A joooooooj dico moja, ja sam od Uskrsa na simo tulko smetena i zabezeknita da opće neznan kaj ću prije pisat i o čem ču divanit. Kanda je vrag pukal u me i u moju Hrvacku i u vlast, pa ja san van sebe…
Najprvlje poludel oni jadan general i potamanil sve kaj mu je stalo na kratkem putu i baš onda je moral dolazit Buš i Bušica u Zagreb, i onda drž nedaj, kaj u onoj seriji od Eliota Nesa kaj smo svi gledali. Al Kapone je bil pusta mizerija prema temu, pa mi je ispalo da mu je Buš presudil, jerbo je rekal il buš zapril Koreda ili mene nebu tuj na trgu Svetega Marka. I tako bi, i ubiše naši svojega, a mili bože kemu verovat, ja sve mislin da je to sniman niki novi film o vrimenu potlje zadnjega rata.
Buš i Bušica su se dopeljali po raketami i snajperi u Zagreb u Dvore naše države i tamo su ih dočekali prebrani Hrvati, a i na trg Svetega Marka mogli su ga ić gledat samo kega je šef Sanader prebral. Nikad još nekega nisu tako grdo i sa takovim strahon čekali ko Buša i Bušicu, a ja san samo gledala kadi mu je onaj kofer kaj je u njemu atomska, pa da ga ki gurne i ispalu ku bojevu glavu od silnih megatoni, morda skroz do Miseca pa će nam i njega šundrat.
A ni taj Buš bog zna kaj, a ni Bušica, a još san više ljuta na Sanadera kaj ni mogal uspravno pojt kaj čovik, neg se fort saginjal da bi bil morda manji od Buša, ali ni mu uspevalo, samo je izgledal pukljav i traljav. A ov kauboj nam je rekal, da će dojt proleće, kaj da bez njega ne bi došlo, a bože mi oprosti, nemorem dojt sebi. Mije ni til te spodobe ni gledat, prošal je u Rašić i pofrezal dvi lipe njive, i već sam puno tega dela u njih, grašak, šinat, blitvu, bit će lipega luka, a krumpir i ovo drugo ću za praznik rada 1 Maj, i to valje posle budnice ako je bu ?
Ja san mišlenja da nam tega ni trebalo, tulik troška za nekakov poziv u NATO, kaj će nam to, od kega će nas branit taj NATO, kad će svi bit u njemu. Mi uvik moramo plaćat porez na bedastoće, ljudi moji ki će tulko nadelat?
Onda oni Jandroković kaj ni znal kulko poglavlji se otpira a kulko se zapira, pa to već i gluha Roža zna, kaj i to kulka će im bit plaća ako zasednu u ti Evropski parament, devetera ih padavica ulovila i gromi silni pukli va nji samo trošu i trošu i trošu a niki da bi kaj korisnega naredil?
Sad se i ona Pusićka spuntala i cupa za Sanaderum, sad će imat dvi klimalice uza se, a ona i ona gospa Jadranka postat će nerazdvojene prijateljice kaj ja i moja Mare. Kaj euri moru naredit nemore niki. A ja sve mislin da mi nećemo pojt još u Uniju i da su nas pospremili u paket sa ovim drugimi kaj smo s njimi ratovali, samo se moramo sad slizat, kako to lipo politika veli i pojt čemo svi skupa, ako se do tad ta Unija od Evrope na raspadne, jerbo mi se čini da je drugimi to skupo.
I onda na kraju ovega tjedna, juriš na Pukanića i Pukanićku, jedni velu da ju on će spremit u ludnicu, a drugi velu da je ona na kokainu, a treći nimaju vrimena mislet o temu. Svi su se digli na zadnje noge i pratu, kaj će Ive Banac, kaj će Srnavka, kaj će Babe, Sabor divani o tem jel luda il ni, i jel ju trebalo otpeljat u Vrapče ?
Svi su poludeli, da nima Pukanić novine i da nima Pukanićka milione niki ne bi ni prdnil. Kuliko ja znan žen i prije i danas kaj im muži nabijaju leđa, poloču im plaču, nimaju dici za kruh, a kad prijavi na policiju, dobije rešenje da platu kaznu, ku ona mora platit. Zač nisu tako vridni i poletni kad je sirotinja u nevolji, kadi su onda prava i pravda žen i bolesniki ?
More te ubit u svakoj bolnici i umobolnici, da niki neće smet ni reč kaj se dogodilo, a kamo li po novinam pisat. Ja više taj svit ne razumim, ne razumin kako se moremo zabavljat sa tim nevoljami, kaj da se sami sa sobum sprdamo?
Jedino kaj je bilo kako je red i vrime, to su prosvedi radniki u Zagrebu, radniki ki su sve te ciganije platili i plačadu ne moru na Trg Svetega Marka, ma su bili na Trgu Jelačića Bana, njih 50 hiljad nevoljniki i jadniki, kaj im ovi smradi od političari gulu kožu, tiraju ih zdravlje svoje tajkunim ostavljat. Ma ni bilo ni jednega tamo, ni taj narod žuljav njvo društvo, nisu oni krivi šta ima sirotinje više nego u celoj Hrvackoj povesti, od Matije Gupca ni tako bilo kaj sad. A ki je sirotinju tulku stvoril, politika, samo politika, ma i Sanader i Mesić velu da ni državna mašina naredila sirotinu i sve pokrala, a ki je onda kriv? Narod, jerbo ih je pustil i još ih pušča da deladu kaj god će i kako će.
Kuliko san se ja veselila Hrvackoj, kuliko sam puti oprala i popeglala one uniforme, kako san se nadala da će dojt jedan svital dan za nas NAROD, a nas kajda ni ni, nas ni, mi smo samo broj u poreznem uredu kemu treba zet, kega treba tirat da dela i ne misli, da boluje i tuguje sam, da čeka čel se ki kad osvrnit na nas. Ne, nemorem se smijat , nemorem se ni sama smilovat više ni na kega, jer mi došlo u mozak da celi život za nekega delamo ki to ni zavredil. Za kega? Za Sanadera! Za kega? Za Mesića! Za kega? Za Šukera! Za kega? Za Kalmetu, za Vučića, za Begu, za Pusićku…… Pa kulko vas to ima ? Da svakem kunu dam, nisan ih nadelala u celem životu kulko ima tih lenčin, lažljivci, kradljivci ili kako se danas zovedu – političari !
Ajte bok!
Janjo,13 svibanj 2008.
Post je objavljen 13.04.2008. u 18:06 sati.