Marketing
To si ti, to san ja, to smo mi...
Lumbarajka....Znaju mi još često reć oni što me poznaju (kolege, prijateji, profesori, znanci...) a znaju kako se zove stanovnicu Lumbarde. Lumbarda - malo misto na istočnom dilu otoka Korčule približno 1 200 ljudi. Iako mi ta brojka ko maloj nikad nije bila jasna jer....Liti bi bilo krcato selo judi, krcate plaže Pržina, Bili žal, Ražnjić, u Lučicu ko zna za njenu lipost, na Parapet mladost, na Prvi žal dica, poj spomenik, na Koludert, u Mala Račišća, na Krmaču, pa i ona mista di domaći samo znaju i užaju kako što je Glogovac, Defora... Pa jope krcate ribarske veceri petkon, krcate folklorne i klapske večeri sridon, krcato prid dom ka bi svirala muzika za po zabala. Da ne govorin za sv. Roka i Velu Gospu. Ja koje su to fešte. Živi si ko mali da te mater i otac odnesu na Žal na bale, di ima čejadi...A zimi, kako da je niko izgasi letriku. Mlados utekla da se bori za obrazovanje u veće gradove ko sto su Split, Dubrovnik, Zadar, Rijeka, Zagreb... Ka nema mladosti i selo utihne pa izgleda nikako pusto. Ma ope ima onih sto gredu u skulu i na otoku pa daimanje žive, ali fali do onu 1200.
Lumbarda... Ka se promislin boje, ma blago mi se. Fala ocu i materi mojun, fala starima što san baš tamo rojena. Puno tega to malo selo nudi. Da resteš zdravo, da igaraš rukomet, nogomet, da balaš folklor, da sviras u mužiku, i svasta. Istina svaka medaja ima dvi strane ali ako malo boje otvorin oči vidin da kogo nema ni ovo sto mi imamo i odma san sritnija. Nikako se u meni užeže oganj i zagrije me da ne pustin ni to malo sto imamo, naprotiv da se potrudin da to zablišći svojin sjajen i osvitli sve tamne strane koje su neizbježne.
Nebi hotila puno se raspisa oj povijesti za prvi put, jer to ionako možete inac na sluzbenim stranicama, više mi je gušt o Lumbardi kroz moje oči. Kroz ono kako je vidin i kako bi je tila vidit. Sudbina me vec kroz skolovanje makla iz Lumbarde ali jon se svaki put sve radije varćen. Žensko san i ko zna jednega dana di cu stvori fameju, al samo znan da bi volila da mi dica budu resli ako ne u Lumbardi onda u sličnon mistu i na način na koji ja jesan.
Toliko od mene za prvi put s novoga bloga.
Pozdravja Vas
Lumbarajka
Post je objavljen 09.03.2008. u 01:39 sati.