E, oču pa oču...glasat ću kako me je voja...i basta! Evo gledan na televiziju Ivaniševića, pa Đogaša, pa Metličića, pa onega Kovača ča spominje brata Roberta...i pun mi je kufer. Glasat ću kako je mene voja a ne kako mi naredidu...Tako da odma znaš! Da ti nije palo na pamet i rič prozborit...Za mene je već počela ona pridizborna šutnja. Evo, mučat ću ka riba. Moš me peć na gradele ma neš iz mene ni rič izvuć...je si li me razumija !
Ma jesan šjora File moja...Ma ko vas ne bi razumija ! Nećete više ni riči o izborima.
Nego ča...Neću pa neću..nakostreši se šjora File i prikriži ruke priko prsiju...jidna i crvena ka paprika.
Eto, čitala san onega Sanadera jutros. Ma molin te Bogon...kaže kako je važan jedino Lider ! Muko moja Isusova, ma jesi li ikad čuja luđe stvari o jednega političara koji bi, ka, vodija narod za sebon. Ma kakavi je to napuvani paun kad jema muda kazat cilemu jednemu narodu da mu ni stalo do njega njanci ka ni za crno ispod nokta. Jedino je oti sam sebi važan...e ! Ke beleca o čovika !
Ma dobro, jesmo li rekli šjora File da nećemo više o politici ?!
I nečemo, tikvane jedan...moš me klištima ščipat i vadit mi zube naživo...Moš me kuvat u vriloj vodi ma neš ćut nijednu rič višje od mene...Mučat ću ka zalivena...Dosta je meni ote politike. Na vrj glave ste mi se svi popeli !
Ma... je li i ja ?!
A nego ča... Eto stalno me tantaš da ništo govorin, ma me neš smantat. Rekla san ti već da je za mene politika krepala..i finito. Jesi li razumija ?!
A evo..jesan...
Ma razumija si ti muda Marjanova! Ka da te ja ne znan. Sad bi ti tija da ti ja ovod počmen beštimat i govorit grube riči o onemu našemu župniku ča je nikidan ovod na Pujanke u Sv. Pavla pozva jude da glasaju protiv esdepeja i haenesa! A neš to čut od mene...Bogami neš! Ma...isto, naš kako me je najidija. Deboto san bila pukla o jida. On će meni poć palamudit kako ću ja glasat.....Umisto da se bavi božjin poslima on bi se bavija politikon! On bi umisto u Župu tija u Sabor! Ma ni pita ko je iz koje stranke kad je skupja šolde....kad smo davali, koliko je ko moga, za izgradnju Crikve u koju sad on drži svoje političke govorancije.....namisto da služi Svetu Misu.
A to je oni don. Ante Vranković !
E je...baš oti. I još je na kraju natira zbor o Crikve da zapiva hadezejsku himnu! Ma dobro san ga isfregala! Neću mu višje nogon u Crikvu dok je on tamo!
Ma nemojte...
Ma ča...I Nadbiskupu ću pisat...Neću ja tako lako molat. A ne, ne...
Vidin ja da se moja susida uozbiljila i da se nikako istegla ka šiba i vidin kako je župnik strašno najidija. A znan da je bogobojazna i dobra žena, puna milosrđa, dobrote i rišpeta prima Crikvi. Znan da je uvik svakome ko je bija od potribe pomagala koliko je mogla....i da je jedino malo brza na jeziku. A to u Splitu i nije neki veliki grij. Lipo joj kažen da se nije vridno poč nervirat zarad jednega takvega ispada našega župnika, ali se ona nikako ne da smirit...
Eno ga..Neka i on gre u Mimarin muzej di će hadezejci čekat rezultate izbori. Neka navuće oni plavi šuškavac ča ga dilidu okolo i neka navija za Sanadera u svih šesnajst...! A ne da mi ovde truje dicu politikon..usrid Crikve. Neka gre u oti muzej..tamo mu i je misto...ka i cilon hadezeju, pa neka ji dičinje ekskurzije obilazidu ka nike eksponate iz prošlosti. Fala Gospi...napokon in je došlo u pamet da je njiovo vrime finilo i da gredu na prašnjave škancije o muzeji....
Pa nisu oni stvari da ji mećemo u muzeje..
Ma ko ih je stavija u muzej ?. Otišli su sami tamo di jin je i misto! Pa neka ji lipo dojde obać i ona Angela Merkel..Ajme ća je šesna....Kaže Sanader u "Mosorijadi", na televiziju... kako je ona najmošnija žena na cilemu svitu. Ma bome, meni se pari da i ne piza baš puno...jer čin gre njega podržavat...nešto meni tu smrdi - i to na daleko! Tako je ona drukala i za onega u Sloveniju...Ma kako se ono zove ? Enti ga miša...A, a ...sitila san se, za onega Alojza Peterlea. Pa je i oti popušija da ni moga gore...Tako će joj proć i ovi naš dotur o ničesa...A i Mosor će mi dat škicu... Doša je radit propagandu Sanaderu u zanju svoju emisiju prin izbori...Lipi livičar...za krepat o smija!
Ajme grubi riči !
Ma vidi ti ča si mi se naglo profinija, Mariko moj mali...nemoš o finece! A nije grubo kad on izlipi deboto cili Split svojin slikan ka niki Kraj i Gospodar o cile Rvacke ? A..to ti je lipo? Ma pusti me stat! Dosta mi je oti lažjivaca i farabuta! Odnili su mi penšjun, nakesali su se...ne znadu ča ćedu o grandece a do nikidan su bili gladni kruva. Sad jin falidu zlatni žveljarini, opere i prinčipese...Glumidu važne čunke a do jučer su se rukavon o košuje brisali kad bi pojili pjat juve... oli pjat riži na pjuvaku...Ma nemoj ti meni ovod pametovat jerbo češ i ti dobit jednu priko uva!
Ali..
Ajde molaj me se, mali...Oli ti nije jasno da bi za šaku šoldi i Dioklecijanovu palaću dali svojin kunpanjonima ! Jesi li vidija da su prodali gradske Bedeme na koje je naš bivši intedant natakarija svoje sliketine ?! Jebe se njega za spomenike kulture. Litretaje se taj po cile dane - pa poslin tira jude da lipidu te njegove litrate. Zaraj njega su izbužali Bedeme ka da su od sira! Ni Turci se na nji nisu uspili popet. Ali on je! Grad se obranija i od Turak ! Ali od njega nije! Naš Dotur se popeja tamo di niko nikad nije! Bit će umislija je da je i on nika kulturna vridnota koju triba zaštitit zakonom...Ma ča će nan višje i Crikve..gremo se svi molit prid plakate o Ive Sanadera..jerbo on sanja da je niko novo božanstvo. Ka da je, Bože mi prosti, išempja... oli se napuva ka cvrčak prin nego pukne od napuvanosti ?!
Ma koji sad cvrčak...?
E oni od Vladimira Nazora ako baš očeš znat! Eto baš oti! Ili oni od onega francuza...an... La Fontena...ča ništa nije radi nego svira i kreja Bogu dane pa je na kraju otiša u bekala...Eto, jedan..od tih! E, baš je lipo crvrča u Mosora na televiziju sinoć - A Mosor mu je gudija cilu većer i stalno begenava, piva drugi glas...Ma nisan ja njemu od oni njegovi ča ji trpa u autobuse i vuće za sebon na po pet stranaških skupova na dan...za tristo kun... da mu plješćedu i mašedu zastavican. Pa ja bi toj jadnoj studentariji dala ijadu kun na dan! Jer moš mislit koji je to posa, koja je to muka i patnja...slušat Dotura Ivu pet puti na dan...kako gudi istu melodiju i piva istu pismu. Ma teže je njima nego rudarima, viruj ti meni...Ni lako danas bit hadezejac, pa ni honorarni !
Eto virujen Van, nego moran poć...kasno je!
A jemaš i ti prav. Kasno je moj Marinko....triba poč otpočinut, čekadu nas u nediju izbori. I nemoj me tirat da govorin za koga ću glasat jerbo mi je dosta i našega župnika Vrankovića..... Samo mi ti još fališ! Ovo su tajni izbori i ni na najgorin mukan ne bi iz mene niko iscidija njanka jednu rič o temu za koga vaja glasat. Nikad jin ne bi odala da ću glasat za SDP...A ne, to neću nikomu reč jerbo oni do kojih je meni stalo - ionako su pametni judi. Naš obišan, pošten...domaći svit. A oni jemadu i sami svoju voju - a ne da jin neko gre govorit za koga je najboje dat glas !
A kad je tako, moja šjora File, onda kuco...nikome ni riči!
E, bome...baš tako. Nisan ja od oni lajoni ća ne moredu držat gubicu začepjenu ni po ure...Kad ja mućin onda mućin...ka greb...Marinko moj mali! Takva san ti ja pa ča mogu ! Nemoš me prominit !
Aj Bog!
Zbogon Van bilo šjora File i vidimo se u nediju kraj škatuli o glasanja !
Kuco...cukunu jedan, da te nisan višje čula nijednu rič! Jesan ti lipo rekla da neću o politici !
Post je objavljen 23.11.2007. u 20:44 sati.