Marketing
Pijaceta moje djetinjstvo
Evoga. Pijaceta. Grad Rab.
Tude smo se igrali kad smo bili mali. Danas dođen, seden se na zidić, gledan more i meditiran. Doli po skalinama se dođe na lungo mare i tude se i kupan leti. Ko je ki bil žajan, je šal susedi na barkun i lipo pital čašu vode. Ko je kome bilo sila, je šal va prvu kuću. Vrata se nisu zaključavala. Tude nas je mama mogla od tarace zazvat večer, ka je bilo vrime za doma. Vaik je morala sama doć po nas boj smo ka dica slabije čuli. Blizu je sve. I butige, i škola i kino...Kad san bila mala hodili smo va kino gledat Sandokana. Bože moj, sića li se ki toga? Ja onako, krozi maglu. Gledali smo mi i Vinetua, Bruce Lee mi je bil idol! Kauboji i indijanci. I onda se posle filma sjatiš na Pijaceti. Kolike generacije su se tude odgojile...sićan se kako smo igrali nogomet. I ja, samo da se moren derat "evo Tigana! evo Tigana!" To je bil neki nogometaš u ono vrime. O Pijaceti san sanjarila ka san bila va belome svitu. Kako bi bilo lipo sest na zidić i vit naše lipo more...Na Pijaceti san koliki put zaplakala...ka mi je bilo teško. Na Pijaceti san se i prvi put poljubila. To je moje najdraže mesto na otoku i evoga dilin s vami. Uživajte, ko morete. Boj siguro i vi imate neko mesto ko van je čudo lipo i drago. Pa me razumite kad van rečen....ja ovo misto volin. Jako ga volin.
Post je objavljen 29.10.2007. u 17:07 sati.