Polahko sve se nekak menja. Bi čovek rekel da vreme ide. Je bilo nekak i prešlo. Ni kak je bilo, al slično je nekak. Kaj da se giblje v nekakvom smeru.
Navčili smo se kroz život iti, gledeti i misleti. Tak se nekak i misliti moglo, kaj i kak bu se zgodilo. Približno nekak se i dogajalo, skor svaki put. Tu i tam se zgodi nekaj, nekak po novom, kaj čovek ni pripremljen bil. Je lepih trenutkof se tak zgodi, al i onih, kaj čoveku daju znati, da ni to to, kaj si on misli. Se koji put promeni nekaj v čoveku, kaj čist promeni njegovo gledanje na svet, njegovo razmišljanje. Ak to ni to, kaj si mislil da je, je sigurno nekaj drugo. Da bi znal kaj je, se lakše z tim nosi, se lakše pripremi za to kaj ga čeka. Navek je čovek štel gledati v napred, da videl bi kaj bu došlo. Kaj da bi mogel to premenit da bolje bi bilo.
Se z vremenom ipak ni moči igrati. Si zmisliti bi moglo, da se bu kakti gospodar vremena, al to je samo misel takva. Svega se zmisliti more. Je, al z misli se živeti ni moći, kaj se živi zapraf, a z mislima se čovek zabavlja i gomba. I tak v svetu zapraf se sve nekak menja.
I ni samo da čovek bu navek nekak drukši, nek se i ljudi menjaju. Jedni jesu, a posle buju drugi tu. Oni od predi, morti, i prejdeju zanavek nekam. Morti i nikam, kaj mi zgledi, da sam se samo tak zmislil, da se nekam ide. Kaj, kam i kak? Kaj sve to negde je? Kaj mora tak bit? Kaj? Zakaj baš mora? Pa, sve si to ja mislim.
I tak gledim, a i mislim si. Sam negda sveta gledil onak nekak, a sad je sve to nekaj drugoga. Kaj da se svet promenil, il morti se to z menom dogodilo. Pa kaj bi si prije misliti mogel? Čovek, kak prvo, na sebe neda, i bi svemu pripisal krivnju nek sebi. Se tak kakti svet menja. I sve to tak ide, dok čoveka ne strefi nekaj dost velko, kaj promena je takva, da se živlenje bitno promeni. Onda odjemput oseti kak slabi je i kak su moći njegove tek tolke, da sam sebi proba zmislit kaj se to događa. Retko v tom i ima nekog uspeha i se obično preda pred promenama takvim. Zmiri se s tim i vidi, da moći nema. Obično se veli, da to je sudbina.
Je puno videti, u letima staršim, kak bakice i dedeki Bogeka moliju. Su morti i predi, al je onda živlenje puno darova bilo i se ni tolko ni stiglo. Pa, moli se kad se ima kaj. Kaj molit kad sve je vredu? Svet kaj da ni više ono kaj je bil.
Sam i ja došel v leta neka. Ima ih već dost nabrojanih. Se i pri meni dost toga zmenilo. Nis više kak mali, al kaj da se nedam od toga maknuti. Kaj da dečec još ni postigel, kaj je štel. Navek sam štel nekaj, kaj ni reči ni lahko. Ono v sebi sam razmeti štel. Kaj to je i zakaj se sve to kakti gible. Zmislit se ni dalo. Sam razmel da misel je misel i da z njom baš se i nemre puno vloviti. Bi mogel razmeti kaj ona zapraf je, a sam z njom delati počel i prije nek sam uopće i pomislil kaj ona je. Je od nekud mi bilo, da to tak delam. Kaj da to određeno je, kak i voda kaj curi prema dol. Mogel sam to jednostavno pustit, da bu kaj je. Zakaj da to razmem? Kaj da bi štel razmeti broj 1. il tak nekaj. Ja ni to nemrem pustit i razmišljam i o tom. Je valda to pamet takva, kaj mira nema. Navek nekaj vrti, al ne baš bez veze, kaj sve kaj ju rivle dojde iz sveta stvarnoga.
Kak ringišpil sve se vrti, al svaki krug novi je, kaj meni drukše zgledi. Da drukše je, kaj drukše zgledi. Kaj more se nekaj promenit zato, kaj nekom tak zgledi?
I tak, malo po malo, sam kakti došel do sim. I kaj da su zbilja promene postale velke. Sam uglavnom znal kam to ide z menom. I pripovedal sam o tom. Pri pokojni mamici sam videl kak to bu, al su vremena druga to bila. Je medecina napred prešla. I tak sam na inzulinčeka prešel. Se pikam dva put na dan i mi to čist normalno. Se mi i slika krvi promenila. Je cukor zbilja manji, a se zato i drukše osećam. Su mi i ranije pripovedali, da sam nekak smiren i da su mi živci nekak jaki i da puno toga 'progutati' morem. Puno ih me ni razmeti moglo. Sad sam još više. Mi tak dojde da sam skroz nekak sretan, zapraf kaj da osnove za to nemam.
Idem tak danas na posel. Kasnim, kaj sam trebal iti na zdravstveno potvrditi uputnicu za trakice za merenje cukora v krvi. Već su mi one od prije na par komadof ostale. V redu mi bilo nekak lepo. Jenoga nervoznog čoveka sam pustil pred sebe. Mu se žurilo. Je i meni, al tam kam zapraf idem bum sigurno na vreme došel. Sam morti čoveku uljepšal dan, pa sam ja zato nekak još radosniji. Spominjem se z ljudima, onak usput. Na red sam došel i sve pokazal kaj imam. Bilo je preveć toga, al niš ni falilo. Sve to sam zbavil, pa idem v apoteku..
Celo vreme nekak vidim blijedo. Ne prepoznajem lica, al sve drugo, na grubo, vidim. Cela slika mi je nekak tamnije nek kaj sam videl prije više od mesec dana. Protekli mesec sam z obadva oka bil na laseru. Cukor je traga ostavil na pozadini oka. Desno je bilo tak zdrmano, da sam sve uglavnom videl s levim. Laseri su napravljeni na obadva. Sad vidim drukše. Nekak, kaj da je sumrak. Lica ne prepoznam. Tek na blizu da. Čitam tek z levim, al se z manjim slovima i tak dost gombam. Morti treba projti nekaj vremena nakon lasera, da se to postavi na dobro. Bum videl o ćemu se dela. Su mi doktori rekli da bum, kad se cukor zmanjša v krvi, neko vreme bledo videl. Morti je to to.
I tak me zanima kaj to je. Kaj da se ne dela o tom, da morti niš videl nebum. Kaj bu, bu. Z vremena na vreme zažmirim i probam malo na pipanje okoli. I tak se živeti more. Je, al sam se zmislil: 'A, blog.'
Ni panike. Znam da panika ne vredi. Nebu valda prek noći. Morti se sve sredi i bu nekak kak i prije. Nekaj se promenilo. Morti pamet sliku ne doživljava kak onu prije.
Sam jučer srel jednog suseda kod doktora. Išel je odmah nutra da dobi injekciju. Izlazi van i ja mu velim: 'Kaj pikica i gotovo.'
Veli on: 'Moram na injekcije da se pripremim za kemoterapiju.'
'Sam dobro čul, kemoterapiju.', ja proveravam.
'Imam raka na plučima već neko vreme. Sad je na redu kemoterapija.', objašnjava mi.
Gledim ga i si mislim, tu je pred menom živ i razgovaramo. To je stanje tak. Kaj bu to bu tek došlo, a misliti se more svakaj i ja njemu: ' Sused, je ta medicina dost napredovala. Znam da je sve više ljudi kaj z tim živiju.'
'Ma nije to meni problem. Niko ni zanavek. Sad je tak i moram to.', mi on veli o tom, kak on gledi na to.
Da, i to je način živlenja. Se traje i treba živeti sad. Osetim da ga je nekaj duboku v njem zdrmalo, al isto tak, da ide dalje. Odlazi sused, a ja njemu 'Bog vas blagoslovio.' I ode on, kaj da to ni niš posebnoga.
Kolko je ljudih s problemima, a kolko smo toga svesni. Živi se sad i jedna lepa topla reč, jedan osmeh, jedan pogled razumevanja napraviju to lepšim.
Sve bu dobro, makar morti drugače. I kaj da bi štel pružiti ruku svima koje boli. Naj bol ode. Se tak zmislim i onih nebrojenih i neznanih, a o njima bum jen drugi post pisal ....
Prijatelji dragi sve vas puno voli vaš Mladen ... :)
Post je objavljen 21.02.2007. u 14:12 sati.