Marketing
moj lipi anđele
Danas mi se učinilo da ti čujen glas. Toliko jasno san te čula i u tome trenu poželila san se zaletit kroz hodnik do tvoje postilje! Moje zlato milo. Nježno te ljubin u mislima i grlin te. Fališ nam jako! Znaš kako si ono morala poć u bolnicu? Pa smo mi došli za tobon i odma san te čula! -Evo moje mame! rekla san doktorici, a ona meni da ni sigurno, boj da ti odmaraš i sigurno spiš. A-ha! Još ni finila reć, kad si ti pasala kroz hodnik, bila si latila ćakulu s nekin starčićen. -Poznan ja moju anđelinu, rekla san. Najdraža moja jedina! Jesi nas vidila jutros, svi skupa smo došli, da se pomolimo s tobom u srcu! Uvik! Volimo te! Jesi vidila kako smo se tata i ja pokarali jutros, onako kako samo nas dva znamo! Jesi se smijala? Kako on ne razumi koliko ženi znači cveće! Teti B. je bilo čudo drago, baš mi je bila lipa onako kad se sritno nasmijala! A ja se sićan tvoga lica kad bi ti donili cveće! Najlipši osmjeh na svitu! Oko moje lipo, pametno, kako bi te sad volila bušnut! To mi fali. Znan ja da si ti sad dobro, da ti je srce puno, da me paziš. I znaš da san ja onda sritna! Samo kad bi te tila dotaknut...onda mi je teško. I zaboravin na momenti da te ni ovdi. I tata je neki dan očistil pun pijat ribe onako kako je činil za tebe, da ti ne bi slučajno drača šla va grlo. I onda je plakal boj nima njegovoga zlata! A inače je dobar, pravi je! Pusto nan je bez tebe, ne znamo ča bi sa sobon, ma snać ćemo se, pomalo.
Pomalo mama, bit ćemo mi dobro, ne brini. Pa držimo se, viš da se dobro držimo! Tata je nježan prema meni, kako si ti rekla, dobar je ko kruh! Evo smo se tek danas malo ćapali! Ni bilo od gušta, ali je bilo dobro! I baš onda je i tvoj jedinac došal pa je stal na moju stranu! Ha! To mi je onako pravo dobro selo na dušu! Ju, ča volin kada je po mome! A muči, molin te! Ki je bil veća šefica od tebe!? Lipa moja draga anđelina! Ma mi smo ti ...mi te volimo, toliko jako te volimo mama! Svi! Znamo mi da je tebi dobro. Smišno mi je ali moran ti reć! Pozdravi mi babu S. i babu T. i barba V i svih!!! I dedi isto i barba F. i M.! Pa vi morete i feštu učint gori koliko vas je! Smij se ti, smij! Moja anđelina, dođi mi noćas u san, baren malo, da te zagrlin i poljubin, a mogle bi i proćakulat malo...Čekan te u snovima! Ljubin te do onda!
tvoja malena
hvala some
Post je objavljen 28.12.2007. u 00:06 sati.