Marketing
1.maj va Vrhi
Još jedan put su Brgujci dokazali da drže do svoje tradicije i onega ča su još naši nonoti i none počeli. Pred par let niki ljudi su tili zatrt našu brgujsku užancu, ma tu smo mi mladi ki držimo do tega, i tako smo se ovo leto složili si skupa da ćemo „prvomajsku noć“ vrnit va Vrh!
Tako je i bilo. Naši mladići par dan su se mučili okol parićivanja kresa i sega ča je rabilo za dobru feštu. Sredu uvečer, puni dobre volje, nakrcani ziz pijaču i sin ča je rabilo, krenili smo va naš brgujski Vrh. Niki hodeć, a oni malo „komodniji“ vozeć. Bez obzira na se probleme na ke smo naletili po puti, mi smo va Vrh arivali. Storili smo feštu kakovu znamo samo mi i malo po malo, prišlo je vrime da se važge kres. Lipo je bilo vidit kako kres gori, a još liplje naše mladiće ki su bili puni ponosa na to ča su storili.
Niku dobu h jutru, spustili smo se va selo ziz majen, obisili ga pol Šori i šli po seli zimat ono ča ljudi nisu spravili. Bilo je tu rožic, les, portuni… Vavik je bilo onih kin je to smetalo, pa tako i ovo leto, ma mi smo ponosni na to ča smo obnovili našu tradiciju i ni nas briga ča niki njurga. I budite sigurni, da doklje smo mi tu – ta tradicija se neće zatrt!
Post je objavljen 03.05.2008. u 18:26 sati.