Marketing
Ko piva, zlo ne misli ...
Ako je po temu sudit, za moju Vinku nima straja. 
Nikidan, kad san doša po nju u vrtlič, čuja san je sa vrat di piva «... kad se male ruke slože ...». Rekla mi je teta da je morala meknit tu pismu ca CDa, jerbo Vinka nije pristala pivat okad se probudila ... 
Neš ti, rekli bi zlobnici ... ali eto, nije mi vrag da mira, pa san jon, kad smo odili doma, odzvižduka par pismic, ono, po takt dva, za koje san sigur da su joj poznate ... i pogodila bi odma. Iz prve, njanci falit.
Bogu fala, nije je ugazija tovar na uvo ka mamu i tatu. 
Ajde, početnička srića, opet ja nevirni Toma, pa san je mola na miru dan-dva, pa to sa zviždukanjen ponovija kod babe Slobodne, prid svidocima ... i je. Doduše, falila je jednu pismu, 
ali to bi pri pripisa mojoj nesavršenosti interpretacije, vango njezinome nedostatku sluha.
A ča ću van poć govorit, moje je dite, ne mogu bit objektivan, ali ću je prvon prilikon dat negdi da malo piva i pleše ... bez nabijanja obaveza, neka provaje. Pa ćemo vidit ča će iz tega svega ispast. Ne mora bit ni Monserat Cabal, a bogami ni Ginger Rogers, samo neka se sa nečin zanima. 
Ne mora zapravo vozit ovo auto, ka na vrtuljku,
samo da se dobro zabavi ...
Eto, prošli smo i Majčin dan, 
odnili smo mami i babi cviće, do druge nismo dospili iz objektivni razloga, jerbo je pape mora vodit «onega bez duše» u meštra na hitni popravak. 
Koliko god mi PC pomaže u poslu, toliko kad zariba, 
onda mi posidi i ovo malo dlak ča još nije poprimilo «metalik sivu», kako bi Tarik reka ...
Barenko Vinki nije bilo dosadno, teti Nadi je oti dan bija i rođendan, pa je ona protestirala da kako to nema torte, pa smo joj morali stavit malu šterikicu u jednu paštu, pa je otpuvala jednu desetak puti dokle nije zadovoljila formu. 
Jerbo, kakvi je to rođendan bez puvanja svičic. Nima veze ča nije njezin ... 
Idemo dalje, prošla je još jedna nedilja u vrtiću (di je drvo, da kucnen) i čak više ne rče po noći, znači da je nos malo profundan ... 
gremo dalje, proliće je blizu, a i njezin rođendan ... Ovi put smo se Zakonita i ja dogovorili da gremo u koji dičji restorančić ča priređije dičje rođendane. More bit da u prvi momenat i pari skuplje, ali kad sve zbrojiš i oduzmeš, bebelo smo u plusu ... i to ipak i ostane ono ča je, dičji rođendan, a neće ni nas starije niko potirat, je li ...
Dovidova ... i nemojte ludat! Ipak je proliće 
Update!
Eto, skoro da san i zaboravija koje je doba godine, i ča nan ono sve nosi ... danas san, vozeć Zakonitu na posal (je, radi i nedilju 
) vidija gori nigdi na Mosoru, kako "#$%& "lipo" dimi.
I u to ime, evo povirite doli kako to radu na gnjilome Zapadu, kako oni govoru, već trideset godin ...
... a kad mi već ni vrag da mira pa san malo čeprka po JuBITO, naša san na ovu opičenu verziju STAR WARS: Empire Strikes Back, ali ovi put u LEGO izvedbi ... pa neka mi reče ko da danas nije lipo bit malo dite 
A sad stvarno adio!
Post je objavljen 11.03.2007. u 09:30 sati.