Taman san se vratija doma jer san bija malu bacit do Špinuta....kad ono u kužini šjora File pije kafu sa mojon punicom. Ja - onako cili mokar i nevojan...jer u Splitu se danas nebo spustilo na zemlju - držim u jednoj ruci lumbrelu s koje se cidi kiša...a u drugoj ruci kesu sa spizom....a s livon nogon tresem jer me za gaće potiže Li-Lu režeći i mašući repicon - a šjora File me već zasipa pitanjima.
A, a ča to oče reć pa još nismo u Metropolu ?
Evo - sad ću za po ure...Moran se na brzinu spremit - priša mi je !
E...sad ti je priša kad te ja oču nešto pitat. Sad nimaš vrimena.... A i ča ću ti ja. Jedna obišna stara žene. Tebi je stalo jedino do oni tvojih mazguna iz Sabora....Ja san za te sitna riba. Girica ! Eto ča san ja tebi.
Ma kako morete šjora File...Pa znate da uvik s Vama čakulan koliko god triba.
A šta je - je...uvik Vas moj Marinko fali da kako ste jedna puno pametna žena...doda brže boje moja punica.
Ha, ha, ha....ma nemojte mi reč. A ča onda ne sidne bokun sa namon i popije čikaru kafe ?
Ja Van ionako ne pijen kafu !
Pa znan ja da je to za te ka ispod nivoa. Ti piješ samo najboje, najfinije bibite. Konjake i viskije ! Biće da ti višje ni naše vino nije po guštu - vengo samo francuska šampanja!
Ma molajte se Vi mene...Gren se ja spremit za na put.
Eno san ti ispeglala veštit, visi ti u armerunu...doda moja punica.
A ča mu Vi jemate peglat veštit. Oli nima i on ruke...Nek se nauči sam peglat.
Ma on Van je vas nespretan...svu robu škica, sve bi upropastija - pođe me ka opravdavat moja punica.
Znate ča ću Van ja reč. Sve bi on to meni sam radija. Ako mu se od početka pustite - najebali ste. Pa to Van je političar....Bidan ne zna peglat a zna po cili dan laprdat i mavat jezikon po Saboru.
A dobar je on meni...
Je, je...lipo Van ja kažen...Jedino se oznoji ispod jezika. Nima kod tega žuji na ruke. Ni to naviklo lavurat ! Njanci čačkalicu neće vazest u ruke...osin ako ne ji janjetinu ! Ma znan ja takvu racu. E !
A ča ste to stavili šjori Fili u kafu pa prića ka da je malo potegla, zapitam snervan njezinin ričima ?
A bome ništa,...samo kućarin cukra...ka ofendi se moja punica.
Sumnjivo ji pogledan pa se okuražin i zapitan: A da nije pa koji bićerin prošeka ?
Eto ga na...Znala san ja. Sad će me još proglasit pijandoron. Političar ti odma zalipi etiketu. Pa se ti onda peri, kume moj. Svašta ću ja doživit pod svoje stare dane. Vriđaju me u tuđoj kući !
Ajme meni, skužajte šjora File...sva se smanta moja punica...Ma ni on tako mislija. Jezik mu je brži o mozga !
Kojega mozga ? Ni to vidilo mozga ! Da ga jema ne bi ovako govorija...reče moja susida i ka cila jidna prikriži na prsi ruke i okrene glavu.
A Li-Lu ka da je shvatila da nešto ne gre kako tribe udre zavijat ka vuk....
Ola napasti. A di ste našli ovu beštiju ? Pari mi se ćut lava...a ne ovo pantagane u pasju budnu !
Ne vriđajte mi pasa...molin Vas lipo, sad se najidi i moja punica.
A dobro...ako je tako... odsad ću ga zvat Šjor Pas...da se i on ne bi štica !
Ni to mužjak vengo ženka.
A dobro, onda ću je zvat Šjora Kuja !
Nemojte izazivat molin Vas dobrin Bogon !
Vidin ja da je đava odnija šalu pa sidnem za stol.
Ajde dobro...Evo sija san - Pitajte ča jemate - okrenen se ja prima šjori Fili.
za Gospu Blaženu...ne smi se čovik više malo ni pošalit. A ča ste se najidili...reče ona pomirljivo mojoj punici, uz čiju se nogu sklupčila Li-Lu...ka da zna kako o njoj govoridu.
A baš se nisan najidila.
Ma jeste - vidin ja !
E baš nisan.
Ma jeste !
E nisan !
Je li dosta..upaden ja podižući glas - pa me obadvi pogledaju začuđeno.
A šta se ti dereš..raširi ruke šjora File.
Oli si se diga na livu nogu ?
E jesan - Ja san livičar !
Lip svit, nima ča....Stalno ste grintavi i mrzovojni..jerbo se ustajete svako jutro na livu nogu !
Znate ča - Nimam ja vrimena za pustu čakulu, moran u Zagreb. Moran po ovoj kiši vozit auto !
A ko ti smeta. Ajde ! Opet će ka jidno šjora File.
Ali tili ste me ništo pitat.
A ča ću...kad mi ne daš.
Ajde pitajte !
I oču !
Ma kako morete trpit da Van se oni Hebrang meće za pridsidnika o države ?
Pa ko šta mene pita..koga će HDZ metnit za svog kandidata za na misto Mesića ?
A ča jin ne kažete sve ća jemate o njemu ?
Pa očemo - ako bude kandidat za pridsidnika !
A jeli se ti sičaš kako je on bija reka da nikad ne laže vengo da samo digod ne govori istinu ?
Pa to je isto 1
Znan !
A znaš li ti šta narod za to kaže ?
Šta ?
Nije govno - nego se pas posra !
Ajme šjora File - koje šporke riči !
Ma ča šporke.? A da kakve će bit....Možda lipe, o meda i cukra !?
Li-Lu počme lajat.
A ti da si činila kuco - Zapriti joj svojin štrkjavin prston šjora File.
Pas zacvili i umukne !
Još si mi samo ti falija !
Ma to van je kuja ! Doda moja punica...
Jebe me se ča je...Samo da je više nisan čula..Ovde mi se popela...reče šjora File i udre se posri glave rukon.
Šjora File..ja Van gren. Moran poć ča. Nimam više vrimena za čakulu.
Ajde, ajde...Samo ti ajde Marinko mali...Ali reci onima svojima gori da ću se i ja kadidirat za Pridsidnika o Rvacke !
Oču !
I tribate !
Ka prvo znan puno višje o životu nego ča zna oni Hebrang. Ka drugo ja se držin sviju deset Božji zapovidi i nikad ne lažen ! Ka treće, ne znan nikoga u Japan...i nimam pojma ča je to Šimacu ! Ka četvrto....ja ne mrzin nikoga ! Ka peto - za mene su partizani na diku našega cilega naroda ! Ka peto - mogla bi ti ovako do sutra. I da znaš..ono ča su Hebrang i njegova žena rekli o onoj bidnoj glumici Miri Furlan ...ča su je proganjali vucibatine i divjaci...nemoš ćut ni među najdivljijin divljacima ! Pa će mi on bit Pridskidnik. Evo mu na roge...njemu i onemu koji mu je da diplomu o dotura !
Ajde smirite se malo.
Pa sad ti reci...ali pošteno: Ko bi bija boji pridsidnik Rvacke...Ja oli Hebrang ?
Ma Vi šjora File, Vi - i to miljun puti !
Post je objavljen 18.04.2008. u 10:46 sati.