Koja je ovo lipa bila nedilja.
Puna svega i svačesa.
Ali svit nekako najviše zaokupja politika, ka da smo svi nasađeni na krivu bandu i ka da smo zaboravili kako je politika samo jedan mali dil života a ne da je život dil politike. Sve se izokrenilo, ispretumbalo i pokvarilo.
Matere vičedu na dicu, dica na matere....Očevi, koji su ostali prez posla ili koje su rano otirali u penšjun...opijadu se i igradu na balote isprid kuće - pa onda doma privrćedu stole, baketaju žene i bubaju dicu. Sve dok dica ne ojačadu pa jednega dana ne naprobijedu takve pijančine i propalitete... u šta ji je ovi otužni život pritvorija. Sirene o Prve pomoći stalno sviridu a plava svitla na autima o policjoti svako malo lampaju isprid naših kuć i portuni. Jedne trpadau u aute ča ji vozidu na traumatologiju a druge u aute ča ji vozidu na policiju i u pržune. Za poludit !
Sve mi je to lipo, onako leđero - besidu po besidu, pripovidala moja susida šjora File ...dok sam nju i njezina unuka vozija na naš lipi Marjan.
A dan je lip. Nedilja. Judi od onih malo sređenijih familja izašli u šetnju...oli vozidu bičiklete od Marjanskih vrata, priko Bene pa do na Institut. Žene i mlaje gospojice se šetadu u tutama i pripijenin majicama...Ka malko trčkaraju i činidu fintu da vježbadu...a samo ispod oka viridu je li ih gleda koji momčić oli fini gospodin. Dica na rošulama zujidu ka bumbari a matere vićedu za njima i pritidu in kako će dobit svoje kad ji uvatidu. Niki sa sebon nosidu marende i čakod za popiit...pa sididu, oli u travu oli na bokun stine ..oli na šentadu uz cestu. A svuda uokolo trčidu pasi svih raca, veličina, koluri i izgleda. Mali basetni, pa veliki ka tovari, debeli i mršavi, bez dlake, su dlakom, ricasti, bili, crni, kafeni, oni kratkih i velikih nogu, divlji oli oni kućni....cili ispripadani...I svi lajedu i krevelje se u isto vrime a gospoje, gospoda i dica isto ka nika ćudna mišanca sviju mogućih izgleda.... dahčući klipsaju za njima zovući ji najluđin imenima ča judsko stvorenje more nadit jednoj beštiji ka ča je pas. Ola koji konfužjun i gungula ! Najlipje je zato samo sidit u ladu na šentadi i okolo bacat očade....ka da nimaš nikakve veze s otonon pokretnon ludnicom. Ma mojoj šjori Fili se još ne denja sist....pa nan vaja odat dalje.
Pari mi se da vidin Pjacu o šinjori iz vrimena mojih srednjoškolskih dana...kad je glavni đir bija tamo se tiskat do u kasne ure po noći, korteđavajući se sa procvalin curama i bacajući baze meju svojon klapon o samih muškići.
I taman san se tako bija bacija u daleka sićanja i velike misli, žaleči šta nisan doveja i moju Li-Lu neka se ovod lipo istrči s drugin pasima - pa da nan po kući dade bokun mira...kad me iz tog sanjarenja prene zaćuđeni šjora Filin glas:
Ola, koja je ovo sad moda došla....Svi pijedu vodu iz mali plastični boca. A prin su lipo pili sa špine !
Je, svi Van sad puno tišćedu do zdravja, zdrave prehrane i zdravega života.
Evo ti na roge ! Ma koje zdravje ? Nima više one spize iz moje mladosti. Onega gušta i šušta kad nije bilo ovih kemikalija i galofaka. Više ni pravu juvu ne moreš napravit o kokoši, jerbo ji više niko ne rani ka ča smo ji mi ranili. O tingulu boje da i ne govorin. Sve sami otrovi !
Bogami ste Vi, na kraju svršili u ekologe !
A ča ti je sad oto ?
Ma nima veze šjora File...Oču reć kako ste Vi za očuvanje prirode i prirodnega života.
A nego ča....Vidin ja da je ova umitna spiza udrila judima i u možđane pa radidu pizdarije di stignedu i di god moredu. Ma narod ne obadaju..Pa su judi pali ka u niku apatiju....Sve jin je isto. Moš ji sić naživo - a oni mućidu i mućidu !
Neće bit baš tako...
Ma ča neče bit baš tako ?
A ovi prosvidi u Zagreb !
Ma ajde, Marinko moj..o čemu ti pričaš. Oni vičedu...Policjoti ji čuvadu. Jemadu govornice i mužiku..Autobuse i spizu. A Sanader jin priko televizije poručuje da kako ji podržaje ali da nima vrimena doć s njima alabućit protiv Vlade kojoj baš on kapo. Mesić je sa diplomatima u Liku na niki brod. Luka Bebić u Split na oni sajam o jahturin kojin se vozadu miljunaši. Eno ga priznaje da kako se nalovija palamida priko svake mire - pa da je pinku prikršija zakon. Ali, jebeš zakon ! Sindikalci vićedu na političare a sami su najveći političari....Narod navija za demonštracjune....ali, Marinko moj mali - nije to vidilo pravih demonštracjuni ni pravih demonštranti....Ono kad se gaće vlasti tresedu o straja. Sve mi se pari da je ovo ka u niki teatar. Lipa predstava u tri čina - a poslin jopet sve isto. Sindikalci zadovojni a zadovojna i gospoda fina !
Tako čakulajući došli smo do Prve vode na Marjan...a moja se šjora File sva nekako zapuvala, upotila. Vidin ja da mora otpočinut pa je nagovorin da sidnemo na jednu šentadu sa koje su se taman digli neki momci i cure.
A lipe li mladosti....Baranko da njima bude boje vengo ča je nama, izgovori ona sidajući na šentadu.
Jo zaboravila san ventulu a udrila mi je vrućina u glavu. Jemaš li ti čagod za mavat da napravin malo bave...?
Evo - jeman današnju Slobodnu.
A daj mi nju, ionako i nije za ništa nego za mavat...Ma jutros mi je mali čita ča opet o vama pišedu...da se mejusobno čepušate i karate...Ma ja jin ništa ne virujen, sinko moj - znan ja u kojemu grmu leži zec !
A u kojemu !?
Aj ne čini pizdu o sebe..Nisi ti baš tako blentav ka ča ja koji put rečen...onako višje o jida nego zaraj čega drugega. Pa vidi se sa vrja Merjana da van mećedu trapulu ne bi li se u nju uvatili...da van stavjadu baketinu da se ka grdelini na nju zalipite i da svršite u čibu...da van jame kopadu kuda god grete ! I ča je najgore..jema tu svačiji prstiju Marinko moj....odjedan put ona stiša svoj glas i nagne mi se na uvo ka da je niko ne bi čuja.
Je si li me razumije....doda ona - oštro me pogledavši svojin stisnutin očima?
Svega tu jema. Čuvaj se ti judske zlobe i pokvareni čunki...znaš !
Ajme meni...Samo mi nemojte opet držat prodike, šjora File !
E baš oču jer si tupji od najtupjega tupana. Jo meni...raširi ona ruke - ča je meni dopalo da pod stare dane moran učit političare ča je život. Ka u pućku skulu. I počme još nervoznije mavat Slobodnom oko svoje glave....
Oli ne vidiš da te gadidu di god stignu? A? Oli si slip ?
A evo jesan !
Bogami i jesi ! Svetoga mi Ante ti si teži slučaj nego ča san mogla mislit.
Je, je...pizan ja puno...
Je..u trbuju, ma ne i u glavu - jerbo ti je teže u nju ništo utirat vengo Sanadera natirat da pokaže račune o svojih satova !
Pa di ste se njega baš sitili !
E, a nego koga ču...Ionako vas sve voda žedne priko vode. Nedaj Bože da mu i oni Čačić poviruje ! Gospe moja o sedan žalosti - nima ništa blentavije na ovemu svitu nego ča su naši političari....Oli ne vidite di će sve ovo završit? U bekala ! I onda nemojte poslin kukat da kako nevaja vlast..i ovo i ono ! Umisto da jin sada u brk kažete sve ča ji gre ! Da su nas sve upropastili...a samo zato da bidu oni i njiovi jubimci mogli guštat sve gušte ovega svita.... A ne jin gledat kroza prste...ili in se, ne daj Bože, poć ulizivat ili davat ruku u šporkemu poslu ! E, bome....
Uto se začuje dičji plać.
Eno Van je mali pa po tleju !
Ajme meni majko moja..svega ču ga izubijat kad dojdemo doma !
Ma di ćete poć tuć dite...vidite da plače, da se udrija u kolino !
Je...kad neće da sluša. Gori je i od tebe. Ijadu san mu puti rekla da pazi kad vozi rošule..Ali govorija njemu oli tovaru sve ti je ista stvar...Ma rojeni političar!
Ajde dojdi vamo, čuješ li me !
Naravno da ga šjora File nije ni takla ali ga je dobro isfregala ričima...pa se dite nikako umirilo.
A gremo ča prin nego poludin ! A čut će me i ona moja nevista. E da je plandovat po cili dan ! Meni je utirala malega...a ona će ka učinit obid. A boje da i ne pričan kako kuva....
E, tu ste Vi najboji na svitu.
Nemoj se ti meni sad tot utiravat...Ali da znaš da nisan loša !
Pa ča ja drugo i govorin ?
Dobro, dobro....
Ajmo šjora File popit u restoran kafu.
Mooolin ! Prije bi krepala nego jin dala i šolda.....
Ma ja Vas zoven !
Baš me briga ! Jeman ja svoje pricipe. Nećedu oni vidit šjoru Filu da glumi gospoju i da ispija bibite po kafićima dok narod pati i dok vadi plastične boce i konzerve o piva iz kontejneri..A - ne, ne ! Zavitovala san se da dok je mižerje i gladnega svita u mojemu gradu - neću ulist u ni jedan restoran, kafić. oštariju ili bilo di...di se arči i banči.
Ma koje arčenje i bančenje ? Zoven Vas na obićnu kafu a malega na sok.
A ne, ne....Kad jedan put popustiš i prigaziš ono ča si sam sebi obeća - e onda više nisi čovik. Jerbo je meni najvažnije ča ja mislin sama o sebi a ne ča drugi mislidu o meni.
Je, ma opet Van nije sve isto ča judi govoridu o Vama.
Samo oni judi do koji ja držin - odgovori mi ona ka da je mačen prisikla kroz arju.
Dobro, dobro - neću navaljivat..ako baš nećete.
Nego ajde ti mene lipo baci doma Marinko. Dosta je meni i ove gungule i ovoga šušura. A triba ranije i obidvat. Nedija je !
Ajmo onda ča...
Nemoj se ti jidit..ali ja ti se rano ustajen..a jutros san bila i na misu i u spizu na naš pazar...Ne boj se..nisan se ja do podne izležavala u posteji ka neke !
Koje ?
Znaš ti dobro...povišenim tonom će ona.
Ajme meni - nije lako ni njezinoj nevisti... pomislin ja u sebi.
I sidnemo mi tako u vruće auto koje je cilo vrime bilo na suncu...pa mi se dobra moja šjora File skoro afanala kad je ušla u njega.
A moga si bija prije malo rasfriškat auto.
Jesan..ma se nisan sitija.
Aj vozi...doć ću doma sva lešana...
Nismo ni krenuli a ona će meni: A koji je ono šototajer Mesić iz hadezeja reka da kako su Račana pobidili i Milanovića ponizili..? Ma iz kojega je kara oti ispa ? Pa nisu mogli nač čakod pristojnijega čovika da jin vodi HDZ u Zagreb?
A more bit da jin je to baš najboji ?
Ajme njima ako su jin otakovi najboji ! Ćula san da se zove Jasen. A je, vidi se da je niko drivo.... ali pari mi se više ka nika bukva.
Ko će znat, možda mu se od pustega ronjenja desija neki škerac u glavi..jerbo samo su glupani nepristojni judi. Oni bidni i ne znadu da su nepristojni !
Jermate prav šjora File. Samo nije Van on od jučer. On je bija niki pomoćnik oli ča ti ga ja znan ča...u niko ministarstvo...i baš Van je on odobrija da se na splitsku Rivu zatrpaju oni arheološki nalazi koji su pronađeni kad je ovima ča su na vlastu u Splitu udrilo u glavu da je svu prikopadu i da naprave ono čudovište od nje !
Ma ča mi govoriš?
Je, je...To Van je baš tako !
Ajme meni Gospe moje...oslobodi nas otakvi mladih Salamuna ča mislidu da su Boga za bradu uvatili - a koji nikad u životu ne bi uspili da jin nije politike i da jin nije njiovi gospodari kojima oni ka obićni pasi čuvari služidu i jidu iz ruke samo zarad jedne stvari: Da bi ujidali one ča ne mislidu ka njiovi šefovi i da bi cili narod i cili pošten svit zajebavali... Glavno da se njiova gujica nauživa svega i svačesa... prez po muke i prez kapi znoja. Takvi su ti, Marinko moj, najgori i vaja ih se dobro čuvat - pa ma u koju stranku oni bili !
S otin ričima me isprati moja dobra susida jer smo baš stigli na Pujanke...a i mali je na zadnji sic od auta već puten zaspa...pa san joj ga triba pomoć odnit do stana.
Dobro san i živ osta noseći usnulo dite uza skaline...jer, za istinu reč, i meni fali force od ova nezdrava života rvackog političara
Post je objavljen 14.04.2008. u 00:46 sati.