"Marinko...Marinko mali, otvori !!!!", čujen di niko viče.
"Ma je li ovo šjora File, ma oli nije na Čiovo?"
Otvorin vrata, kad ono zbilja stoji šjora File s inpašanon nogon , sva blida, naslonjena na rame o svoga sina.
"A Bože moj, ča je šjora File...Ča se desilo?"
Ma nemoj mi ništa govorit"..."Ka prvo lupan ti već po ure na ova vrata a ti ne otvaraš...Evo san se sva upotila. da mi je znat od kojeg su driva napravjena? Zvono ti ne radi jerbo nima struje. To ti je kad svi ložidu ove klime i ladidu se ka eskimi - pa je jopet nigdi krepala trafostanica!...A ne govori mi ništa, evo san na Čiovo žgincala nogu pa san je došla slikat u bolnicu..." Sve to ona govori i polako gre držeći se za nas a mi je gledamo judski smisti.
Sila je na trosjed. Bolesnu nogu smo joj digli i stavili na jedan kušinić na katrigu...da malo otpočine.
"A tata šta to znači žgincat nogu?" pita me čer.
"Ajme meni, a odakle ti je ova mala kad ne zna splitski...?!" ...snebiva se šjora File.
"Ma to je šjora File uganila nogu"..spašavan ja stvar: "izvrnila je, iskrivila je ...pa je sad ka malo šepava!"
"Ma ko je šepav?!"..uznemiri se moja susida: "Još ćeš me proglasit cotavon...Ajde ti lipo u smokve, Marinko mali!"
"Proće to ućas, na mlado je!"...dodaje joj sin.
"Ti mući jer češ ogrist budeš li ćinija monu od mene" pogleda ga oštro šjora File. "Još ja jeman prav da te te udren!..A nego ča!"
"Nego Marine moj...a ča je ono nikidan u foje diretur o bolnice, oni šjor Duje Marasović izjavija da će splitska bolnica bit za Šeike!"
"A ča mu ga sad to oće reč?"
"Ma ništa..tija je samo reč kako će bolnica bit ka niki otel o pet zvizdic, ka palaća o zlata u kojoj će moć guštat i najveći bogatuni ovega Svita!"
"Ma Bogati!"..naroguši se moja bolesna susida "a zna je lipo ispjuvat sirotinju!"
"Ma o čemu pričate?"
"Pa jesi vidija da je novinarima , kad su ga napali da u bolnici nima lancuni ni piđama, izjavija kako ji nima jer ih kredu pacijenti! Obišni , domači svit. Ma zamisli ti jednega mazguna! Nimadu bidni pacjenti ča radit nego krest po spliskoj bolnici. Ma jo ča me je infota, ča me je uvridija! Ka niko do sad!"
"Ma je li zbilja to reka?"
"Ma nemoj me i ti sad poć činit ludon pri zdraven razumu", poskoči ona i jaukne jer je žgincana noga zabolila:"Ma da mi ga je uvatit samo na pet minuti vidija bi on Boga svoge...Je, je... eno vidila san kako po odnicima o bolnice sve trčedu bolesnici, i oni s operacij, i oni ča i je kolpalo, i oni ća i je napala žuć, i oni ća su se rumbali autima...svi trćidu s ukredenim lancunima i piđamama i bižidu doma, jer ko će dat takvega blaga ka ća su ti stari lancuni i piđame na buže! Ma evo, sad mi je krv udrila drito u možđane...tlak mi je naresta na miljun, mogla bi ga ovin rukan zadavit..!" gestikulira oba a mi je molimo da se smiri, da se ne uzbuđuje jerbo to nije zdravo u njezinin godinama.
Fermala je ona nekako i pita čašu vode.
Pije onu vodu i gleda me sve ispod oka. Znan da će opet nešto počet grintat.
"A je li Marinko mali...a ča još čitan u foje...da su u Poglavarstvu grada odlučili ispilat one nakazne dizalice, onu gvožđuriju sa Rive, oni žejezni kostur o dinosaura!?"
"A. je je...izgleda da su došli pameti"..smirujen ja situaciju.
"Ma je li...farabuti bi se s nama malo igrali! Oni mislidu da je cili Split ka niki, kako se ono reče, njiov labaratorij...a da smo mi obićni miši na kojima se činidu eksperimenti. Pa malo provaju ovako, malo onako, pa kako ispadne.....da vididu gre li to ili ne gre. A mi kusamo da ne kažen šta...! Igraju se s nama, Marinko moj Skroz su poludili o velike sile. Eto o bolnice oče napravit nike Šeikove palacjune...a onda je najboje da Rivu naspu salbunom da pari ka Sahara, da se Šeici osičaju ka doma kad dojdedu u našu lipu bolnicu. Najboje da ovi muzuviri ča vodidu grad umisto onih žejeznih monstrumi sad na Rivu stavidu pustinjske šatore da nan se Šeici jemaju di smistit kad ulizu u Split. Ma di će samo, bidni, parkirat svoje deve. A najboje u garažu domaćeg Šeika El Bulje ča je zapeja gradit baš šoto Matejuške i Prokurativi! Za dišpet cilemu gradu. Jer ko mu šta more ?! Ma judi moji dokle ćemo mi trpit ovu dežgraciju...ove puvandere i ovu nesriću ča nan se svalila na kosti...?!"
Užgala se moja šjora File i ne more se nikako zaustavit.
"Ajde Šjora File očete šta marendat, očete čašu crnega vina..?" ubacijen se ja.
"A ne, ne...Niman ja vrimena za te monade...Eno moran se i ja poć maškarat u Šeikovu bulu. za poć u bolnicu..jerbo mi smo kradjivci a bedujini su gospoda. Tako kaže dotur Duje. Zamotat ću se i ja u lancun i meknit crne očale na joči. Sva ću se stegnit u bilo, ka u bilu sarmu..samo ćedu mi virit žnjuti o nogu..a tiš mi pozajmit ženine sandale, da parin prava pustinjska gospoja!"
"Ajde, molajte šjora File!"
"Ma ča, ma ča ću ja poć molavat...Eno neka dotur Duje napravi i harem u bolnicu. Ionako je spominja nove bazene za ove cotave, cunfaste i betežne u kosti...Ma ča će mu oni. Nji sve triba potirat a dovest hanume . More se i sam maškarat u onega glavnega evnuha...Lipo se namazat crnon patinon i živit ka u raju...Pa kad je kurbin pir, nek je pir..!"
Smirujemo svi šjoru Filu i kažen joj sinu da je vodi u bolnicu jer je velika fila na traumatologiju.
"E, sad baš nigdi neću poć", zainatila se šjora File. "Sad san baš ogladnila. Aj, Marinko moj..daj mi štogod jer me uvatila debuleca. A evo je i kruv krešija pa jadna sirotinja neće ni crnega kruva svaki dan jemat! za jist. A bili će kruv postat najslaja delicija. Jo doklen smo došli?!"
"Dobro, dobro...šjora File...Oćete li malo tingula na kokoš?"
"A daj mrvu, da vidin jel ti punica zna kuvat?! I čašu crnega! Ajde požuri."
Vidin da se smirila... Polako je blagovala i spremila se za otić slikat nogu.
"Onda, oćemo li šjora File?"
"Evo odma, odma...Vrag odnija i prišu....Nego je li još u grasko vijeće oni stari iz stranke penšjunati ća je privarija svojega prijateja pa neće da sad njega pušti u vijeće ka ća su se bili dogovorili i ka ća su potpisali sporazum?"
"A je, eno ga još tamo!"
"Sram ga bilo, da bi li ga bilo. Ma koji je to svit? I on će poć štitit nas penšjunate! Vidin ja da je njemu samo do vlastite guzice i ništa drugo..Jo ća mrzin takvi svit...Ma kad ćemo ji višje sve istribit iz pulitiike..jerbo znan ja, jema i poštena svita, jema...samo jin triba dat priliku!"
"Je, je...šjora File...Ma vrime nan je..Moramo u bolnicu slikat tu Vašu nogu!"
"Jo, ne govori mi ništa. Nema mi gore stvari nego doć sad doli pa gledat oni bidni svit razbijeni glav - ća skaćedu u more u plitko..ča se ruvinaju po sikama i cestaman. Gledat inšepjane turiste ća se veru po brdima i padaju doli ka nmatuni..pa ji onda spašavaj i liči... pa one ča legnedu na štramce za napuvavanje pa se po cili dan sunčadu po moru i izgore ka paprike, pa poslin jauču ka maške u vejaći...a sve to na gladno, jer to ti je nika sirotinja o furešti koji po cili božji dan stojidu po moru a pojidu dvi pome i fetu dinje i ako još popiju po boce radenske..to ti je sve. Meni ih, sinko moj, čini milo. Atroke ovi Šeici i bogatuni. Ma briga me...kad je Rudolf Valentino moga tamo u Jamerike glumit "Šeikova sina" mogu i ja ovod u Split glumit "Šeikovu babu".... okrene se ona prema mojoj ženi i doda: "Aj mala daj lancun da se i ja maškaran pa gren u bolnicu. Možda me pustidu priko reda!"
Post je objavljen 02.08.2007. u 16:57 sati.