rukon...i nestane iza njih. Samo odjekne udarac vrata o vratnice... a na hodniku odjeknu njezini sitni oštri koraci koji su se udaljavali i čiji zvuk je postajao sve tiši i tiši.....
Post je objavljen 06.10.2008. u 15:43 sati.