Marketing
Tri dana pressinga ...
Zaludu me svitovala mati ... da učinen danas ča jeman i da ne ostavjan za sutra. Fala bogu da je nisan posluša. Ni ovo ne bi napisa da znan da čita blog. Sva srića da je antitalenat za tehniku, pa jon je unuka Vinka objašnjavala kako se stavi film u DVD player, kad je jemala godinu i po dan. Vinka, ne moja mater 
I tako, kad je nisan sluša, skupilo se materijala jerbo je ovi vikend bija bez ferme ...
Petak: Posljednja večera ...
Ne, nije ono ča mislite, niti smo mi sveci, niti je ko pojubija Isusa, a nije mu niko ni noge opra ... jednostavno, svake godine kad završu Maškare, pa kad se sve zbroji i oduzme, dodjemo malo sebi i kad prođe korizma, onda lipo pozovemo sve ča miritadu na jednu malu večericu, sve sponzore i učesnike povorke, ili barenko predstavnike od masovnih dičji slika. Ove godine je pa tir na kvatro aprilanti ... i mogu van reć da smo se skupili u najvećemu broju ...
... bilo je dice od godine i po, a bilo je bome i oni o šćapu. Mislija san se ča ću sa Vinkon, onda san se teška srca odlučija za baka-servis, i falija. Jer je ovod bilo i njezine ekipe iz vrtića, pa bi jon bilo lipo.
Ka ča je i nan bilo dobro ...
... odnija vrag Busha i onu večeru U Purger Vakufu, ovod je bolja ekipa ...
... spize fala bogu nije falilo, kako je bija petak učinili smo «morski dan», sira, slani srdel, crnega rižota i zelene manistre sa frutti di mare. Tako je bar bilo do devet i po, dokle san moga ostat, a onda je tribalo poć Vinku stavit u posteju ...
... a i za one ča volu balat (plesat, za sjevernjake) bilo je isto sve kako Bog zapovida, živa muzika, zna svirat sve osin cajki, pa ko voli ...
Najboje od svega je bila posluga, sve sami prekaljeni konobari, sa trista odrađeni pireva i razno-razni fešti ...
... i sve lipo dokumentirano za buduća pokoljenja.
... neka jedan put ko i nji slika ...
P.S. I skoro san, bezobraznik, zaboravija reč ... kako san, smotan kakvi već jesan, zaboravija fotoaparat, ovo sve slik ča vidite ne bi bilo da nije uletija @gregor sa Mašogradskoga portala. Fala in!
Subota: Proširena sjednica TBĆ*
*Trogirska Blogerska Ćelija
Ča san ono reka, da san smotan. A nisan! ... I vamo san zaboravija donit fotoaparat, pače i cili ruksak ... počelo mi je ovo prilazit u naviku. Moraću malo stat na balun ...
Zakonita, naravno, i nažalost, radi ... a Vinka i ja malo đirajemo kod babe u Kaštila, i čekamo poziv. Od koga? Pa od @slatkogrko, koja je još jučer došla u radni posjet TBĆ, glede svečane sjednice ... i to u proširenome sastavu. I dočekali mi poziv ... malo je potrajalo dokle san uboja pravi put, do stare kuće u Okrugu Donjemu (to je oni Okrug prema punti, a ne omar izad Trogira) jerbo mi orjentacija nikad nije bila jača strana, i malo pomalo eto nas kod @zore, a tamo, osin Trogirki, domaćice, @zuzayok i @ciovke, još jedna gošća, @old-bat. I opet bi bija, da se nisu pojavili Zorin Zakoniti i Stariji, blaženi među ženama ...
Počelo je napeto, Vinka i Domina su se sve ništo gledale priko oka ...
... a kako smo mi došli zadnji, najpri me tokalo provat pašticadu, ča mi, moran priznat teška srca, baš i nije teško palo 
Za divno čudo, i Vinka se pokazala slakorana, svidile su jon se kroštule, a rafijole, trogirske naravno, nije tila njanci okusit. Ne zna mala još ča valja. Naučiće, jema vrimena ...
... ajme ča je ovo dobro, moraću malo tlačit obadvi babe da mi ispeču kroštule ...
... a kako san već reka usmeno, ponavljan i ovako, napismeno, pod punon moralnon i krivičnon odgovornosti, da se kuvarica komodno more udat. Pašticada, kroštule, rafijole ... ajme teškoga dana ...
Dokle smo mi kusali, Vinka i Dome su se već skompale, bacile kušine na pod i udri u ćakulu ...
... ko zna ča je i ko je bija na tapetu ...
... a meni je najteže od svega bilo odabrat slike. Kako san bija zaboravija i ovod fotoaparat, poslale su mi @zuzayok i @ciovka sve ča su slikale, ali uz puste izuzetke nemoj ovu sliku, nemoj onu sliku, nemoj mene stavit nikako niti pod razno ... evo, na ove dvi slike je stalo sve ča san smija objavit ... veći je ovo kompromis vengo koalicija od šest stranak dviiljadite godine 
... a ovi put, za razliku od prvega blogerskoga sastanka u Trogiru, Dome nije zaspala od dosade. Ovi put je bilo još gore. Kad je Vinka došla da gremo ča, jer smo još tribali poć skupit i Zakonitu na posal, Domina udri u plač. Da sa kin će se ona sad igrat ... jedva su je smirili, da nije bilo @slatkogrko, još bi mala revala. A ona jema stvarno poseban odnos sa dicon. Moja Vinka kad dođe u babe, jedne oli druge, najpri se kvarat od ure zabije u kantun i onda polako progovara. Ali to ne vridi za @slatku, odma u nje ka da je vidi svaki dan.
I tako smo se uputili po Zakonitu, usput odveli i @šišmišicu do doma, a Vinka je, fala na pitanju, zakomila deboto pri Trogira ... spavala sve to TTTS-a i skoro sve nazad do Mašograda. Naravno, kad je tribalo leć, opet nije zaspala pri deboto ponoća.
Nedilja: Sveta nedilja ...
Već smo svi bili na rezervi ...
Nakon tradicionalnoga obida kod babe u Kaštila, uputili smo se pomalo na rođendan. Mala Iva, od rodice mi ćer, slavi šesti rođendan.
Sva srića, nije dugo trajalo, gomila dječice na jednome mistu je proizvodila pristojnu buku ...
... a virovali oli ne, Vinku je još iz Okruka držala slakoranost ....
... pa je na opće oduševljenje svekolikog pučanstva, a posebno mene i Zakonite, izila cili ovi komad torte.
Nekako smo se dovulki do doma, jedva, pa san u posteju a Zakonita je opremila Vinku za Vrtić, nakon deboto misec dan. Ajme veselja jutros kad je uletila među ekipu. Neka se malo istrče i izigra, sigurno jemadu ča jedni drugima pričat ...
Zdravi mi i veseli bili ... 
Post je objavljen 07.04.2008. u 11:51 sati.