Marketing
KAMPANEL, a ne KAMPEL ...
Ka i svake godine, u ova doba, odma poslin Korizme, u četvrtak, 12. 4., naša udruga od maškar, «KAMPANEL», a ne kako je Anđa iz «Slobodne» bidnome J.Ž. krivo prikucala naziv u KAMPEL, (povirite ovod) organizira bokun domjenka za sve koji su jemali prste, nokte i zube u ovogodišnjin maškaranin događanjima.
Sve koji su napisali koju besidu za Mašogadur, ili za dišpet susidu ostavili sliku i dva tri slova u mome poštanskome sandučiću, koji su dali ča šoldi da se Mašogadur more štampat, koji su ga prodavali okolo po Rivi i šire, za sve one ča su pomogli kako su znali i umili da se povorka ove godine održi, da se nabavi materijala za maske, a bome i da se pošteno napuni sa domaćima i fureštima, slikan, maškaran i dalje.
I da ne mantan unaprid, tribalo nas je bit mašo, ali nije bilo njanci polak Vatrogasne sale, jema bit da svitu danas nije njanci do spize. I da znate da su mašo falili svi oni ča se nisu pojavili ... neka se grizu! 
A sve smo napravili kako Bog zapovida, od službenoga blagoslova ...
... kojega su obavili Velečasni uz pomoć člana crkovnoga zbora, to ka Žutoga, priko muzikaši, cili sastav, od tamburice pa sve do bajsa. Sviraju sve osin cajke, barenko su se tako deklarirali 
A nisan sigur da ne bi i to znali, samo da je ko poželija, ka prave zlatne ribice. Sve su želje ispunjavali 
Ma koja pojačala, koja struja, kad ti ovi zapivaju na uvo, jema da se cili naježiš 
... a spize isto tako nije falilo, a i nije bilo za potužit se. Dapače! Zelena manistra sa plodoviman mora, za prste polizat, ne triba van govorit, a kome to nije pasalo, bilo je i lipega crnoga rižota, samo ča su se opet našla dežurna grintala, zaposlenici Dalmacijacementa, pa su primjetili da in ovi rižot malo baca na petrol-koks, jerbo je bija CRN samo tako. A ko in je kriv, profesionalna deformacija. Pa svudir vidu garbun. Ča bi oni tili da smo skuvali crni rižot po bračku, skuvat na bjanko pa udunit svitlo? A spizu i piće nan je nosija najboji konobar Mašograda, smiren, koncentriran, pristojan, ne bi te ni iz deset puti posla u materinu, tako da se ni na to nismo jemali ča potužit ...
... naravno, kakva je to fešta, ako smo tili napravit da bude do kraja službeno, a di nima predstavnici vlasti , od maškar, od grada i od županije. 
Naravno, u «casual» izdanju, brez kularine ...
Jesu malo okasnili, rekli smo in ka i svima da triba doć u osan uri, ali nečedu nan zamirit ča smo počeli mumat i bez nji.
Dosadno nije bilo nikako, a dokle nije došla spiza na stol, prikraćivali smo vrime sa čakulan, pa i sa malo žustrijin raspravan tipa KOME JE VEĆI ...
... DROB (trbuh, škemba, za sjevernjake), a ne ča ste vi šporkačuni mislili.
Ne znan dokle je ekipa ostala, ja san ionako već misecima baždiran na jedanajst i koji minut pa san lagano otputova u SLEEP MODE, a čuja san nike glasine da i je bilo ča su ostali i do tri ure. Evala in bilo!
Ja san iša odspavat na komod, jer je Vinkica, glede večerašnji događanja, bila na gostovanju kdo Neistoimene Bakice ...
Triba iskoristit priko dana ovo lipo vrime, malo prošetat, sa Vinkicon, naravno ...
... da se Šefica malo nađe sa ekipon i proćakula o pripreman za rođendan, triba se dogovorit ča će koja obuć, nima smisla da se nosi isto. Ženska posla 
A usput, kad smo već kod rođendana, triba isprobat kako bi jon stala malo kraća frizura. Meni se sviđa, Zakonitoj već malo teže ...
a evo van i slika, pa vi prosudite i sami ...
Adio van, još koji dan, subota je blizu, pa ćemo i slavit Njezinome Veličanstvu rođendan, nominalno 21. 4., ali najvjerojatnije ćemo pomaknit za nedilju.
Viša sila. Dovidova!
A dotle ...
Neka Vinka zajebaje kad jema koga ... 
Šetamo se put potočića, malo priko Blata. Kroz bušak. Vinka zapne svaki desetak metri ... spretno dite, na tatu 
... da je ne držin za ruku, pivala bi onu Mišinu "Poljubi zemlju po kojoj hodaš" koliko je duga i široka. I zaludu jon ja govorin da ne gleda okolo sebe, vengo prida se, jer će opet oplest. Govorija njon i zidu isto ... ili mi se samo tako učinilo ...
Kad smo došli na asfalt, kraj ambulante, došlo je na mene red da opleten ... i znate ča mi je rekla?
Da pazin i da gledan isprid sebe
Ja mislin da je stvarno dosta za danas ...
Post je objavljen 15.04.2007. u 19:08 sati.