Jučer je dan počeja s buron. Izgledalo je da će bit po onoj: "Tražit će zec svoju mater"! - ali nije, vrime se smirilo...sunce je ugrijalo i bija je lipi zimski dan. A i kome smeta bokun bure. Neki je jedva čekaju da malo rasfriška misli i rastira onu memljivu južinu. Diš lipše, nego se popet na drugu Vidilicu na vrj Marjana kad bura rašćara nebo i kad pogled puca sve do Visa!
A u subotu je vrime bilo deboto ka usrid prolića. Išli smo u Dubrovnik na SDP-ov skup u športsku dvoranu koja je bila puna ka šipak. E nije Dubrovnik odavna vidija toliko šesnog svita na jednom mistu! Judi su se skinuli u kratke rukava kakvi je to lipi dan bija. Čini mi se da su jedino ozebli hadezeovci , onako oko srca, kad su vidili otoliki svit koji se skupija pod esdepeovskin barjacima.
Čulo se puno pametnih besid: Željka je rekla kako je Sanader privatizira svoj HDZ ali da mi nećemo dopustit da privatizira i cilu Hrvatsku! Zoran mu je lipo poručija da prestanje višje toliko lagat - jerbo ijadu puti ponovjena laž uvik ostaje samo laž! A ko mu i more još virovat ? Ja mislin da ga i doma višje ne bacilaju i ne uzimju zaozbiljno kad počne pričat one svoje monade !
U nedilju navećer šjora File je ka i obićno svratila na čakulu i bićerin prošeka...Sva je kurjoža...da kako gre kampanja...da ća ji žešće ne opalimo, i onako uvik isto po svoju - grinta.
E,a posebno je snerva naš spliski književnik Ante Tomić.
Ma jesi vidija, Mariko moj, ča te ištraca u fojima ? Mali mi je sve jutros najranije proštija... Ma zamalo san pukla o jida !
A zašto ?
Ma ča zašto! Kako moreš to pitat ? Ma koja je on to važna ćunka pa da tebi dili lekcije ? Ča on pati od nike grandece pa ka dragi Bog sa nebesa pjucka okolo po drugen svitu ?!
Ma nije šjora File, to Van je jedan puno fin čovik! Literata !
Ma ča fin...ma koji literata ? Litretala bi ja njega tako da nikad ne bi zaboravija....
Ma ostavite se, molin Vas grubi riči i šporkega jezika kad govorite o našen svitu od kulture!
Kulture ? Pa oli si i ti rebambija ? Koje kulture ? Pa on ti je reka da mu greš na jetra ! E, pa jeman i ja onda prav kazat da i on meni gre na niku stvar...i te kako ! Ma ča će on meni poć govorit o temu ko mu gre na jetru. Gledala san ja tega šempjuna na niku televiziju...ča ja znan koju, kako tamo u niku splisku konobu, čini mi se u Varošu - jide ribu i pije sok ! Ola lipega čovika ! Riba i gusti sok ! Omar je tu meni nešto zasmrdilo ! A oklen je on ?
Ma ka da je to važno šjora File...judi su judi. Molin Vas molajte..ostavite se i njega i tega šta on jide i pije...
E, baš neću ! Moš ti parlat koliko te voja...A ča on to ćuva jetru pa zato ne pije žmul vina poza ribon ?
Ma šta ja znan...Baš me briga za njega...!
A znan zato ja ! Vino mu ne gre na jetru pa mu, eto ti greš zato na jetru ! Ti si mu ka nika zamina za vino !
Ola ća ste sad smislili !
A možda te ne voli jer si esdepejac ?
Ma nije, šjora File, kad Van kažen. Njega Van držidu za livičara...Ka, ne voli on HDZ i otakove..šta ja znan.
Ma Bogati...a slabo san ga ja vidila na sliku u foje kako sidi sa Sanaderon ovo lito u Semafora i ćakula s njin ...
Pa šta onda ?!
A i ti si šempjast! Da pa ča onda ?! Oli ne vidiš da su oni u šape...!
Ajme meni šjora File, niman Van ja vrimena za ote razgovore....Moran se spremat za sutra.
Ma je li...Sad ne bi tija pričat kad je on otra pod s tebon. Ka sa štracon !
Ajde, neće bit baš tako...!
E oće, oće...Marinko mali. Oli ne vidiš da te gadi da kako si predava na skulu o nikoj diktaturi proletarijata !
Ma ne razumi on to, šjora File...Ne virujen da me je ikad čuja kako i šta ja predajen na fakultetu !
A ja san čula da je on zet o dotura Tukića...a ?
Ma je...Doktor Tukić je jedan krasan čovik. Puno san u dobre š njin i to nema nikakve veze..
A ča je on vazeja doturovu ćer za ženu..?
Ma je, pa šta onda ! Eto, baš san njoj ja predava na fakultetu....
Asti ga malega miša...Ma vidi ti, a ko bi reka ! Pa ča mu ne špjega kakvi si ti bija ?
Ma ne znan, Božja ženo..a nije me ni briga...odgovorin joj oštro jer mi je već dobro digla tlak...
Je, je...ma isto on tebe vriđa. Moš ti pivat tiću moj koliko te voja. A čuja bi on mene da san ja na tvon mistu !
Ma ne pada mi na pamet poć se karat š njin ! Eno ga...nek piše šta oće, triba i on živit od nećega !
Ma Bogati ! Najlakše je gadit druge ! Eno ti je napisa kako bi mora naučit vozit motorin i poć prodavat pice, oli kupit krepane maške po spliskin ulicama ili tribit gamad...bit će u "Ciana" - ako i to poduzeće ni opljačkano i propalo ! A ti samo mući mučalo jedno...kad te tako voja...ka šticala se ona malo.
Ma šjora File ča kazat čoviku koji priča monade i kojemu je ka ništo nevajalo ča san radija na fakultetu ? Ča ? Da učin vozit motorin ? Moga je reć i bičikletu ! Pa ja san po života proveja na motoru i obaša po svita š njin! A ča on bidan zna o temu ? NIšta ! A i jebe me se ča ne zna ! A gamad ! Je - gamad san uvik spreman tribit pa ma kako se zvala i držala i ma ča o sebi mislila ! Samo nima tega na ča se gamad ne privikne - i nemoš je nikao istribit! Lizu iz svake buže i pipadu oinin svojin ticalima - trčidu okolo i ni atomska jin bomba ne more naudit. Eto takvi su! I ča ja tu mogu ?
Ma dobro, nemoj se sad ti poč jidit...Marinko moj.
Ma ne jidin se!
A jesi, jesi...vidin ja to.
Ma nisan !
Aj dobro, nisi..namigne ona šerjasto. A jeli....a ča je njemu oni Tukić iz Velog Mista...Oni ča se bavi pinezima !
Ajme meni, šjora File...ostavite se njegove tazbine, prijatejov, susida i poznanika. Nimadu oni nikakve veze š njin. On je svoj čovik..onako, na svoju - ka niki umitnik!
A je, je...vidila san ga ja u onu španćeru. Ne skida je nikad s glave. A vas je nikako usukan, suv ka grana o barakokule...ma čini mi se da jema puno bodji po sebi. E, ne bi ja tu čunku nikad zaboravila - tako je, pa ča ja to mogu. Moga bi i u Jamerike za glumca u one strašjive filmove dignit dobre pioneze...
Ajde, šjora File, boje popijte svoj bićerin i lipo polako doma...
Ma jel ti to mene tiraš ?
Bože oslobodi, samo se Vi komodajte...nego, već je kasna ura.
A nije, nije...za pametnu ćakulu nikad nije kasna ura. Nego reci ti meni a ča se on to namečija na tebe? Ča mu ti smetaš ?
Ma oli ja znan a nije me ni briga. Kaže da san pesto godin u Sabor pa da bi se triba valjda maknit...!
A oli je on u SDP ?
Ma nije...
Pa ća ga se onda jebe koga SDP stavije u Sabor...?
Ko bi ga zna ? Sto judi - sto ćudi, moja šjora File !
Ma Boga ti...a on bi triba ulist u Sabor umisto tebe! A tod njega srbi...sad mi je kjaro....ka nikako pametno ona se iskrivi i digne onu svoju tanku, blidunjavu ruku. značajno u arju Znaš ča...ja ti mislin da on jema i prav..Eto ja bi ga izabrala za vićnog zastupnika...Kako se ono reče..an, doživotnog sabornika. Bar bi nan Sabor lipo figura jer otake ćunke malo se jema di vidit !
Ma šjora File, molin Vas....nemojte ! Ni to razina !
Tiš meni poć govorit ča je razina. Je..vidin ja da oti literata pati od velike finece. Ka da je popija svu pamet ovega svita. Ka da je jema sluškinje doma i učija francuski ka bambin! Ajde, Marinko moj,,,znan ja takve, Obuka je oti široke gaće...ma mu se žnjuti još vididu..viridu mu iz gaća Još si ti zelen da zeleniji ne moš bit ! Ništa ti ne razumiš ! Ma..vidin ja da meni ovod više nije misto, da me stalno tiraš a ja san te tila samo svitovat, Ka mater.. Gren ja lipo doma. I ka jutito se digne i krene prima vratima o stana..Onda zastane, vrati se nazad i ispije bićerin prošeka do kraja.
A ovo, da ne bi ti mislija kako san ja nika žena bez kreance....Aj. laka Van bila noć i stojte mi svi s Bogon! A sa hodnika mi još dobaci: A neš ti zanata u našeg literata ! Jer naravski , njezina uvik mora bit zadnja...
Laku noć. šjora File moja !
Post je objavljen 06.11.2007. u 09:14 sati.