Nisam se pošteno ni raspakira nakon šta san ariva doma kad ono moji navalili: "Aj kupit dinju, pa ćemo je lipo oladit za obid i guštat u njoj!"
"Kvragu i dinja" mislin se ja u sebi, ali mućin, šta ću - ionako me nikad nema doma...
Siden doli u auto i ajde po dinju kod onih kupravendi šta ji prodajedu na kantune od spliski ulica.
Nedija je pa baranko nima gužve. U stvari upaklo je ka u paklu pa nije za vidit nijedno normalno ćejade da izlazi iz ladovine ili rasfriškanog stana.
A furešti se biće banjajedu u teplemu moru sve do prid noć.
I taman mi ona gospoja prodavačica da pola velike dinje kad me u dlan ubode čela.
Ajme majko šta je peklo! Živa vatra. Poludija san od boli a "majstorica" se nudi: "Oćete da Van to malo pritisnen nožon?" i vadi niku nožinu. Bože oslobodi - parilo mi se da se sprema klat prajce a ne rizat dinju.
I oden ja tako s oton dinjon na Pujanke, parkiran se i taman da ću uć u portun kad ono naleti šjora File.
"Ajme meni Marinko mali a ča si se infota, vas si crljen u ćunku ka Sveti Lovre na gradele!"
"Ma pustite me šjora File, evo trčin doma s ovon dinjetinon...Jušto me je ubola osa oli čela pa gren stavit leda na ruku!"
"Joj bidni moj", sažaljivo će ona: "A di se baš kurbetina namirila na te?"
"Ča sve čele i ose ovega svita ne izbodu one lupeže koji lažedu po fojima kako je višje furešti vengo lani...a moja bidna Mande eno tri dana ne more nikoga uvatit za afitat mu kamaru oli baranko posteju! A di su ona vrimena kad su je vukli za rukav i sami iskali di ćedu prinoćit...?
"Ajme meni, nemojte govorit šporke riči šjora File moja..eno su i službeno objavili da je deset posto više turisti nego lani!"
"Ma je li ?! A vidin ja da su i tebe spizdili kad si jin počeja virovat!" podboči se ona strogo i stane posrid vrata.
I šta sad?
Mora san spustit dinju na pod jerbo me ruka pekla ka sto đavli a druga mi je već utrnila da san je prista osićat.
"Ma šjora File moja, žuri mi se..Ubit će me žena. Eno me čekadu za obidvat a još triba oladit dinju za poza obida malo zasladit usta!"
"Je, vidin ja...Sladija bi ti justa dok narod pati i ne more uvatit njanka jednega poštenog furešta za ubit koju kunu višje. I još si mi se naša solit pamet kako štatistike govoridu i ovo i ono. Ma koje štatistike! E objasni ti meni onda, kad si toliko pametan..a zašto je "Sunčani Hvar" pripolovija cine..Aaa! A ča je, sad si umuka. Zinija si ka nika stvar! Čita je meni moj unuk..eno ti lipo piše u Slobodnu kako je na Bolu višje furešti ali manje noćenja! Ma bogati, a ča oni mislidu...da je narod šempjast!? Ajte svi vi lipo lovit rake govnjare...a ja gren pomoć mojoj Mandici uvatit kojega furešta da i ona bidna more pojist fetu dinje poza obidon..jer od onega bidnega penšjuna, od one mižerje ča je dobije more krepat ka i pas!"
"Bože mili" mislin se ja: "Opet je uvatilo! Drži cile traktate. Maše rukama i pokazuje prston ka niki ženski Napoleon. Ma kad će višje stat!?!"
Kad odjedanput začujen:
"Dobro Vi govorite moja šjora File...ma nikor neće da sluša. Činidu se i gluvi i slipi ka jin se istina reče..baš otako šćeto u facu!"
Podignem pogled..a ono sa trećega poda viče sa ponistre šjora Ane.
"A koji je vitar sad nju nanija na ponistru!?!, kukan ja onako u sebi. "Samo mi je ona još falila!"
Pokušavam objasnit:
"Ma šjora File moja evo san se ja jušto vratija lipo iz Varaždina, pa priko Zagreba i Plitvica na Gračac, Knin i Split...jerbo je autocesta zatrpana autima i stvaradu se beskonačne kolone ispred ona dva tunela kroz koje se vozi u oba pravca!"
"Ma je li...ma Boga ti...sad ćeš mi još ovod i pametovat. Neš ti..Asti ga miša potopira..Dva puta u godinu jema ništo gužve prid tin tunelima i omar vičemo kako nan je uspila turistička sezona! Ola pulitike! Neš ti pameti! Ma ako triba zatvorit ćedu oni i ota dva tunela samo da gužva bude još veća...da se svi furešti sa tin pustin tonobilima i familjama skupidu na jarpu i da trubidu , beštimadu i vičedu...Jer ća je veća gungula, nered i kažin...nama je draže. Omar se falimo kako takve navale nima nigdi na cilome svitu i kako smo najboji...a "Sunčani Hvar" pripolovija cine...Biće od dobrote i samilosti! Ajde Marinko moj još ti vonjaš po mliku...Slabo mi ti ništo peškaš u zanje vrime, ka da si malo u oni Zagreb i ti uncu rebambija !"
"Je, je!" čuje se sa trećega poda s kojega šjora Ane gleda da se uključi nekako u ovi monolog moje dobre suside. "Jemate prav šjora File..ništa Van oti ćoro ne razumi!"
"Aj muči ti gori...Ko te šta pita, neš ti vriđat mojega Marinka! Boje ti je da vodiš računa di ti je oni mazgun o muža. Biće opet loče doli na balote s onim manjamuktaštima i neradima!"
Šjora Ane joj peta roge i uvriđeno spušti rolete o ponistre tako da su tresnule cilon forcon.
"A ti se ne juti Marinko moj mali...A kome ću reč ako neću tebi?! Onako ka svome. A sad gren na autobus pa u grad. Ajme meni ko zna ka će doć jer nedijon ne gre redovito."
Vidin ja odma koja je ura i nema mi druge nego joj lipo kažen: "Gren ja čas gori odnit dinju ženi da je stavi u frižider pa ću Vas ja bacit do na Rivu!"
"Ajme, zlato moje, učinit ćeš mi veliku jubav...Samo ne spominji mi onu Rivu. Neš me tamo vozit! Ča su oni farabuti od nje napravili? Ma da mi je uvatit kojega od njih..ne bi se lipo proša, ja ti kažen!" priti se ona a ja koristim priliku da šmugnem do lifta. Ali ona za menom još viče: "A jesi li vidija kako onemu našemu Nadanu sada očedu dat da more stan napravit na Merjan tamo di nikor nikad ni moga! Aaaa? Šta kažešna to? Otilo se gospodinu spavat u kuću na Merjan pa je prvo kupija Meštrovića kaštelet..pa sad minjadu tamo na općinu nike planove zarad njega..Ma di to jema? Biće u Tunguziju! A i tamo više tega nima , viruj ti meni....I tamo je ariva Zakon samo ovod u nas nije. Ma igradu se oni, igradu..A ja ti kažen, Marinko moj, neće to fermat na ovome. Neće to izać na dobro! A ne,ne..Sve će njih Bog kaštigat..nećedu se izvuć ka šta mislidu! Tu jin svi njiovi pinezi nećedu pomoć!Sve će jin bit zaludu !"
Ja sam otiša doma, ostavija dinju u frižider, spustija se doli i izaša isprid kuće a ona je još govorila.
Na brzinu san je seja u auto pa do na đigu. Nikako nije tila na Rivu.
Sad će se nać sa svojon prijatejicon Mandicon pa gredu "vatat furešte"!
Ajme majko, samo da budu niki šta ne razumu rvacki jer će ih sve išempjat svojin govorancijama i prodikama!
Lipo me pojubila u čelo kad san je doveja i puno mi se zafalila.
A vozeći nazad prima Pujankama sve se mislin: "Ma koji je papar moja šjora File !? Ma s kojon forcon ona brani svoje principe ?! Ma koliko još vire u njoj živi da je moguć jedan boji, pošteniji i šesniji Svit..i kako se moramo stalno za njega borit i nikad baš nikad u temu ne posustat!"
Pa i neka je uvik bisna ka niki anarkišta, svaka joj rič piva!
A dok je takvi ideališti jema nade i za sve nas!
Post je objavljen 16.07.2007. u 01:59 sati.