Eto san jutros najranije mora skoknit u našu malu butigu isprid kuće da maloj kupin marendu prije nego šta ode u školu kad sam naletija na našu šjoru Filu. Stoji na trotuaru. Gleda s obe bande ulice...Tonobili juridu gori - doli.....deboto ka na utrkama, pa stariji čovik ne more nikako priko.....a zebra je daleko. Uvatin lipo šjoru Filu šotobraco (ispod ruke)...dignen drugu ruku, ka niki prometnik, u zrak - i polako zajedno priđemo cestu.
Ajme, fala Ti sto puti, lipi moj Marinko...okad te nisan vidila !?
A je, je...šjora File, stalno san u gužvi...Ni doma me ne vididu baš ćesto! Odgovaran ja.
A kako žena...dica? A bićedu naresla ?
Ma i nisu baš previše naresla od kad ste ji ono nikidan zanji put vidili....tumačin joj i sve onako, s noge na nogu, polako gremo prima butigi.
A di ćete Vi.?....pitan je iz kortešije
A gren kupit dvi - tri banane za unuka. Lipo mu ji smečin svako jutro, onako kučerinon u pot pa mu dajen jist...Ajme ča gušta to pojist, ćudo jedno!
Neka, neka...ala, ala...samo polako da ne bi di opuzli !
Nemoj Ti brigat Marinko moj, još san ja žvelta...odgovara ona, ne puštajući mi ruku.
I tako dođemo , konlafjaka, leđero, do butige. Ulize ona unutra, ja za njon....a tamo već pet šest žena, dice i nešto starija svita. Kupuju se marende.
Dobro jutro šjora File! ..čuje se sa svi strana.
Dobro Van jutro! Zdravi bili! ..otpozdravja ona.
Onda, vidin ja da ste Vi još puni force.....govori blagajnica.
Ma je, niman se ća požalit...a i mali Marinko mi je pinku pomoga...Jedva san cestu prišla od pusti tonobili..a ča je najgore nemoš proč ni trotuarom od nji...Samo ča nan se na glavu ne parkiradu...odgovara ona sva jidna..
I odma se užge:
A onii cukuni u Poglavarstvo očedu smanjit parkirna mista u gradu ! Ma ne moš povirovat. Ukidaju nan parkirna mista...ali samo ona, kako se ono reče "s javnom namjenom". Oti naši gradski urbanisti su skroz podivjali oli poludili!
Ajde šjora File, nemojte tako...Vi ste uvik kontra ove vlasti...uzvrati joj jedna gospoja.
Ma ča!
Ma ča kontra? Ma ja san i višje od tega. Pa to je živa napast za ovi grad. Ni nji briga za nas...nego samo za sebe. Očedu gopoda gradit one Buljine garaže ispod Prokurativi, jerbo se ne denjaju prošetat od Starega Placa do Rive...ali zato ukidaju parkirna mista svugdi drugdi! Pa oli smo mi mone da ne vidimo ča nan se š njima sprema ?! Ma dajte, molajte...jer će mi tlak odma skoči na miljun. Ma di su Van oči? ..razvezala se moja susida.
Ma nemojte tako!...opet če ona gospoja. Triba razumit naše gradske oce!
Moooolin, ma ča ste rekli...Ma koje oce...nisu oni meni ni očevi ni matere. Nisu oni meni ništa. Oni su peronospora za ovi grad. Oni ćedu ga rastočit ka kankari i pojist ga ka mi ovu marendu ! Ma ne bi ji ni štapon takla kaki su...Ona van ih na...pa ji lipo vodite doma..kad su Van tako dobri! - raspalila se ona.
Ma.....
Jadna gospoja nije niti zaustila kad šjora File jopet krene opet u napad:
Ma šta Vi tu meni mamajete...ma ovo, ma ono...Znadete li Vi gospojo moja - nakostreši se ona ka niki ora ili tica grabjivica - da ćedu nan te guzonje ukinit 65 parkirnih misti na Trgu Rvacke Bratske Zajednice, na Plokite još 200 misti , u Mažuraničevu ulicu 50 misti ... pa 250 misti u Ulici Moliških Rvata....Ma jel Vi vidite koji su to mangupi. da mi je samo znat čime su Van to uzamličili oči pa ste tako slipi
A, eto, su odustali od gradnje kuć na Merjanu....ne da se ona gospoja.
Moooolin!
Odustali? Ma znadete li Vi ča govorite...ma di Vi živite...Prvo je oni novi poteštat Kuret lipo u foje reka kako ćedu napravit "radikalne promine u Genaralni urnanistički plan" i dozvolit gradnju vila za bogatune na južni dil Merjana...kojega cili Split čuva ka joko u glavi! E tu se priključija i oni Poljanić iz Poglavarstva...da kako je to dobro i da će to bit prava stvar. Pa onda oni Rošin...Oni ča je niki savitnik Sanadera za okoliš...i on se javija...da ća tu fali. A kad se narod uzbunija i kad su počeli skupjat potpise protiv tega po gradskin ulican...pa kad su vidili da je Đava odnija šalu, onda su prominili i pismu i bandiru. E, onda je ti Vaš poteštat , ka zanja plačipizda, počeja kukat da kako on to nikad nije mislija ča je reka, da ne daj Bože izgradnje vila po Merjanu...da će i on poč svojon rukon potpisat peticiju i sve tako. Udrija čovik ligadinu! A Vi mu povirovali. Ma bogati, ka sad bi svi mi tribali bit cukuni koji ćedu mu povirovat jer je on staron štracon izbrisa sve ča je reka prije par dana. Ma di to jema? Nema ni u Bijafru, ja van kažen!...zapinila se šjora File.
Ali....piokuša ništo reč već zamantana gospoja..
Ma ča. Ali...Ma koje: Ali....A ča oti Kuret, oti Poljanić i oti Rošin ne kažedu zašto i daje ostaju pri odluci da Nadanu Vidoševiću dozvole izgradnju stanova u Meštrovića Atelje ča ga je kupija...jer prijašnji vlasnik Paško nije moga nikako dobiot te dozvole..jer u ton dilu Merjana zakon to nikad nije dozvoljava.? Tražija je Nadan, lipa gospojo moja, i od bivše gradske vlasti te dozvole ..ma ji nije dobija jerbo su čuvali Merjan..a ovi, ovi su mu odlučili sve dat ća mu triba da to pritvori u stanove. Je, je..čitala san ja kako se Nadan zafaljiva Rošinu u fojima - da kako jedino on razumi artište i umitnike pa je bi kapac razumit i njega. Jer, tamo će Nadan izložit umitničke slike ča ji je u ovo ništo godin uspiuja nabavit - da ji spličani mogu obać u njegovu merjansku galeriju-vilu. A zato će njemu grad dat ono ča nikomu nikad nije da...Da tamo izgradi dva stana..da se jema di odmorit, da jema di protegnit noge, ubit oko poza obidon...kad se umori od pustih umitničkih napore..jer će on bit ka neki kustos tega svoga muzeja-vile! Pa jesmo li svi mi šempje pa dademo da nas otaki vućedu za nos....jerbo kada je to kupija gospodin Nadan..onda se tamio ni moglo stanovat a sad će se moć... pa ti sad vidi koliko je skočila cina takvon ateljeu....Gospe moje, ća nan radidu...rašireni ruku završi šjora File.
Parila je ka niki propovidnik, deboto svetac.
Svi su bili kuco. Niko ni da zucne. Mrtva tišina..jedino dica grintaju.
Ma ča ste ono tili kupit šjora File...upita je mala prodavačica da prikine tu ka neku dramatsku pauzu...baš ka u nikoj grškoj tragediji.
A ča ću , eto dvi - tri banane za malega unuka..odgovori šjora File, onako ka sva štufa i infotana pa još doda:
Ionako su nan oni iz Evropskoga Komišjuna, iz ote njiove evropske vlade poručili jučer da smo po lopovluku, korupciji i šporkarijama gori i od Afričkih zemaja. E tako nas je Sanader umisto u Evropu lipo doveja u Afriku...evala mu...Pa san i ja odlučila počet navikavat unuka na banane...neka dite zna di smo srtigli i ča smo postali nakon četri godine ove hadezejske vlasti!
Drito u Afriku!
Post je objavljen 14.09.2007. u 09:34 sati.