Marketing
Svima želimo Sreten Božić!
Kako ko? ... Pa Vinka, Zakonita i ja .... fala lipa sviman na dobrin željan, i uzvraćamo iston miron. Ako smo kome i zaboravili čestitat, ovin puten se ispričajemo i uz ispriku čestitamo svima još jedan put.
SRETAN BOŽIĆ!
E, puno se toga namistilo od zadnjega posta ... a pravo da van rečen i nije mi se baš dalo pisat. Od domjenka do domjenka, a ja prin toga tri nedilje na režimu smanjene ishrane ... poučen iskustvon od prijašnji godin, zna san ča me čeka, pa san se pripremija psihički. A bome i fizički ...
Počelo je još u subotu ... maloj Lari je bija rođendan. Niki kafić u Splitskome Getu, jedva san ga naša unatoč detaljno nacrtanoj karti kako ću sa Rive doć tamo. Kad smo već kod Rive ...
... ne moreš proč od velike gužve, u ovu predblagdansku subotu uvečer ...
Neka, kvragu i Riva ... i projektanti, a i naručioci, i izvođači, a napose oni ča su se na temu poslu najviše opinezili ... hvala na pitanju, i upropastili spliski tinel (dnevni boravak, za sjevernjake) ... neka nji ... nama je bilo lipo na rođendanu, dičica u jednu prostoriju, di su i zabavljali dvi tete obučene u Dida Mraza ... grubo mi je reč Bake Mraz ... dici je bili lipo, cilo su vrime skakala i igrala se, a ni nama roditeljima u susjednoj prostoriji nije bilo dosadno, dapače, čak štoviše ...
Ni u nediju mi nije bilo dosadno, to nikako. Kako ti more bit dosadno kad greš dva puta do TTTS-a i nazad (odvest Zakonitu na posal i sa posla), dva puta u Kaštila i nazad (do istoimene babe) i dva puta do Trajektne luke i nazad. Odvest strica na trajekt za Šoltu i dovest ga nazad doma. Sa nikakvon mogućnošću da spojin bilo koju od ti điradi ... pustija san korijenje u stolicu od vozača. Koliko je to kilometri? Neman pojma ... ne znan toliko brojit ...Drago mi je vozit auto, ali ča je mašo, mašo je ...
... najsvitlija točka otega dana je ova slika noćnoga okićenoga Splita, slikano sa veza 26 iz trajektne luke ... onda morete mislit kakvi mi je bija ostatak dana.
Sutradan, na Badnjak, proša san bar malo lišije, ča se tiče vožnje, samo dva puta Zakonitu vozit na posal ... ali san se zato usrićija doma. Nikako zasest sredit i okitit bor ... najprin nisan uspija nać mahovinu, pa kad san napokon stavija svičice, onda su se izdile dvi žice pa san mora odit u oca žicat lemilicu da to popravin. Kad smo napokon sredili i kako tako okitili bor, potirala nas je Zakonita da mora malo sredit tinel ... razumin je, nismo baš pazili ča ćemo bacit po podu dok san onako, pun entuzijazma, meća balune na nemoguća mista kako je Vinka zamislila. Jedva san dočeka da je popenjen gori stavit vrh od božićnoga drvca, pa da utečemo vanka.
Tribalo je poć okolo snimat kako je ko okitija bor.
... bor u babe Vinke ...
... bor u dida Dinka ...
... bor u tete Nade ...
... i na kraju se Vinka toliko izmorila da je morala malo i ona ubit oko. I pokrit se sa njezinon specijalnon dekicon, koja najviše grije.
Jedva je išla doma leć. Srića da san njezin dar već bija prinija doma i dobro sakrija, jerbo nisan moga više na noge stat. Ka ča san već reka, od domjenka do domjenka ... ne bi virovali koliko to satare čovika.
I ja, naravno, optimista, osta u tinelu da ću ka zamotat ča smo već svima spremili ... ne triba van govorit. Probudila me je žena u tri ure na kauču, da oli san poludija i neka gren leć u posteju. A ko san ja da je ne poslušan ...
Tako da smo sve umotavali ujutro. Naravno, prvo Vinkin dar ... kojega je ona jedva dočekala otvorit. Cilu kašetu LEGO kocak, i to oni mali, a ne DUPLO, jer je ona već velika djevojčica i more se sa njima igrat, pa da more radit i prave kućice i nebodere, i avione i svašta nešto ... kojon je brzinon iskidala papir, nisan njanci uspija snimit ...
... i naravno, nakon toga je bija osmjeh od uha do uha ...
... a tribalo je malo poć i okolo kolendravat. Najpri smo svratili do babe Slobodne, di smo našli i Tonija ... pa se Vinka morala slikat sa Tonijen za njegov prvi Božić.
.... a sa teton Nastijon se slikala koji dan ranije jerbo je mala iz Venecije donila niku priladu pa su in svi u kući fibrali ...
Sve u svemu, mislin da je ovo bija vrlo dinamično proveden Božić, a da ne spominjen danas našu tradicionalnu, na Sv. Stipana, utrku u turanju kareti na balinjere ... koja je počela sa Glavice, kad je puka top, točno u tri ure pozapodne ...
... to be continued ...
Post je objavljen 26.12.2007. u 17:03 sati.