Naravska stvar, jutros me najranije natiralo da gren kupit kruv za marendu.
Brontula san i gunđa u sebi ma san isto poša u butigu. Na skalinama, kraj vrata o lifta intra san na šjoru Filu di se muči s nikon korpon punon mokre robe.
A di ćete Vi s otin pizon u ovu uru?
Ma pusti me...evo gren stavit robu na taracu o kuće sušit - kad se gospoja nevista ne denja ! Oni je moj sin razvicja ka da je Gospe o cukra !
Ola, najebala je ota danas...pomislin u sebi.
Ajde, molin Vas pustite to na pod - ja ću Van odnit robu do na taracu. Slomit ćete se ! Ma ko je vidija da tako staro ćejade ovako ujutro u nediju fatigaje ?!
Spusti ona korpu s robon na pod a ja je jedva dignem.
Muko moja Isusova, ča je ovo teško - pomislin opet u sebi..Ma kako je samo žilava ova šjora File kad more ovu mokru robetinu nosit na ruke. A još je triba i prostrit, obisit je na konop o sušila..Saginjat se gori - doli...Ja ne znam, bome, bi li to sve izdrža - filozofiran u sebi dok mi kolina drčedu o debulece ka dva pruta koja ćedu baš sad puknit..A i ruke su mi se već o truda rastegle i bolidu me, a ona korpa mi žulja trbuj. Sva srića da je taraca tu blizu...
Kad smo došli na taracu ja cili uspuvan spustin korpu na pod i sidnem da malo otpočinem...o veloga truda.
A ča je, tiću moj saborski ? Nismo navikli na fiziški rad ! E da je samo palamudit, umovat i pizdit tamo u Sabor po cili dan ! E to moreš ! Za to ti ne fali force ! E, a vidiš...Ja bi radije cili dan kopala vengo slušala one vaše monade. Ma jo, da je mene pustit tamo samo na po ure ! Jemali bi ča ćut ! Čula bi cila Rvacka ono ča nikad ni čula, e....Zaključi ona i podboći se rukama na bokovo od onog svog štrkjavog tila.
Ali, šjora File...
Ajde muči tamo i sidi..Još ćedu me napast da san natirala saborskog zastupnika radit a to je u ovoj zemji veliki grij ! Mogla bi proradit pravna država - pa ja najebat ka žuta, a...lipo moje ?! - nagne se ona nada mnom nekako me sve striljajući onin svojin očima ka su dvi žeravice.
Ajde Bogati, još ćete me pripast..šjora File !
Jo ča si mi nježan...A da ti dan čućin i bočicu mlika ?!
Ma pustite Vi...
Ajde cukunu..oli ne vidiš da se s tebon samo zajebajen. Ali ni mi bilo drago vidit kako ste potirali ou, kako se ono zove....
Jadranku !
E Jadranku, Jadranku..Onu finu gospoju, zaminicu o tajnika... ča je uvik sidila kraj Šeksa i šapčala mu ča da radi kad bi se smanta...Baš mi je bila draga. Parila je ka nika saborska Pepejuga ! Deboto je ne vidiš a sve radi...Sve klizi i ide ka po loju. Pa ste baš nju našli za potirat ?!
Ma nismo je mi potirali nego HDZ !
Ja bi prije rekla da su je potirali ona naša lipota o Sanadera i njegov neretvanski gusar !
Ma koji sad gusar ?! Pa nima gusari u Sabor !
Jema, jema...I ne samo gusari..Nego i uskoci i ajduka i šporkačuni i kreteni kretenskih, matuni i danguba...razmavala se moja šjora File onin svojin ručican koje su počele radit ka ventilator.
Ali, ja san je pokuša obranit..
Je, čula san te...a ča misliš da bi mi živ izaša sa ove tarace da nisi ?! ..unese mi se ona u lice. Naravski da je tribalo branit..a posebno od opnega lažjivca lažjivega Hebranga. Ma jesi li vidiji da oti jema obraz debel ka ča je šjola o postoli ! Ne zacrveni se oti kad laže..i to čoviku u facu. Sad je izumislija da je ka sama ona otila otić u penžjun...Bože moj. vidiš li i Ti ovo ča ovi jadni narod viidi ?..okrene ona svoju glavu prima nebu...pa joj se sida kosa, lepršajući na povitarcu, prostre po leđima. Sve je to parilo nekako nestvarno, gotovo biblijski..u ovo rano nediljno jutro na splitskim Pujankama.
A ja sidin na na drvenoj kutiji i gledan je uzgor kako se obraća nebesima raširenih ruku..u crnoj šotani priko koje je vezala isto tako crnu traveršu na bile nule - ka da je sva posuta sitnin finin snigom.
Ma šjora File moja !
Ona se prene....
Amo mi polako sa ove terace. Ubit će Vas propuv. Uvatit ćete puntu plauritu !
Ne boj se ti mišu moj, nisan se ja odgojila u bumbaku nego na tvrdoj zenmji i stini meju lozon i maslinama. Po cili smo dan fatigali za ono mižerje ća bi uvatili za priživit. Intrade su znale bit škrte i nevojne - ma smo uvik ostali judi. Judi, Marinko moj ! Još ka dite tukla san more s materon i ocon...Bog in da pokoj ! - i odila u ribu. Oli je onda bilo motorini...? Bokun kajića i sve na vesla i jidra ! Više san se nauživala truda ka dite...i to žensko, nego ča ćeš ti u cili svoj život . Pogledaj ove ruke, lipi moj....i raširi ona svoje dlanove..Nisu ote ruke svirale klavir nego su držale motiku, konop i veslo i ča je god tribalo...Za priživit..Ali smo uvik ostali judi. Judi ! A ča se ovo danas dešava ? Na koga su se uvrgli ovi lupeži , privaranti i guzonje ?
Pa ni baš sve tako crno !
Ma ča nije ! Dosta mi je bilo čut onega Rebića kako na prvu sidnicu o Sabora viče onemu vašemu zastupniku da sidne..jerbo da je budala ! Ma je li to čejade vidilo svita ? Zna li on ča govori i di to govori ? Jer, sinko moj, ko ne poštuje drugega ne poštiva ni sebe samega...A di smo onda mi ? Di je ovi obišni, mali narod ? Ko njega poštiva ? Niko !
Ajde, neće bit baš tako !
A Bogami oče, oče....sunce moje!
Sve mi po noći ne morete spavat zaraj puste brige za ovi narod ! Je, je...vidin ja da ste izgubili apetit i svako malo padate u afan od patnje ča narodu baš i nije najboje. Ča je...ka malo slabašan...Ča bi mu triba niki likar, niko ćudo pa da dojde sebi ! Ali zato ste se išenpjali kad su javili da je bomba u Sabor. Ola koju ste gungulu učinili ? Gledala san ja na televiziju....Trčidu tajni agenti, pasi njušidu...Gospoje zastupnice obukle najfinije i najlipje monture da se prikažedu ka da su došle na modnu reviju a ne na težak politiški rad i kuluk ! Ma pusti me stat Marinko mali i ne brani mi nikoga..Sve san ja vidila. I ne samo ja !
Neš ti ?!
Oš reć da san ja rebambila ! Da san luda stara žena ! A !
Bože oslobodi !
Ne bogaji ti meni ovde...nego bi ti bilo boje da si onome, kako se ono zove - stalno van zaboravjan imena kad vas jema ka pasa - a onome Bukarici.... novemu pomoćniku o tajnika ča je stalno pljeska Sanaderu r - reka ča ga gre !
Ma reka san mu !
Ma nisi mu ti reka ni po mise ! Ja bi njemu rekla ča ga gre ! Ja !
A dobro onda ćemo vas drugi put stavit na listu za u Sabor !
Ajde pojdi ti zajebavat koga drugega a ne mene..jesi li me čuja! Da si bija pravi ne bi naš dotur Ivo stavija onega tvoga prijateja Vukelića za ministra o vojske !
Ma koji prijatelj!?
A to se tako kaže...jerbo si se š njime bavija dvi godine skupa sa spliskin škeron i ča...Izija vuk tovara ! Nikomu se ni ništa desilo a Vukelić avanca ! Posta lipo ministar o soldati. Evala mu kad more ! Zna taj svoj posa ! A vi sad grintajte u Saboru koliko vas je voja. Sanader je opet učinija po svoju. Kontra svih! Ma jebe se njega i za vasi za Evropu..on radi ča ga je voja i basta !
A narod je glasa za njega !
Ma koji narod! Ma da mi je samo znat iz kojeg su kara ti ispali ?
Ajde šjora File ne vridjajte nikoga, lipo Van kažen...
Ala ga...Vidi ti malega...Još će mi se ofendit ča ja govorin ! E jeman prav govorit i nikor mi ništa ne more. Taman još da mi i to zabranidu ! Vidin ja da mi je boje sa njima nego da vi dojdete na vlast. Da bi mi da okinit oli išćupat ovi moj jezik ! E..ko sad brani demokraciju ? Ja oli ti ? A, Baja mali ?!
Ma dobro, govorite koliko vas je voja...Ali ne vriđajte nikoga !
Tiš mi poč govorit da ja nikoga vriđan ! Najboje da napišen molbu za svaku rečenicu - pa kad mi ti udreš pečat..e onda mogu govorit. A dotle...kuco ! I stavi ona prst priko svojih zatvorenih tankih usnica.
Šjora File...ma Vi sve izvrčete naopako ča god ja da kažen. Uvik mora bit po Vašu !
Ne, nego će bit po tvoju ! A da i ti nisi niki tajni član o hadezeja ?
Eto ga na..Još ću postat i rođak o Sanadera !
E neš, onega mi Boga na nebesima ! Da si mu rod bija bi, bome, bar uncu pametniji ! Vidiš kako je njemu lipo ! Tvoji su stari splićani....Iz Varoša i Lušca ..Jemali ste puste zemje ovod u Splitu..pa ča. Sad nemaš njanka bokun judskog stana. Eno vas pet u pedeset kvadrati...i još oni pas s kineskin imenon! Mora bit da su puno bistri oti splićani ka ča si ti !? A Sanader je isto živija u Varoš kad njegovi nisu jemali ništa...jerbo su u Split tek došli pa jin je starina u našu Zagoru. E, a vidiš..Čovik se namučija, naradija i bome uspija. Sad jema i ovo i ono...a koliko jeman ćut ni mu za bacit ni vila u Zagreb. Ma di si ti za njega ! Moš samo ti samo sanjat - ali takemu ti ne moš bit rod !
Opet Vi po svoju ! Sve izokrenete !
Ma jeli ? A da si pametniji ne bi po Zagrebu spava po otelima i afitava stanove - nego bi lipo, ka dotur Ivo, spava u svoju kuću, Na oni Pantovčak. Ka i cili pošten svit !
Briga mene !
A bilo bi ti boje da te briga ! Ionako vas svi štracaju. Eno san gledala nikidan onu malu basetnu novinarku iz Sabora. Ja mislin da je to TV Nova. Kaže da jemate plaće o skoro dvajest ijad kuni ! Pa sad ko laže ! Po tebi je to puno manje....A svit viruje televiziji a ne gubavin zastupnicima. Ionako vas svi držidu za lopove i kriminalce. Ma da mi je znat di ti sakriješ sve te šolde ...jer ono ča ja jeman ovod vidit je prava mižerja ako si toliki bogatun ! More bit da si sve posla dikod kod onih tvojih gerilaca u Latinsku Jameriku. E, ti su prava klapa za tebe..da mi ji je oprat i uredit spasila bi se !
Ja ovo više ne mogu izdržat !
Pa nemoj ! Ko te tira da su menon čakulaš. Ne mogu ni robu prostrit o tebe. Pravo si livo smetalo !
Kako me ciloga izvriđala dignen se da odem ča !
Ma di ćeš, tukac da bi li tukac jedan ? Oli ne vidiš da te zajebajen ? Pa kad te mogu drugi podjebavat ča ne bi i ja !? Oli moja manje vridi o njiove ?! Znan ja da si ti još dobar kakvih jema.
Pogledan je ka da ću je pojist...
A ča me tako gledaš ? Pa ne fregajen ja pod s tobon ka sa staron štracon nego oni novinari na televiziju koji mislidu da si uvatija Boga za bradu kad ti Sabor plati put do Zagreba..oli noćenje u otel ! A najdraže jijn je vadit vama koji niste iz Zagreba mast - ća uopće spavate po noći. Vi bi, po njima, tribali poć spavat na željeznićki kolodvor u čekaonicu o drugega razreda - ka ča san ja činila kad bi došla gori ! Oli bi ste tribali leć u park na Zrinjevac na klupu i pokrit se novinama i guštat spavat u našu metropolu. Sad van umisto oteli dajedu da spavate u stanove. Ma Boga ti - otilo se gospodi spavat u posteju po noći ! Ma jesi li ti vidija luksuza ! A jema bit da kad oti novinari dikod gredu službeno da jin nikor ne plača ni put ni za noćit...nego spavadu di stignedu. Po tleju o pothodnici joli na kakvemu trgu ili travu o parka. A oni kulturniji ispod kakvega spomenika!
Neka njih šjora File moja !
Ma ča...neka njih ! Slušaj ti mene dobro ča ću ti ja reć. Triba tražit da Rvacki Sabor bude u Splitu. Ma ko bi moga jemat ča protiv ? Je li boja klima ? Je ! Je li zdravija arja ? Je ! Je li more svakomu isprid nosa ? Je ! Pa ča bi tili ? Neka oni onda putuju na Sabor a vi stojte lipo doma i nečedu vas novinari štracat da ste na trošku o države - jerbo ćete spavat u svoje posteje doma. Evo, ča bi tebi falilo da ne moraš stalno putovat u Zagreb ? Ništa ! A lipo za prominu neka oni putujedu u Split. Jerbo ovako ispada da ste vi , koji nste iz Zagreba - samo niki teret i nevoja za ovu državu. Najboje bi bilo, po otima, da su svi zastupnici iz Zagreba. Pa ne bi tribalo nikome nigdi putovat...a i naši žurnalisti se ne bi jemali zašto jidit. A osim tega...i oti novinari koji pišedu kako jemate puste privilegije jer spavate u posteju - lipo bi se naputovali a jemali bi šansu spavat oli na Merjan, oli na Bće u salbun...oli u otele - ako jin redkcije platidu ili još boje, ako sami sebi platidu.
Ajte šjora File lipo u smokve, još ćete mi novinare navalit na kosti. samo mi to fali !
A ća si se omar upiša u gaće o straja !
Evo - ja ji se uopće ne bojin ! Ča mi moredu ? Puvat ! A još san jemala ćut da niki od njih jemadu plaće o kojima ti, Marinko moj mali i naivni, moš samo sanjat...skupa sa svin svojin skulama koje si finija ! A sad me, Svetin te Anton o Padove molin - pusti na miru. Evo će mi sva roba požmarit. Nisan njanka jedan lancun obisila sušit zaraj tebe. Ka krpej si..Uvatiš se čovika ovako u nediju ujutro i ne daš mu živit - ka da mi vas je malo slušat cilu šetemanu...Ne bi vas đava nalaja! Ma ko je mene namirija da buden susida baš o političara ! Ča san ja bidna Bogu skrivila da me tako kaštiga ?!
Ajde zbogon Van bilo šjora File...Gren ja po kruv jer ćedu me doma ubit di san više..Proće i marenda a brzo će i obid a moji još nisu ni počeli blagovat.
Aj ča...Ko te drži ! Ovo još nisan vidila: More balit za trojicu ! I uzme ona kesu sa drvenin štipalicama sve nešto grintajući...stavljajući prvi lancun na konop o sušila.
A oden i ja...i to dobro smantan. Smantaniji nego šta san bija kad san se jutros uputija kupit kruv.
Post je objavljen 20.01.2008. u 10:03 sati.