Franeee, evo javjadu da izložilo carska jaj u Grad. Carska jaj pokažiju svitu. Čuuuuuuj carska, eeeeeeej!!! Kažedu da i samo devet moglo stat u Grad. Da devet?!?! Da saaamo!!! Devet me kolpi safatalo kad promislin i na ti devet...
Jes čuja za ovo - bija niki ruski car koji jema puno puno jaj, tolko jaj da je to milina, ovaj mirakul...ima tolko jaj da mu u Grad nemoredu stat! Ma nisan infišala, eno piše na teletekst! Je, je, istina je, mora bit istina, eno piše crno na bilo...ma obratno, bilo na crno...nima veze, piše čoviče onako kako ti uvik tražiš napismeno.
Evo saće dnevnik, požuri s oton kobasicon, ča je tolko piplaš i rastižeš! Pari da si dite. Ajme ča me nerviraš. Neću ja zbog ote tvoje đelozije propustit carska jaj. Ma e, ne nisi. Pričaj komu drugon. Tiš prat pjate,za kaznu!
Vidi boga ti, da i je jema čak 52!!! Isuse i Marijo!!! Straota od Boga! Ne viruješ opet. Evo ti laptopoć pa čitaj. Pa da, sad ti očale nevaljadu, a onda mi viruj,e... K vragu, kaš više napravit nove!
Ajd sad, molin te ka Boga, sidi više s miron tu kraj mene. Daj mi ruku, sva nikako dršćen... Ma vidi manita čovika, biš ča, dan ti ruku a ti bi oma...Samo me malo straj gledat. Ajme Frane ni u snu najluđen nisan mogla zamislit da živ čovik more imat tolko jaj. Noćas oka neću sklopit...
Ma di sad reklame da in reklame jarčeve...
Kakva li su mu gospe draga?! Mora da su mu o zlata...Dabome da jesu...Ča se smiješ, kad je car,e...O dijamanti, smaragdi, bisera. Ta nisu mu obična. Car je to bija, eeeeej, car. Carska jaj!!!
Ma di sad baš moraš ić pišat, piša si prin deset minuta. Uvik kad je najnapetije ti moraš pišat. Pođi u drugog likara, ne virujen ja onemu od niki dan. Ja san ti najboji likar ma me nećeš slušat.
Evo jiiiiiiii, požuriiiii! Ajme lipa li suuuu...mmmmmmm Gospe mojaaaa....a nisu ni mala bome. Jooo da mi i je pipnut pinku, ma taknut...ne bi ji tiščala jako. Ma osiguralo i da ni muva nemore do nji. Eno i s puškaman čuvadu.
Da zašta?! Kad ti moraš uvik pišat...To je blago cukunu dabili cukunu, to se smi samo gledat i patit! E, dabome, blago, a ča si ti bija mislia?
Bila san išla leć, pozicionirana strateški. Frane već hrče, lega davno.Čin se naji zaspe ka cok. Oči zatvaran. Brojin ovčice: jedna, dvi, tri...pet, šes...sedan...osan...devet jaj! Jaja na oči padaju. A san neće.