Marketing
"every family has one" iliti FAMEJA!
....ba ba black sheep have you any wool...prišuljalo mi se jutro onako,pokvareno,na prstima i onda...BANG!!! Udri po glavi i PLJUS!!! mrzli tuš odma po meni,još san spala napol!Ča ne čekaju da se prvo zbudin,razbudin,pa onda BRING IT ON!!! A ne ovako!To je taktika,znan ja!Lati me dok san nemoćna...svaka čast!Poštujen ja svaku taktiku ča nosi rezultati,ma ovo je okrutno!!!A i ni in puno pomoglo,boj ima nike stvari ča me ni polukrepanu ne moru zmantat!!! Ne!Ne!I ne!Ja san takov stvor,kako osićan,tako se držin.I da oću-,a neću,ne bi mogla drukčije.Kada god san se provala prečinjat u životu,samo bi me zabolil drob,a niš toga ni vridno.I porid toga,kako san čera rekla onome dragome čoviku ča je bil popravljat net,(i opet rano jutro,ma to je druga štorija)...ja svi živci ča iman šparan i trošin kod moje mame.Sve extra mi je puno previše i to škartiran ča brže i boje moren.I onda me vrag tenta poć počat ono ča ne moren finit!Ča je meni ovo tribalo,nać se va sridi,med tuđin kričarijama!!!A znan,z famejon je teško reć ča je tvoje a ča njihovo...baren meni.I opeta,moran onako kako mi srce zapovida...ili ću puknut!Ma jedno je,-sada mi je basta i previše i malo ću poć stranu i čekat da me pasa pa ćemo vit.Teško je z famejon!Volin ih i obožavan,ma ki put mi dojde pet do podne...i sad znan,moran se kalmat boj ko sad iden još ča govorit,morebit mi posli bude žal.Samo neka me ne tražu,umorna san.Znaju oni svi da se na mene more kontat,da ih volin,ma boje in je da me više ne rastežu svaki na svoju stranu!Ako voliš i jednoga i drugoga,ča učint ka se pokaraju...Biž glavon bez obzira!!!Ne daj se va to ćapat!Lako je to reć,ma mislin da ću se od sad toga i držat.Reci mi ča te muči,poslušat ću,ma provaću tude i stat.Neću više tu politiku va svoju butigu,ča bi rekal dragi meštar!Koliko se sićan,i njemu je poverome bilo kako i meni!on trubi da neće,a oni ga niki ne obadivaju nego,udri po poverome čoviku...I tako mi dojde deset uri i pomalo se razbudin i triba počat s poslon i obedon i sve to...i osićan se prevarena...boj san lipo mogla dat mami ist i medicinu i poć još dvi ure spat.To san sama kriva.ma isto,svako jutro ovako...kada ću ja ćapat pameti?!Ko nisan do sad...ni vrag da me nikad neće prosvitlit...pa se tišin...morebit iman kasno paljenje...pa me pamet lati po stari dani...ju! Bože daj mi strpljenja.Ma brzo! 
Post je objavljen 10.10.2007. u 09:19 sati.