I kak da bi štel nekaj z kaj zpripovedati. Nutra v meni nekaj me rivlje i štelo bi reči z reči takve. Se pitat bi bilo, kaj me razmeli morti bute. Pa, čovek čoveka furt baš i ne razme, ma kak god da pripovedal. Fajn sam put videl i čul kak jen pripoveda jeno, a drugi drugo. Se spripovedaju i saki si misli kak je rekel kaj je štel, a oni drugi ga je kak stalno prekidal z nekim ne važnim stvarima. I prejdeju tak zadovoljni, kaj svaki je rekel kaj je štel. Vite, tak i ja tu delam. Bi rekel da mi je još i boljše, kaj me niko ne prekida kad pripovedam. Si mislim kak bute me slušali i kak bum, sve to kaj sam štel, rekel. Lepo, a mi vrag mira neda i se ipak zmislim, kak je z vami. Bi i vi morti šteli mi nekaj važno reči. Je figu. Nemre. Je to ni takva tehnologija. Sad ja pripovedam.
I tak pelam ja pripovest i se sam z sebom spominjam. Kaj reči, kak reči i kak sve to spelati. Se ipak to sve radi nečega dela. Zakaj tak sve to skup? Morti bi bolj bilo da si popevam. To z pevanjem mi ipak nigdar ni nekaj išlo.
Sam prešel tu v blogima okoli svega čitati. Su me pesmice privlekle nekak. Kaj da z njima se more samo ono kaj je važno reči. I tak sam se španciral po blogima gde sam pesme našel i probal sve to razmeti. Videl sam da reč ni samo da bi se v rečenice metala. Pa, zakaj? Reč je reč. Kaj ona nebi bila nekaj sama za sebe? Kad ju velim je to ona. Ima slova za glasa pustiti i nekak se čuti more. Ona nekaj i predstavlja. Se ne mora to baš po pravili bit. Zakaj? Ak velim slon, kaj više treba? Znate valda kaj je slon? A zakaj bi to rekel? Pa, valda mi jasno, da kad napišem slon, da vi pročitate i kakti vidite slona i se pitate: 'Zakaj je on to napisal?' Vite, to koji put više vredi, nek da se rečenica z subjektom i predikatom dene. Tak vam dam više za gruntati.
I čital sam pesmice na blogima. Ranejše baš i nis od čitanja bil. Mi čitanje nekak bilo kakti sporo, kaj sam navek puno razmišljal. Retko sam knjige čital. Malo više nek niš. Kad bi tak probal čitati, najrajše bi se počel spominjati z onim kaj je knjige napisal. Znate, kad tak nekaj veli, a ja si mislim da to ni to, pa kak da nastavim dalje čitati. Mi zgledi tak, kaj da nastavim zidati kuću, a temelji su samo kaj se sve ne zruši. Jednu med retkih knjig, kaj sam pročital, je bila nekakva filozofska o budizmu, i drugim filozofijama i verama v Indiji. Isusek dragi, da ste vidli kak je ta knjiga zgledela kad sam ju pročital. Je v njoj bilo više onoga kaj sam ja sastrane napisal, nek kaj je štampano bilo. Mi puno put ni bilo dost mest da sa strane napišem kaj sam štel. Nemrem, samo tak progutat kaj got. To tak meni z knjigami zgledi. Da bi pak knjige imal, da ih imam, to pa ne. Fala, kaj sam nekak kroz živlenje videl, da nikaj moje biti nemre. Kak, pa sve prolazi. Kad bi nekaj kakti imal, bi mi pomalo črez prste procurelo. Veliju da je to tak z vremenom, pa se puno njih rihta, da bi zadržali to kaj imaju. Zapraf si oni samo tak misliju. Sam na sveta došel, a po malo i prolazim. Isto tak, kaj črez prste život polako ide. Ni to niš nekaj grdoga. Je tak. Sam kaj putnik.
Štel sam vam reči, kak sam to z reči i z pesmicami si vu glave porihtal. Sam probal i ja nekaj reči, a da bu kak pesmica. Videl sam da se obično mečeju reči na kraju kaj jenako završavaju, kak vu redu il dva iznad. Se to kakti rima zove. Probal sam, i videl, da mi ta rima, skor navek, pokvari kaj sam reči štel. Pa mi onda lepše zgledelo bez nje. Na rečenice sam skor i zaboravil, kaj bi i one tak mi kvarile to kaj reči sam štel. Znate kaj? Sam tak probal po svom i čist mi lepo zgledelo, a i nekak je bilo to kaj sam reči štel. Sad vu meni nekaj kaj da se dalje rivlje. Reči bi štelo svega. Kak brbljivec bum postal. Kaj da neko v meni, kaj je navek čkomel, tam duboko v mraku, do reči je došel. Pa, si mislim: 'Naj pripoveda taj bogec, kaj je navek čkometi moral'.. Nafčili su me da nesmem bedastoče pripovedati, da se nesmem rivati, da nesmem ovo il ono, a ja tog bokca sam tak stalno rival proč. I se siroti i nafčil čkometi.
I taj sad gledi i verovati nemre. Kaj zbilja sme? Kaj mi buju rekli? Pa bedast jesam, al to ni nikaj zločestoga.
Kaj da bogec onda veli? Gledi i sve razme. Navek je samo gledati smel. Gruntal si je v glavi. Delal je kak su mu drugi rekli. Valda tak treba. Slušati se mora. Navek se čulo kak ovo ni dobro, kak ono ne vredi. I tak sad su tu te reči, kaj se moraju rihtati po gramatiki. Tak su me vučili. I si mislim i nekak mi dojde da velim: 'Bogec dragi, pa reči kaj ti je na srcu, kaj ti v duši.' Pa je to zapraf jedino kaj vredi. Dušu niko zeti nemre. Srce za življenja navek dela. Naj bu kaj vredi. A reči? Naj buju i one slobodne i naj se rihtaju da lepše bi bile.
I tak sam počel pesmice slagati. Sam pri pesmicih na drugim blogima znal deti, onak kaj da reči bi štel. Pa, sam i tu pri sebi neku del. Je meni to kak pesma zgledelo. Nikakvih pravila se spominjal nis. Išlo je kak se štelo. I kaj da ih još čekam da zijdeju van, da ih se ispripoveda, da ih se dene. I kaj da ni nisu moje. Svoje su. Su skup se z bokcom, tam v dubini skrivale, da ih se ne vidi, da ih nebu sram.
Prijateljstvo moje drago, sam pak malo pripovedal. Ak sam morti kaj krivo napisal il slovo krivo vudril ne zamerile. Bum sutra v miru sve to pročital i poispravljal. Već i ne vidim više kak nekad, pa mi pobegne. Pa, je za ljude da pogrešiju. Ni me sram.
Štel bi vam reč da vas sve volim i da bi štel vam sve lepo i dobro, kaj nam je Bogek svim dal, da bi nam tak biti moglo. Samo treba verovati i voleti i sve bu kak nam je po daru tom dato . vaš Mladen
P.S. Sam spregledal i pročital sad drugo jutro. Tu i tam sam koje slovo promenil, kaj mi je krivo pobeglo i kaj sam uspel videti. Se rihta po malo. Kak i navek. :)
Post je objavljen 21.03.2007. u 15:44 sati.