Marketing
Činkve!
Nije ovo samo još jedan mali noćni post, ka prid niku noć kad mi se nije dalo spavat pa san se usta u gluvo doba noći i malo baulja bespućima interneta, dokle opet nisan natira san na okice. A nisan ni počeja igrat šije-šete u snu. I to još sam sa sebon 
Ovo je strogo namjenski.
Dunkve, uredno san sačeka Zakonitu dokle nije došla sa posla, opremija san je nanit i onda san se ja usta za pripremit ovo, ča i vi sad vidite. I jednu puno lipu srcoliku bombonjeru ča ne vidite 
Čestitku za petogodišnjicu braka!
Prva koliko-toliko okrugla godišnjica. Nadan se da će i bit još puno ... Kako je ono Oliver piva, iz ustiju Roka i Cicibele ... vrića suza, šaka smija ... ča je život vengo fantažija ...
Da prostite, ne znan slikat, mislin na slikanje pinelon, ka @zuzayok, ne znan ni fotografirat ka @ciovka, a ne znan ni pisat urnebesno smišne igrokaze ka @kalumela, ja van znan samo odabrat slike koje je, u ovome slučaju, slikava Foto Marko iz Kaštel Staroga. Eto, prova san van izboron slik od nazad pet godin, prikazat kako je bilo ... prova san napravit najboje ča mogu, i uvik ću nastojat bit takvi. Dat najviše ča mogu ... ne moran bit najboji na svitu, ali bar ću znat da san da sve od sebe ...
Živili vi meni i zdravi bili! 
Post je objavljen 01.03.2008. u 01:14 sati.